كورونا الليبية 🦠

الحلقة الاولي

الحلقة الاولي
كورونا الليبية 🦠
# شهد رزق
وميض البرق
في المدرسة يوم الخميس في حصة الرياضيات
ابلة حنان : الاحد امتحان سمعتوا ولا لا وقسم بالله بنجيبه صعب وماكم حالينا اني نعرف مهند : متندريش مراة اني نسكرها
الابلة باستهزاء : تي منوا انت بتسكرها ، عقلك المصدي اهوا بيطلع منه حل هو ..
مهند همس لصحابه : ان شاء الله تجيك كورونا وتموتي
صحابه 😂😂
ايمن : قول ان شاء الله تجي كورونا وتتسكر المدرسة
مهند : تلقيها مجمعتنا قدام بوابة المدرسة وديرلنا امتحان ، يطلع منها المستحيل الابلة هذه
حسن : وين بديرلنا السبورة باش تكتب الاسئلة ، وكيف بنغشوا من بعضنا ،
مهند : السبورة حيط المدرسة ، اما الغش نكتبوه عل الرشاد ، ساهله اهيا
حسن وأيمن 🤣😂😂
عبد العزيز : تافهين وربي ، بنخبر فيكم الابلة راه
مهند 😒 : شن دخلك فينا أنت يا وسواس الكتب ، انت حتي كان جاك كورونا وتموت ،يدفنوا الكتب معاك
عبد العزيز : يالابلة
الابلة حنان : خيرك عبد العزيز شن في ،
عبد العزيز : يابلة راهو هادم - أشر عل مهند وحسن وايمن - كاينين يدعوا ان شاء الله تجي كورونا ويلتغي الامتحان
الابلة 😡 : اطلع انت وياه برا
مهند 😀 : احلي خبر والله منور عبوده عطيتنا الضي الاخضر ..
حسن وأيمن 😁😁 يبتسموا ويودعوا الفصل
الابلة تنرفزت : اطلع انت وياه هيا ، ودرجة النشاط صفر
مهند 😒 : باشوي علي اعصابك يا مدام تو تسخني وتجيك كورونا وتعْدينا ، واصلا درجاتك منبوهمش من يوم يومنا والصفر شعارنا 😁 باباي ، حصة تعيسة
الابلة 😡😡
يوم الجمعة في الليل
مهند 😀😯 : يا بوي ياعيلة تعالوا اسمعوا الخبر اهوا تعالوا ...✨✨
أسامة و أميمة جو يجروا : شن في شن في خلعتنا
مهند : قالوا في النت بيعطونا عطلة 15 يوم يعني لا قرايا لا بطيخ
أسامة صرخ : الله أكبر الله أكبر احلي خبر والله تي هياجة بنعزقها مع صحابي ...قالها وعدا خذي مفاتيحه وطلع ...أما مهند قال : مفيش امتحان رياضيات 😂😂 ياحرام له له خاطري نشوف وجها الابلة لما تشوف الخبر أضن بديرلنا امتحان في النت ،عاد هي تاخد وتحلف وقعد يقلد فيها، تعرفوا الامتحان واعر بنجيبا اللي يسكرها حطم رقم القياسي ، اخ ريتوا دعاوينا استجابت ، فيا البركة وحق ربي 😂😂
نمشي نشري المناديل للابلة أكيدة توا تبكي عل الامتحان اللي ضاع
أميمة 🤣🤣
الام امل : شنوا وليداتي نسمع فيكم تعيطوا
اميمة : نعطيك خبر بمليون جني ، يمة خلاص الخبر اهوا حرك هرمون السعادة عندي
معاذ 🙄 : انت ديما ناشط الهرمون هذا ، واكيدة الخبر هذا زي وجهك الاقشر
اميمة عصبت : سمعنا سكاتك يا نكادي انت ،يابارد انت
معاذ : تعالي سخنيلي
امل : تي تحشموا عل وجهكم انت وياه ، شنهوا الخبر هذا
مهند وهوا يكتب في تعليقات عل النت ويتسهوك مع صحابه : يمة اعطونا 15 يوم عطلة يعني لا تقوليلنا شدوا كتبكم ولا ارقدوا امبكري
امل : بجديات الخبر اهوا
اميمة : اي يمة ، طلبتك يمة غدوة كلمي العيلة نتزردوا جميع ، قداش لينا عل الزرادي
امل : خلاص تمام
تاني يوم
في حوش العيلة امداريين بيتزا عل الحطب ، وجونا مليح بكل شباب امداريين عكسة وملتمين وضحك ، ومهند هو اللي مغيرهم جوهم
مهند متكي عل الفراش : نجيها كورونا ، جتنا و15 يوم عطونا ، جابتلنا الخير ، نبي نعرف 15 هادم كيف بنقسمهم ، لازم ماندير بيهم حاجة
احمد : كل بنت تكلم فيها خصصلها يوم كامل ،
مهند : نص الفرخات سيبتهم ، قاعدعل 2 بس توا
معاذ مش عاجباته الدوة : بدل ما تقولا قسم وقتك كل يوم احفظ سورة من القرآن ، تقولا بري قسمه مع البنات ، راهو غلط اللي اديروا فيه ، تو ترضوها في خواتكم ؟!
