جازو 3 سنوات و امال حاملة العداب لي كانت عايشاتو مع احمد ، ولا ياكللها درامها ، كان يشريهم شراب ولا يقمر بيهم و هي بقات تسلف الدراهم من عند الناس باش توكل بناتها .
المهم كانت دايمن تخلي وحدة من بناتها عند يماها ، بناتها بداو يكبرو ، كانو توأم حقيقي ، يتشابهو بزاف ، حتى جدتهم ام باباهم ماكانتش تفرق بيناتهم ، أصلا ماكانوش يهموها كانهم ماكاينهمش ڨاع .
زاد جاز عام و امال ولات ماتقدرش تحمل تعيش مع احمد ، كان يضربها في كل فرصة و يروح لمكان الخدمة ديالها و يبهدلها قدام صحاباتها و ينحيلها دراهم قدامهم ، بناتو كان ماشي سامع بيهم ڨاع و كان منينداك مايدخلش للدار حتى يفوتو يومين .
هنا قررت امال باش تهرب و ماتزيدش تعيش معاه ، كانت تخمم بزاف كيفاش دير ، كيفاش تقدر تهرب بناتها معاها ؟ و كي تهرب وين تروح ؟ المهم كان عندها 100 سؤال في راسها حتى وين قررت تصارح يماها ، ام امال ساندتها و قالتلها نمدلك الدهب ديالي عاوني بيه روحك ، و قالتلها باش تروح عند وحدة كانت جارتهم راهي تعيش في Alger .
من هنا بدات امال تخطط لهروبها ، كانت وجدت كلش بقاتلها مشكلة وحدة و هي كيفاش تهرب بناتها .
يماها مدتلها فكرة ، قالتلها نتي روحي تخدمي عادي كيما موالفة و اهربي نتي و صفية و كي تلحقي لتما و نطمن عليك نبعتلك صفاء مع وليد فريدة جارتنا راهو رايح ل Alger .
كيما كان الحال ، وجدت امال روحها ، رفدت في صاكها غير الحاجات المهمة ، les papiers ديالها ، شوية دراهم و الدهب لي مدتهولها يماها .
غدوة منداك الصباح ، ناضت امال عادي وجدت روحها او وجدت بناتها ، رفدت صاكها و خرجت من الدار ، كي لحقت عند يماها عنقتها بزاف و شكرتها و قالتلها نحبك و خلات عندها صفاء بعد ماعنقتها و ودعتها و خلاتلها واحد ال bracelet و قالتلها :
امال : صفاء عمري ، الا توحشتيني شوفي فهاد bracelet و تفكري بلي انا راني دايمن معاك و جامي نخليك ياك ماما ؟
صفاء : بصح انا راني كبيرة مانتوحشكش ، كي جي فالليل جيبيلي حلوة ياك ؟
امال : اوكي بنتي الشابة ، نحبك بزاف
خلات امال بنتها عند يماها و راحت و هي تبكي
صفية : وشبيك ماما ، علاش تبكي
امال : راني نبكي علاخاطر راح نتوحش ختك صفاء
صفية : بصح ياك في العشية نوليو عندها
امال : صفية بنتي راح نقولك واحد الحاجة ، شوفي دوكا ماراناش رايحين للخدمة ، رانا رايحين لواحد المكان بعيد ، نوليو نعيشو تما و غدوة ان شاء الله جي عندنا صفاء ، نوليو نعيشو تما غير انا و نتي و ختك
صفية : و بابا و ماني ( ام احمد ) مايجيوش عندنا ؟
امال : لالا بنتي مايجيوش
صفية : ويييي نحبك ماما
امال : انا تاني نحبك ...
أنت تقرأ
انا و اختي
Romanceحكاية مقتبسة من الواقع تحكي على اختين فرقتهم الدنيا كي كانو صغار لكن يعاودو يجتامعو ، اصل الحكاية حقيقي و فيه شوية اضافات
