كورونا الليبية 🦠

الحلقة التانية

الحلقة الثانية من
كورونا الليبية
للكاتبة شهد رزق 💓💓 وميض البرق 💥💥
مقعمزين كلهم ويهدرزوا ،علي يهدرز مع مرته امل ....اميمة و وعبدوا يهدرزوا ،،ومهند يتسهوك مع توأمه اسامة ،،اما اروي اختهم الصغيرة قاعدة جنب معاذ وساكتة اما معاذ شاد كتاب أجاثا كريستي ويقرا فيه ....
عبدوا انتبه لاروي قاعدة بروحها ناداها قاللها تعالي جت بحداه حط يده عل كتفها : خيرها خيتي بروحها
اروي ابتسمت : هكي معنديش شن اندير
عبدوا : هاهو اني قاعد هدرزي معاي ،،امم بما ان عطلة من القرايا وهكي ديري جدول يومي اكتبي فيهم الاساسيات لازم اطبقيهم في اليوم ،حاجات تستفيدي منهم زي متلا كل يوم تحفظي صفحة من القرآن، او تتعلمي حاجة في المطبخ بما انك متعرفيش اطيبي ،او تكتبي حاجة ولا تشدي كتابات المدرسة لانك شهادة اعدادية كل يوم تحفظي درس باش لما يكمل الحجر تكوني مستعدة ،ها شو رايك هكي تضيعي الكساد ونتحدوا اني وياك انديروا جدول واللي التزم فيه يحصل جائزة 😍
اروي مبسوطة : فكرتك حلوة ،بدل ما نضيعوا الوقت هكي وخلاص انطبقوا جدول يومي ،،اني موافقة عليه ونبدوا من غدوة 👍
وكملوا هدرزتهم .......
عبدوا فرحان انه فرّح اروي وهدرز معاها حس بشعور حلو كاين قبل ميهتمش بكل في خواته ولا يندري عليهم شي لكن توا اكتشف قيمة الاخت لما تهدرزي معاها 😘
اسامة : اوووه اروي الساكتة تهدرز مع النكدي غريبة
عبدوا شبح فيه 😒 : دمك ثقيل عل فكرة
مهند حرك ايديه بطريقة اضحك ودار عيونه حولة قال : تعال خففا دمه
كلهم ضحكوا لان لما قالها اضحك
اميمة : مش عارف علاش البرادة تجري في دمك مع ان شكلك جميل ميدلش عل البرادة
مهند : قولي غايرة مني لان احلي منك
أميمة شقمت فمها : وعلاش من غار اني متأكدة اني حلوة
مهند : اي اي 😐
الحاج علي يبتسم لصغاره
مهند : اوه الحاج يوزع في ابتسامات اشبح شن قتله امي امولة 😃
كلهم ضحكوا عدا امه امل حذفت عليه المخدة : تي تحشم علي وجهك شن الكلام هذا 😠
مهند ايدير في روحه بريئ : شن قلت اني استنسجت ابتسامات بوي بس
اسامة : تسحاب روحك تستنسج في الكيمياء
مهند : الله لايذكرك في الخير ذكرتني في النكد
امل شهقت : شن الدعاء هذا استغفر ربك فيسع
مهند : استغفر الله العظيم
علي : اني فرحان بكل هكي مقعمزين مع بعضكم اني فاقدها من الزمان الجمعة هذه و
ماشاء الله علي الوليداتي كبرتوا اول مرة نجتمعوا هكي ان شاء الله دوم يارب ..
