يوميات بت منارية

*الجزء الأول*

السلام عليكم...دي رواية حبيت اتكلم ليكم فيها عن تجربتي في مدرسة المنار وحأبدأ ليكم من اجازة تامن والنتيجة ودخولي سنة اولى في المنار وبعدها تانية واخيرا تالته...وانا حاليا ممتحنة لكن الظروف حقت العالم دا...فقلت استغل الفترة دي واكتب ليكم حكايتي في مدرسة المنار والتعب الشفتو وانخداعي بالثانوي وانا كنت قايلة في الثانوي دا حتفسح واعمل العايزاهو لكن طلع اكعب من الأساس وما تقولو مدرسة المنار براها متعصب...ﻷ في مدارس كتيرة كدا...عمومًا الثانوي كان أكبر خدعة في حياتي

يلا في الرواية دي انا حاكتب بلغتنا السودانية وحيكون سرد لقصة ولو في حوار بكون بطريقة مختلفة عن السرد العادي..
أكثر اسماء حتتكرر في الرواية دي هم:
محمد عبد الجليل كرار _مدير مدرسة المنار بنات  
نجاة وسعاد وام سلمى _ مشرفات
حسن مجمر _ استاذ رياضيات
زكريا الملقب بزيكو _ استاذ انجليزي
أسامة و عبد العظيم _ أساتذة انجليزي
حلفاوي _ استاذ عربي
عبد الحفيظ_ مدير المالية
تسابيح المعروفة بسبوحة_دي سكرتيرة محمد ومعاها وحدة برضو اسمها منال...
الهادي_ دا حق التراحيل البوزع البنات في التراحيل وكدا
قرن وقرن الطويل وقرن حق البوفيه(ما عارفة دا شنو بس نحن مسمينهم كدا😂😂)_ديل زي ما تقولو هم المحافظين على المدرسة من الدمار وخصوصي قرن حق البوفيه دا ظريف خلاص..
تاني في صحباتي وبذكرهم في الرواية بإذن الله..

يلا الناس الما شافو المنار..المنار لونها رمادي تمام مكونة من طابقين زايد الأرضي يعني تلاته طوابق..الطابق التحت حق اولى كله والطابق التاني حق تالته لكن في فصل واحد من تانية والطابق الأخير حق تانية ومعاهم أدبي....اول ما تجي داخل بتلقى الإشراف بعد تتطلع منو بتلقى فصول أولى وفي البوفيه والحمامات وحوش كدا في نص الحوش في حاجة كدا مربعة مبنية زي حوض لكن مليان تراب والأرض كلها رملة وحصحاص وفي المظلة الشهيرة دي معظم بنات المنار عندهم فيها ذكريات وبعدين في سلمين سلم جمب الإشراف ودا الكبير وسلم جمب البوفيه ودا الصغير اها السلم الصغير دا بوديك الطابق التاني والفيهو مكتب محمد(دا المدير) ومكاتب الأساتذة وفصول تالته والسلم دا زاتو بوديك فصل أدبي في الطابق التالت لكم ما بوديك فصول تانية السلم الكبير هو البودي لفصول تانية...ودي مدرسة المنار اسامي الفصول غريبة شديد عشان كدا حاوريكم ليها في الرواية..

يلا زي ما قلنا انا في البارت الجاي حابدا ليكم من اجازة تامن والنتيجة والبهدلة....بتمنى تدعموني في روايتي دي...وشكرًا😊😊💜