مهند سكت
اما احمد تمتم ياربي بدا النكد
فجأة قربعت عليهم الباب اميمة : ياشباب تعالوا امداريين دربوكة تعالوا هيجوا
ناضوا الشباب يجروا كلهم ، عاد بلاهم ما يحلي الجو (( طبعا هما متعودين علي بعضهم يبصروا ويهدرزوا مع البنات إلا معاذ ، يحسها تافهة ))
معاذ قال : اني طالع نمشي نكسد عل كتاب خيرلي
مهند : اي انت هذا اللي فالح فيه خربوشة الكتب 😟، ذكرتني في عبد العزيز يلي يقرا معانا
معاذ : فرحانين في العطلة وناسيين سببها ، لما توصل فيكم ، قولوا ياريت بعدها ،، كمل كلامه وعطس 🤧
الشباب يشبحوا في بعضهم 😮😮
مهند صرخ : كووووروونا اهربوا ، وعدوا يجروا وهما يضحكوا
#######
لما وصل خبر الحجر الصحي ممنوع التجول
الحاج علي مقعمز هو وأمل وأسامة
علي : سمعتوا أخر الاخبار حظروا التجول يعني مفيش طلوع إلا للضرورة
أسامة راقيتلا : مدخنيش بوي بنطلع اني ، شني معقولة نقعد في الحوش ، منتحملش نقعد بدون طلوع ،
الام امل : وشني ادير ياهمي تطلع عل الاساس طلوعك هذا فيه فايدة ،ولا تخدم في شركة بلي تطلع معش تجي ، مافالح كان تمشي تهيِّت وتعاكس انت والفروخ ، ياعلي شده احسن ولدك خير ما يديرلنا فالطة مع بنت ونطيحوا بيه
أسامة : تي باهي باه امي خيرك ولعت انتي كليتيني من قشوري وشن تعبي في راس بوي تقوليلا شده ،شن تشبحي فيا عيل باش تشدوني
علي : امالا انت شني 🧐
أسامة تكنط : راهوا اني 3 ثانوي كبير افهموا ، شني مش عاجبكم شناباتي هادي وتصغروا فيا ،، صبا وقال : الطلوع بنطلع باهي ، اخر عمري طلعولي عيل
امل : تي والله ماك طالع ،وهاني حلفت
اسامة : ياربي 😠
تقابل هو واميمة
اميمة : خير شن فيه
اسامة دفها : تي فوتي من قدام خليقتي ترا ، منيش فاضيلك
اميمة 😓 : ربي يهدي وخلاص
خش مهند 🥺🥺: اهي اهي تي شني بوي حظر التجول ، معناته معش نتعارك مع جارنا الحاج حسن ، ومعش نشبك ونعاكس الطروف
علي : تي بري ياتافه نتفكوا من توأمك تجينا انت
امل: نبي نعرف شن مدايرا في عمري وجبت ولاد هكي فاشلين مفيش واحد رافع راسي خاطي معاذ ، كلا الباقي فالحين في جو تنسريف والفروخ ، وخوكم الكبير جبناله زوجة بالك يعقل شي في شي كل يوم نسمع فيهم يتعايطوا شن هذا
اميمة همست : الحمد الله ماجابت سيرة البنت البايرة 😁😁
مهند : تي خيرك امي ظلمتيني ، مبيضلكم وجهكم اني ، تعرفي عندي جمهور بنات يجروا في جرتي ، تي هيبة اني راه ، ومحطم رقم القياسي في ترقيم البنات ، لدرجة يجوني شيابين لما نرقم فيي البنات يقولولي من بوك انت من اي عيلة ، واني بكل افتخار نجاوبلهم بوي علي ##%@
امل حطت ايدها علي راسها : ياغبارتي السودة ، ياغبي هادم مش عاجبتهم تربايتي يقولوا من الفرخ هذا يلي اهله ماربوه يلعب عل بنات الناس ، ياعلي زوّد بالله
علي : لا كلام عليه ، شن بنديرلهم اني ، ربي يهديهم وخلاص
مهند : شوفي امي بوي قال كلمتين وسكت معلقش ،وانت نطيتي فيا طول ، مدرتش حاجة غلط اني
امل خدت الشبشب ورماته عليه
مهند شد روحه ويجري قبل ماتجي فيه 😂 قال من بعيد: قسم بالله امي كان تخشي جيش تطلعي قناصة محترفة ، الناس تشري شباشب باش تطلع بيهم وانت باش تقنصي فيهم ، بوي اشبح معش تشريلها ،راهوا غاليات الشباشب ،اللي تشريلها فيه نلقاهم فوق الزينقوا ولا فوق الدولاب شكلا كانت تستهدف فيهم 😂😂 واميمة 😂😂
