يوميات بت منارية

*الجزء الثامن*

السلام عليكم...ورجعنا مع اليوميات..

زي ما عارفين انو في حاجة اسمها كورس نزلنا الكورس وبدينا شوية كنت مرخمة ما شادة حيلي زي سنة تانية دا غير الناس البقولو سنة تالتة صعبة والفيزياء نار يجيبو ليك احباط (اوعكم تسمعو كلام زي دا لانو بجيب ليكم نفسيات ساي من بداية تالت)..
المهم اشتغلنا وكنا في بداية شهر أربعة بس فجأة جات المليونيات وسقوط عمك داك😂😂يوم سقوط بشة اجزو لينا طوالي لبست عبايتي وطلعت مع ناس بيتنا ومشينا القيادة💔(كانت ايام جميلة والهتاف..ربنا يرحم كل شهيد💚)..
تمينا الكورس وامتحنا وكان آخر امتحان فيزياء وكان واقع اول يوم في رمضان وتعالو شوفو حالتنا نحن فيزياء ما فاهمين وكمان صايمين والمخ مشطب😂😂💔 غايتو عديناها بالعافية واجزنا لحد ما المدارس تفتح وقالو لينا في الاجازة اقروا عشان تاني ما بنعيد الكلام..وانا والله بس لي الله تحلف ما ممتحنة العب واشيل التلفون واحضر وغايتو قلت ليكم لي الله بس😂 وأول ما نزلنا المدارس كنت مشطبة حرفيا لكن الحمد لله ما طلعت براي صحباتي معاي والحفارات يجو يقولو ما قرينا وهم من اول يوم شايلين ورق الامتحانات ومن مكتب لي مكتب😑😑
المواد كلها في الاول كانت صعبة وماف حاجة ساهلة وكانوا بدونا امتحانات كتيرة شديد ونهاية اليوم بكون في امتحان وانا والله ماف امتحان في المدرسة دي ما امتحنتو قارية ولا ما قارية ياخ كانت ايام كيف😢واكتر مادة كنت بمتحنها الاسلامية😊😅 والله انا اول مرة اعرف انو الإسلامية صعبة كدا ياخ هم دايرين اصور ليهم الكتاب في الورقة وانا يخوانا ما بنفع في الحفظ اعمل شنو😧..غايتو كنت بجازف وبمتحن ولو جبت درجة كعبة بعيد الامتحان تاني لحدي ما اتصلح ولو خلوني اسبوعين وجو امتحنوني بجيب اكعب من الدرجة الاولى (قلت ليكم ما حقت حفظ انا😭😭💔) غايتو ضغطونا شديد ودا غير الملخصات الكتيرة والواجبات والتمارين وأوراق العمل💔💔 (ضغطونا لكن عشان مصلحتنا)..وكانت المتابعة برضو شغالة ونحن بالعافية بنقرا خلي نكتب ونصحح كمان لكن انا والحمد لله كنت اول ما يقولو لي عندك متابعة بصحح البقدر عليهو وبكتب الواجبات حقت شهر عديل😂😂💔واليوم قبل يوم المتابعة انا كنت برجع البيت اكتب الواجب وانوم والله يحب المحسنين😄💚..

صلو على الحبيب 🌺

امتحانات الفترة الأولى جات وكانت نااار والفيزياء ماف داعي اقول..ولا الأحياء ولا الاسلامية😭😭...احلى وأسهل مادة الإنجليزي💚..عدت الامتحانات وجات النتيجة وكانت متوسطة يعني في مواد زي الفيزياء والكيمياء جبت فيها كعب ومواد زي الإنجليزي والأحياء جبت فيها كويس والباقين وسط😕..بعديها بفترة جو علقوا لينا جدول امتحانات نهاية اليوم😢وبقينا نمتحن وانا حرفيا امتحنت إسلامية اكتر من خمسة مرات💔كنت كل مرة اجيب في التمنينات ولا السبعينات يقولو لي تمتحني تاني نحن ما عايزين أقل من 90 في الاسلامية وبعد دا كلو اجيب في التمنيات😂😂💔...غايتو عذبتهم معاي عذاب وكل مرة اتنفسن في صحبتي واقول ليها لي كل مرة يختاروني انا عشان اعيد الامتحان لي كل مرة حتى لوجبت درجة كويسة بختاروني لي انتي مرتاحة كدا😂😂..والله بكيت بكى في سنة تالتة دي ومرة فاضت بي قلت إلا اخلي المدرسة وقلت للبنات بكرا ما جاية وتاني يوم لقوني في وشهم(ما عندنا قرار)😂😂💔....

وجات امتحانات الفترة التانية والكانت شاملة المقرر كلو لانو السنة جرت شوية..كانت صعبة وكالعادة الفيزياء والأحياء والإسلامية حدث ولا حرج لكن المرة دي الإسلامية اتخطت حدودها والله😤😡 كانت نااار وانا كنت بدعي ما اجيب واحد😂😂 وانا كمان الأحياء ما كنت قارية حناني فيها دخلت ساي على بركة الله..لكن الحاجة الغريبة انو النتائج طلعت كويسة شديد والحاجة الأغرب انو استاذ محمد لما كان بوزع فيها كان بنصحنا وبنبهنا وبضحك معانا😨😵 ياخ كنت حاسة انو في حاجة ما تمام يعني محمد يضحك ولما يضحك يضحك معانا😂😂💔..المهم وزعوا النتائج وادونا الورق وراجعو معانا ودرجاتنا كانت كويسة حتى الفيزياء ما كانت كعبة...بس تعال يا كورونا من حيث لا نعلم وقفلو المدارس وبقينا نقرأ في البيت ومجتهدين والأساتذة بجونا في البيت وامورنا باسطة...ولكن الحمد لله على كل حال نحن الآن ممتحنين مع وقف التنفيذ😂😂💔..

يا جماعة القصة انتهت لحد هنا وبتمنى تكونوا استمتعوا انا ما كنت متوقعة انهيها بالسرعة دي بس حسيت انو خلاص كفاية لحد هنا...لو في اي تعليق حاجة ما حبيتوها اكتبوا لي بالكومنتات...وشكرًا لكل زول دعمني💚

#تمت