انا و اختي

البداية في سنة 1989

امال كانت شابة طموحة في مقتبل العمر ( 20 سنة ) ، كانت تعيش مع عائلتها في منطقة نائية ، كانو فقراء و بالرغم من الظروف الصعبة لي عاشتها كان عندها حلم من طفولتها و هو انها كي تكبر تولي طبيبة .
بابات امال كان شوية عصبي ، يتقلق تمتم ، كان يحب اولادو و بناتو بصح مايبينلهمش ، كان قاسي معاهم عكس امهم لي كانت بزاف حنينة عليهم .

جازت طفولة امال و هي دايما الاولى في قرايتها ، جابت الباك بمعدل يسمحلها تدخل لمجال الطب لكن باباها محبش يخليها تدخل للجامعة ،و بعد عدة محاولات منها و من يماها قبل و لكن بشرط انها تتزوج قبل ، بالنسبة ليه هكدا الناس مايهدروش عليها و تبقا محافضة على شرفها .

المهم امال كانت في موقف صعب ، اما تخير تكمل تقرا و تحقق حلمها بصح تتزوج مع اول شخص يتقدملها مهما كانت صفاتو ، او تتخلا على حلمها و تبقا تسنى في الدار حتى نهار يجي شخص لي يوالمها للزواج . بعد مدة من التفكير قررت امال انها تقبل تتزوج مع اول شخص يخطبها و لكن لازم يخليها تكمل قرايتها و تحقق حلمها .

في هديك العطلة جا واحد الراجل كبير على امال ب 17 عام اسمو احمد يخدم فلاح كيما اغلبية سكان هاد المنطقة و كان حاب يخطب امال ، المهم باباها قبل بلا مايخمم و بلا ما يسقسي عليه ولا حتى يعرف اصلو . جا النهار وين جاب احمد عائلتو و جاو يخطبو امال ، كانو يبانو ناس قباح و أصلا فقراء اكتر من عائلة امال ، بصح الله غالب كان لازم عليها تقبل بيه باش تلحق لوين راهي حابة . هدرت امال مع احمد و تفاهمو انو يخليها تكمل قرايتها و تخدم ، هو كان طامع فيها تخرجو من الفقر و هي قلبها مارتاحش ليه بصح بالسيف عليها قبلت .
من نهار الخطوبة ، احمد ما طولش و دار العرس و تزوج هو و امال في مدة شهر ، ماكانش عندها حتى الفرصة باش تتعرف عليه مليح . المهم كي تزوجو تفاهمو انهم ما يجيبوش دراري تمتم يستناو حتى توالف امال القراية .
الاشهر الاولى من الزواج جازو عادي من غير انو امال تخدم الشغل تاع الدار كامل وحدها و كانت تتحمل كلام و اهانات ام احمد ، كانت الحالة بالنسبة ليها شوية صعيبة ، كانت تحاول توفق بين قرايتها و الخدمة في الدار . جاز عام على زواجهم و ام احمد بدات تحوس على الدراري ، احمد حاول يفهمها بلي تفاهمو ما يجيبوش دوك بصح هي ولات تهدرلو بزاف فهاد الموضوع و ديرلو  la pression حتى هو تاني توسوس و قرر يحكي مع امال ...