بنات الغجرية _
( بقلم بسمة البياتي)
_البارت الرابع والعشرون _
... ورا المغرب لبست دشداشة مستورة ولفيت الشال اجتي بنين كالت اجوي تعالي نزلي
نزلت وياها دخلنا للاستقبال متروس زلم عززززا هذولة كلهم عمامي جنت داخلة بثقة اشو من شفتهم خجلت
المرة الجبيرة لشفتها هذاك اليوم هم كاعدة واكو وياها نسوان
كالت سلمي على عمامج يمه ولاتستحين ماكو غريب
... حجيت بگلبي هاي بس لا تريدني اروح ابوسهم واحد واحد بس هاي العايزة
اكتفيت بكلمة هلا بيهم
صاحتني اكعد يمها اشرتلي المكان بينها وبين رجال شفتة جبير مو صغير عادي كعدت
فاضل.. هلا يبعد عمج شلونج بنيتي ان شاء الله مرتاحة
..اكتفيت بالأبتسامة لان بس احجي اخرب الأول والتالي شمرتاحة يحضي
ام فاضل... هذا عمج الشيخ فاضل ابني الجبير
وهذاك عمج رحيم
.. اني مثل الثولة بس اهز براسي عرفتني على عمامهم كلهم كبار بالعمر بس اكو شباب اثنين واحد ابن الشيخ فاضل والثاني ابن رحيم علي وخالد
صح اني كارهتم بس طبعهم حلو وكعدتهم تونس كلهم مبينين طيبين ماعدا رحيم گالب خلقتة مدري شبي
فاضل. بنيتي تعالي البيتنا وتعرفي على بناتنة لاتظلين حابسة روحج بالغرفة انتي منا وبينا لاتحرمينا منج
منصف... اي والله خوية احجي وياها حتى انه حارمتني منها
.... حقها ومحد يلومها من تالي عمرها طلعولها اهل وكرايب اكيد موبسهولة تتقبلهم اصبر عليها الصار كله من ايدك لازم تتحمل
... خوية ردتك تحجي وياها مو تقويها عليه وتخليها تقفل بالزايد
... اني كاعدة احمس بروحي اريد اجاوبة بس مستحية من الشيخ لان مبين خوش انسان وحباب
رحيم... دامج صرتي منا لازمين تنسين حياتج القديمة
... رفعت راسي وباوعت عليه بتعجب وشبيها حياتي القديمة؟
... بوية حياتج اهناك غير عن اهنا واي شخص من هذيج العائلة انسي
... انسى الدنيا كلها وما انسى جنة تبقة هي النفس اليصعد وينزل وكت الاموت وينكطع نفسي هذاك الوكت تطلع جنة من حياتي
.... مو هي رفعة راس وهيجي هيج كاتلة روحج عليها خالتج بنت امها والخلف على الخلفوا
.... لو ضاربتي طلقة ولا هيجي حاجي الحرارة صعدت الرأسي اريد اكوم امخلة ردت اعيط باهر باوع عليه واشرلي براسة اسكت اذكرت كلامة هسه اذا حجيت شي وأجاوزت راح اثبت للكل صحة كلامة راح يكولون هاي تربيتها
باهر.. حجيك ممقبول ابو علي خالتها ليرة ذهب ربت ونعم ماربت
منصف... جنة فضلها ما انسى الحد ما اموت الله يحبني خلى بنتي عدها
