يوميات بت منارية

*الجزء السادس*

سلام عليكم...الليلة نبدأ مع سنة تانية والحصل فيها شنو ويلا بسم الله...

انا كنت مبسوطة شديد انو واصلت في المنار وما طلعت...ونزلت سنة تانية وقابلت صحباتي بس هم وزعوهم في فصول تانية وكان لازم اصاحب بنات عشان اثناء الحصص المملة اتونس معاهم😊 وكان في بت معاي في الترحيل في أولى وهي اصلا جارتي كنا بتونس كتير في الاجازة مع بعض وسبحان الله طلعت معي في نفس الفصل فرحت شديد ومن اليوم داك لحد هسي نحن أصحاب وبست فريند...بس ما قعدنا جمب بعض عشان عارفين ونستنا وكدا وقعدت جمب بنات ما بعرفهم لكن انا بطبيعتي انسانة اجتماعية (بتتذكروا بت الكراس😂😂) اتعرفت عليهم وبقينا أصحاب كنبة نظام نتشارك الأقلام والمساحات وكدا...صحبتي وبستي وكنا حرفيا ما بنتفارق إذا شافوها معنى كدا انا معاها كنا أصحاب شدييد يلا انا وتبيان اتفقنا انو نشد حيلنا في سنة تانية وفعلا حصل شدينا حيلنا وبقينا نمشي لبنات تالت نشيل منهم ورق تانية (لانو يخوانا المنار دي امتحاناتها من برا الكتاب😂😂 انت بتحتاج امتحانات سابقة لأنها بتكون احسن من الكتاب بكتير...والمذكرات ضياع وقت ساي) يلا بعد جمعنا ورق اتقاسمناهو واي وحدة طبعت نسختين وجينا وزعنا لبعض وتعالو شوفوا الحفر من امو..كل يوم نتفق نقرأ جزئية وبنجي المدرسة نحل الورق طوالي واكتر مادة قريناها الرياضيات😂😂💔 والله طلعنا ليك روحها زاتو...
طبعا انا اول يوم جيت شفت اسم فصلنا لقيته حرف P شكيت في روحي دي وقلت انا مالي مع حرف بي دا😕 مشيت جبت صحبتي الزمان ديك وقلت ليها فصلنا دا اسمو شنو قالت لي رو(عرفتوهو يابنات تالته رو رمز المقاومة النوعية😌)وسألتها من باقي الفصول وقالت أسمائهم فاي و ابساي😂😂💔 (انا اي شئ ولا اتحرج تاني)...

صلو على الحبيب 🌺
..........

المشرفة حقتنا كانت نجاة ومتابعتها حرفيا عسسسسل ياخ المره دي عسل بي كلو في الاول كنت بكرها عشان بتقول لينا اي وحدة عندها ضفور أو شرابها قصير تتطلع برا وانا زي الهبلة بطلع على أساس حتفتش وتمسكني لكن بعدين اكتشفت انو تهديد ساي وبقيت اربي ضفوري لكن ما كلهم بختار البقدر ادسهم والباقي بقصهم😆واي زول ما جرب نجاة تتابعوا فاتك ياخ انا كراس الحاسوب بكون عشرة دروس ما مصححة وطبعا هم لازم تكوني مصححة لحد اخر درس أو يكون عندك درس درسين بس..المهم بخت ليها الكراس ويفتح آخر درس بتسألني بكل طيبة عندك كم درس ما مصحح بقول ليها واحد بتختم لي وتقول لي تمام ولا بتفتش😂😂 (ثقة عمياء😂😂💔)عشان كدا يخوانا الزولة دي عسل ومرات بتختم لي الكراسات كلها وتجي تسألني في الاخر عندك كراس ما مصحح؟؟ انا اقول ليها كلهم مصححين إلا مادة كذا(عشان ما تشك😈 لانو مستحيل بت تكون متابعتها فل إلا من رحم ربي)....نجاة دي زي ما قلت ليكم خفيفة خفة تحلف ما عمرها كم وخمسين وقرن اكتر زول مصاحبها كل ثانية يابت أجري نادي قرن يابت نادي لي قرن😂😂...نحن لما تجي حصة المتابعة بنقعد نقرأ ونشرح لبعض بصوت واطي وإذا الصوت بقى عالي طوالي نجاة تقبل علينا يابنات انتو السنة الجاية مش ممتحنين بتتكلموا لي يلا ربعوا يدينكم وعاينو للسبورة😂😂 (لي يا قاسية😣😂) حرفيا كانت من أجمل الحصص..

معليش يخوانا والله الليلة كتبت الجزء دا بالعافية..اعفو لي وعليكم الله اعملو فوت شفتو النجمة التحت المرسومة بلون اصفر اضغطوا عليها عشان تبقى ملونة كلها😂😉..يلا سلام💙