مهند : اي والله بوي كبروا وتغيروا صغارك شوف شوف خويا معاذ دار شنابات وغلظ صوته كبر الفرخ 😂أمالا أميمة عقلت وبدت تهتم في روحها 😁😁 واروي الساكتة طلقت السانها وتهدرز
اسامة : امداير كراسة ملاحظات جديدة للعيلة امالا
اميمة : شن تشبح فيا قبل منهتمش في روحي ولا كنت مجنونة باش تقول عقلت
مهند : يا حنة قبل كنت ديما عراك مع اسامة كأنك ولد ،لكن توا مهبية ولحد الان متعاركتيش
وكنت تلبسي ديما في سراويل مشركة وجاكات ومشمرة ايديك كأنك ماشيا مصارعة لكن توا لابسة قونة وفانيليا هذا علاش استنتجت
اميمة 😒 : ماشاء لله عليك كلام دقيق
اما معاذ معطاشي اي اهمية لان يعتبر في كلامه تافه فميستحقش يرد 🤷‍♂️
عبدو وهو شاد النقال : توا طلعو خبر عقموا حوشكم بالديتول ولما تطلعوا البسوا كمامات
راهو احتمال تجي حالات عندنا
امل صبت : حي علينا نوضوا نوضوا ياصغاري نسيقوا الحوش بالديتول
مهند : تي لا ياربي ،،يا كلمة ردي في مكانك .تي خيرك يا عبدوا تقول هكي تو نسيقوا الحوش في هالليل 🤷‍♂️
امل : كان متبيش براحتك ،يلا يا بنات نشطوا رواحكم هي هي
اسامة : امي فيروزاتها نشطن 🤣🤣
ناضوا وتو المية والصابون وبدوا بالصالة مهند مشمر سروالة وشاد السطل اللي فيه المية ويزحلق مفشي فايدة بكل 🤦‍♂️
يسيق مع اميمة شادة حيلها تبي تكمل باش ترقد : يا كلب ( حشاكم ) تي هيا سيق قبل ما تمرض وانت تلعب
مهند رش عليها المية : تي غمي فمك ازعجتيني وانت عايشة دور سندريلا
اميمة : خزي
كملت تسييق ونشفت ارضية ،،اما مهند ياخد ويصور وينزل استوري في الفيس كاتب حالي في هالحجر زعم توا نخش عل جو التطييب عطوني رايكم حبايبي ،،
أميمة شبحت فيه بأسي 🤦‍♂️
اما في الدار عند اروي وعبدو واسامة وامل جميع كملو التسييق وقاعدين يردوا الحاجات في اماكنهن عبدو عايش الجو مع اروي يضحك ويعبيها بالمية وهي كذلك ..اما معاذ كالعادة مقعمز بروحة في الدار ويقرا في الروايات .......
في الصبح
كلهم راقدين من التعب ....الا مهند وامل وعلي مهند كاين طالع للمحل وتوا خش لوح الشكارة عند امه وقعمز متكنطي
امل : خيرك ياوليدي شن في متكنطي 😒
مهند يتكلم وهو منفعل : تعرف خشيت محل جارنا حسن بنشري شيشة كحول قالي الصغيرة 15 والكبيرة 25 غالية ،مديتلا دينار " اجني " قتلا عطيني حتي بخة بجني ،،مشي لزني من المحل ،،شن قلتلا اني
امه وبوه 🙄😐🤨😳
مهند : خير تشبحوا فيا هكي
امه شدت الشبشب : تي عدي يا تافه امتي بتبطل تفاهة وبرادة عدي
بوه شاد راسه : ربي يهديك وخلاص
مهند عدا وهو بجديات متكنطي
😂😂😂😂😂😂
ركب فوق لقي قباله اروي كيف نايضة من النوم تستني في اميمة في الحمام
مهند : صباح السكر يا سكر يامحلي جمالك يافرخة انتي احلي بنت في العالم ،،ريتي ريتي خير من اختك الطنجرة
اروي ☺️ : تسلم وانت صباح تفاحة يا احلي تفاهة
مهند : له له تعلمتي البرادة من عبدوا شابحك اني مخلطة عليه هلبا الايامات هذه
اروي 😆
طلعت اميمة والشعر منكوش 🤨 : خير نسمع فيك تتغزل في اختك واني تقرم عليا في صباح ربي
اروي : النفسية مقفلة اليوم
مهند 🤢 : تي خير شعرك منكوش هكي تقول زهرة عباد الشمس بالله المراية مشبحتهاش قدامك هي طول وعرض ،،،اظن ابليس طالع من حوشنا اليوم لما شبح شكلك 😁
أميمة : نياهاهاهاها زعميته تخفف في دمك
مهند : بجديات نتكلم اني ،،نصيحة مني توا مدام الحكاية حجر وعطلة مفروض تستفادي منها تهتمي بشعرك ،اديري قناعات ماسكات نعطيك طرق كان تبي ،لان بصراحة وجهك مستفز واضح
اميمة وهيا ماشيا للدار : نصيحتك حلوة واول نرة تقول حاجة باهية ،لكن مش حنطبق نصيحتك
###### شهد رزق
عند شخص تاني ( خوهم الكبير المتزوج اسمه محمد ومرته خولة وعنده 3 ليان ولؤي ولامار صغيرين )
محمد راقد في الفراش وشاد المخدة يغطي في اودانة من الدوشة
خولة في المطبخ حاطة السماعات وما تندري الله وين حاطها ..
