تسريع الأحداث :
جازو شهرين من ولادة امال ، و كان جاز شهر من عودة الدخول للجامعة ، في هاد الشهر امال ماكانتش تروح تقرا ، كانت مزالها عيانة و حتى بناتها كانو بزاف ضعاف و لازم تهتم بيهم . سمات بناتها صفية و صفاء .
احمد كان يبعتلها رسائل من الحبس ، كان يطلب منها السماح و يقوللها بلي راهو حاب يشوفها هي و البنات ، كان حاب تروح تزورو . اما امال كانت كي تلحقلها الرسالة تقراها و ترميها و ماخممتش ڨاع باش تروح ليه و تشوفو ، بصح كان مابقالوش بزاف و يخرج ( حوالي 4 اشهر ) ،امال كانت تخمم كيفاش دير ، الا توليلو ولا تطلق منو ، هي من جيهة كرهاتو و ماهيش حابة تزيد تشوفو و من جيهة راهي تخمم في بناتها كيفاش ديرلهم و كيفاش تكبرهم بلا اب .
المهم كي جاز هاداك الشهر ولات امال للجامعة ، ماكانتش تروح دايمن ، تروح غير في المواد الاساسية و جيب الدروس تاع المواد الغير اساسية من عند صحبتها ، كانت متاخرة بزاف و خايفة ماطلعش عامها بصح دارت المستحيل باش تخدم مليح .
في اليامات لي كانت تقرا كانت تخلي صفاء و صفية في الدار مع يماها ، كانت دير ڨاع واش تقدر باش توفق بين قرايتها و العناية ببناتها ، و فعلا خلاص هاداك الفصل و طلعاتو امال بصح كانت على الشعرة جابت 10 المعدل .
مع نهاية هاد الفصل ، كانو البنات في عمرهم 5 اشهر و كان مزال لاحمد 10 ايام و تخلاص العقوبة ديالو ، في هاد النهار جات ام احمد لدار امال و فتحتلها الباب يماها :
ام احمد : السلام ، امال راهي هنا ؟
ام امال : واش تحوسي من عند بنتي ، ڨاع واش درتيلها و مازلكي تحوسي عليها ؟
ام احمد : ماتعيطيش يسمعونا الناس ، و بالزيادة ما جيتش باش ندير المشاكل نسحق امال نهدر معاها
جات امال :
امال : انعم واش تسحقي ؟
ام احمد : امال بنتي واش راكي
امال : ههههه سمعتيها ماما ؟ قالتلي بنتي
ام احمد : ايه نتي بنتي و جيت نطلب منك السماح و راني حاباتك تولي للدار
امال : راكي منيتك ؟ نولي للدار مور ڨاع واش درتيلي ؟
ام احمد : علابالي بلي راني غالطة بزاف في حقك بصح راني حابة تسمحيلي و لوكان تولي للدار نوعدك بلي نتبدل معاك
امال : ...
ام امال : روحي يا مخلوقة ، خلينا نتفاهمو و نقولولك
ام احمد : معليش ، ان شاء الله تقبلي تولي امال بنتي ، خممي مليح في مصلحة بناتك
راحة ام احمد و بقات امال و يماها يحكيو
ام امال : واش رايك بنتي ؟
امال : ماشكيتش تكون صح تبدلت علاخاطر ماحوستش تشوف البنات أصلا sur تكون كاين كاش حكاية
ام امال : مانعرف بصح انا بانتلي صح ندمت ، نتي خممي مليح و لي حبيتيها رانا معاك
أنت تقرأ
انا و اختي
Romanceحكاية مقتبسة من الواقع تحكي على اختين فرقتهم الدنيا كي كانو صغار لكن يعاودو يجتامعو ، اصل الحكاية حقيقي و فيه شوية اضافات