صبت امل : ريتي ريتي قلّت الادب اني تو نوريك تعال جاي تعال
علي يبتسم : عطيه زين ياامل
مهند يلود في الحوش وامل في جرته شادة عرجون لقاته بحدا الباب
مهند تخبي ورا بوه ويلهد : خيرها امي راكبلها ابليس ،
اميمة تضحك وبس قالت : يام تعوذي من الشيطان خلاص فوتيه تافه من يوم يومه
مهند شبحلها نظرة امتاع شن دخلك انت ، ويجي العرجون عل ظهره
مهند : اي اي ارتحت يمة توا لين جلتيني فيه 😬😬
امل لوحت العرجون وماشيا للمطبخ : دهشتني ياولد ، اخر عمري نجري في جرتك طول وعرض وشنابات ولحية ، نجري وراك
مهند يمسد في ظهره : اني بصرت انتي قلبتيها جديات ،وجريتي في جرتي
امل : عيال اخر الزمن
شهد رزق
$$$$

عند عبد الرحمن يتصفح في النت وكل الصفحات تتكلم عل كورونا وهكي طاح في منشور يحذروا فيهم لازم يرجعوا لربي وكورونا جند من جنود الله وان يوم القيامة قرب ، شد قلبه قال حي عليا اني عندي ذنوب هلبا لازم نرجع لربي ، زاد تصفح لقي منشور علامات الساعة الصغري
هل تعلم ان من علامات يوم القيامة الصغرى :
١-كثرة النساء
٢-الكاسيات العاريات
٣-كثرة الخمر والزنا في بلاد الإسلام …
٤-موت الفجأة
٥-انفلوانزا الخنازير ؛ ولقد حدثنا رسول الله محمد عن وباء آخر زمان وأنه سيكون من الخنازير وأن الناس ستبدأ بقتل الخنازير حتى ينزل عيسى عليه السلام ويقتل آخر خنزير .# وصل عند هنا وانخلع قال حي حقا هادم كلهم طلعوا ،واكيد توا انفلونزا الخنازير يطلع كورونا ،قعد يتذكر ذنوبه قبل لعب عل بنت ونشرلها صورها وهي قعدت تتحسب عليه ،حي😨 كان ربي ينتقم مني ، وتذكر لما يعصب امه ومش بارها ، واللي كان حافظه من القرآن نساه ، هادم كلهم كان ربي خذا امانتي توا ولاجتني كورونا ونموت ، بنخش النار طول ،،😢:: ناض خش الحمام وبجديات بدا يصلي في المغرب بكل خشوع ويطلب من ربي يتوب اليه ، كمل من المغرب وبدا يصلي في 4 ركعات نافلة، (( فقد قال الرسول صلى الله عليه وسلم ، من صلي أربع ركعات بعد المغرب قبل أن يتكلم رفعت له في عليين ، وكان كمن أدرك ليلة القدر في المسجد ألاقصي "" وهي خير من قيام نصف ليلة
وقال ايضا "" من صلي ست ركعات بعد المغرب قبل أن يتكلم غفر له بها خمسين سنة "" الله قديش المعلومات هاذه منعلموش بيها 😅💓))
صح كانت صعبة عل عبد الرحمن يصلي 7 ركعات مغرب ونافلة لكن حيغصب علي روحه ، باش ربي يتوب اليه ، كمل من الصلاة وقعد يقرأ في القرآن ، الله حس براحة مش طبيعية ، قديش ليه معش شد المصحف ،
خشت عليه اميمة : قتلا بوي قالك تعال ، احنا مجتمعين تعال كمل علينا ،
عبدوا سكر المصحف وقال باه
طلعت اميمة قعمزت بحدا مهند قتلا : تعرف خوك عبدوا لقيته يقرا في قرآن
مهند : اكذبي
اميمة : وحق ربي
معاذ سمعهم : وشن فيها كان شد القرآن حاجة غريبة ولاشن ، عل الاقل خير منكم ، لا تذكروا في ربي ولا تصلوا الصلاة في اوقاتها
مهند : بدا في نصايح اف
معاذ : براحتك انت متبيش تستقبل النصيحة خليك بعدها حتندم
مهند 🙄 : باه باه
خش عبد الرحمن للصالة وقعمز جنب اروي : خير سمعت انكم مجتمعين
مهند : اي الحكومة تبينا
عقد حواجبه عبدوا : شن حكومة
مهند : تي بوي يا النم
علي : اني حكومة وامكم شني امالا
مهند : سياسة
😁😁😂😂😁😁 الكل
$############ ويتبع الباقي في الحلقة القادمة مع الكاتبة شهد رزق
وميض البرق

١٥٤٨ كلمة يلا قيموها