اما الصغار قالبين الحوش كأن متفجر فيها قنبلة وامدايرين دوشة
محمد صبه من السرير متعصب ناوي عليهم بعد ما طفح الكيد : تعالوا يا ولاد الكلب تعالوا متخلوا واحد راقد شدهم من دبشهم كشخ عليهم وقاللهم تقعمزوا في التركينة ولا نفس 🤬🤬 سأل : وين امكم ماتندري عليك شن امدايرين
لؤي هذا الولد الكبير عمره 5سنين لسانه متبري منه 😂 طالع لعمامه : حط ايديه في خصره اولا قول وين مرتي تانيا ماما متندري علينا شنو انديروا حاطة السماعات في اودانها ومسكرة المطبخ واحنا خلتنا نلعبوا ، وانت ياحنه منطرح في الفراش راقد وهذه فرصة لينا باش نلعبوا بلبل باللمغاطي ومتاخدش منا ...
محمد فاتح فمه مصدوم في ولده كيف منفلت لسانه ،،شد من وذنه قاله تقعمز في مطراحك وحق ربي نلقيك متحرك تجيك طريحة فاهم ولا لا
ومشي للمطبخ لقاها اطيب في الفطور وحاطة سماعات كثف ايديه وقعد متفرج عليها ورافع حاجبه ،،قرفع الباب باش تنتبه
انخلعت خولة والتفتت : بسم الله خيرك ،،صباح الخير، ،ركزت في ملامح وجهه وكتمت ضحكتها
محمد معصب يتكلم ورافع ايديه : اني ياهمي شن امقايلك مش قتلك نبي هدوء في الصبح ولا لا متخلوش الواحد يتمرقد براحة بكل مسد توا مفيش طلوع ومقابلتكم 24 ساعة يعني مفيش راحة بكل ،،تجو ختي في النوم متخلونيش ،، وانت ياست فاتحة خشتك وحاطة سماعات وصغارك قالبين الحوش ماتندري عليهم ها ،،قولي شن اظيري حسستيني تعبي الطاولة فطور زي الاجانب عل الساعات يلي قاعدة فيهم في المطبخ ،،وانت ما مدايرة كان طاجين دحي بس 🤦‍♂️
يارب صبرني
كمل كلامه ،والضحكة يلي شادتها طلقتها : ههههههههههههه
محمد 😳 : قلت كلام ايضحك اني
خولة : والله مانندري حتي شن هههه تقول مركزة في شكلك بالله شوف شكلك ف المراية بالله هههه
محمد : ربي يثبت عليك العقل يارب ،اني نطلع من الحوش خيرلي
خولة 😁 : راك تنسي الشمالات والحليب
محمد : ياااااااارب عفوك ورضاااااااك
خدي مفاتيخة وطلع بيمشي لحوش اهله خيرلا يكمل نومه
ويتبع #####
للكاتبة شهد رزق
وميض البرق .......