كورونا الليبية 🦠

حلقة الاولي

#البارت_1 من ج2
#روايةكورونا_الليبية_الجزء_الثاني
#شهد_رزق
وعدنا لكم من جديد 😍
ان شاء الله قاعدين تتذكروا في الاحداث
هي نبدوا
~~~~~~~~~~~~~~~~~~
قبل عيد الاضحي بأسبوع في شهر 7
مقمزين الشباب في الزنقة معاهم مهند واسامه ياكلوا في سامينسا واللي يبصر ويلي يلعب بوبجي ويلي يهدرز ...مهند متكي عل الحيط مش عارف شن بيدير ....مر من جنبهم ولد صغير هكي امتاع جو سابع وتامن وعنده شنابات شبحلهم من فوق للوطة ومشي ....
مهند انفلق ضحك : غير تعال تعال شني الشبحة هذه زي شبحة بوعجيلة غير باشوية علينا 😂😂 ....
اسامة 😁 : واضح فرخ صغير تعالا سلم ولدي شني تبي سامينسا
تكلم الولد : لا منبيش خليه ليكم
مهند بصوت العزايز : امالا شن تبي مصاصة 🙂
الجماعة لي معاه ضحكوا بصوت عالي
الولد تنرفز : راكم تمشوا تصلو المغرب اذن بدل تسهويكم الزايد
اسامة : شني انت بديرلنا الاقامة بتصلي بينا 🙂 تي برا روح شن دخلك بينا جاي تعلم فينا
الصلعة صاحبهم : زعميته دار شنابات بدي يسترجل
مهند : شكلا امه قبل ما يطلع موصياته ينصح كل حد يمر بحداه اي اي صح يلا شبيبة عنده الحق نوضو شكلا بيصلي بينا ...
الولد هز راسه ومشي : تستهوك انت ..ربي يهدي مفرخ صياع
احمد صاحبهم ناض بيجبده من سوريته : شني تقول عاود عاود مني المفرخ الصايع تعرف كلامك شن معناه
مهند وقفه : خلاص يا راجل عيل صغير فوته مدوراش ...اشر للولد فوت فوت
مشي الولد للجامع ...
مهند قعد يفكر ..: اي حقا اذن المغرب مصليناش نوضو نوضو نعبدو ربي عيب علينا كبار بشناباتنا قاعدين منصلوش
الصلعة 😂 : لا شوفو من يتكلم مهند التافه يتكلم عل صلاة قعمز قعمز متوليش شيخ علينا من امتي تتكلم عل الدين
مهند شبح فيه 😒 : عادي توا تبت وبديت نتكلم عل الدين فيها شي 🙂 ...
احمد : مهند وتاب 😂😂 طق باليد هو والصلعة .....
مهند واسي تصبايته : وعادي شن فيها كلنا نرجعو ونتوبوا لربي لا فيها عيب لا حرام علاش تسهويك
احمد : قصدك تدوي بجديات من امتي تدوي بجديات انت
مهند 🙄 : لا باعميات شني رايك... توا بديت نتكلم بجديات في مانع
الصلعة : تي بالله فوتنا يا راجل قعمز قعمز نلعبو كارطة
اسامه 😤 : اني من بداية ساكت راكم تتكلمو عل دين ربي راه استغفر الله علاش هازيين عليه وكان تاب وبدل ما تقول نمشو نصلوا تقول نلعب خزي ماه انتم فروخ صياع ضايعين حتي طريق ربي ما تعرفوها بالله تعال يا خوي فوتهم مش لينا هادم تو يفسدونا .. كر مهند ومشو للسيارة
الصلعة هز راسه: تي فوتهم هادم العويلة شافو عيل تمرجل عليهم بدوا يتمرجلوا العب العب كارطة سيورهم يرجعوا لينا
احمد: اي اي . وكملو لعب 🤷‍♀️🤷‍♀️ ...
في سيارة مهند يسوق واسامه يحكي : ريت ريت كيف هازيين قتلك من الاول هادم مينفعوناش عل قولة معاذ
مهند: تي مدورهمش يا راجل
اسامة : اي صح .....امم اي حقا من امتي تدوي جديات انت 😂 بصراحة انصدمت
مهند 😌🙂 :ماه قلت خلي نجرب جديات شوي وجربت الشعور حتي انت اتقنت الدور صحة ليك
اسامة 😁😁 : اي اي والله خاطري ندير معاهم دعكة الفروخ هادم مدرهيلي كبدي زي المزيتات وع نسونجيين
مهند : تعرف تدوي تقول اختك اميمة 😂
اسامة : مفيش حاجة اضحك فوت فوت عل الجامع وانت كل شي واخدة بالضحك
مهند شبحلا عل الجنب 😒 : تمام شد حزامك هي ....وشد الفرينو وبأعلي سرعة انطلق لين دار غبرة ...لين اسامه شد الباب بصراخ : تي لا يا فرخ بطل منبيش انموت مزال ..
ومهند يضحك ويزيد في السرعة : استمتع بحياتك استمتااااااااااااااااع ويشدها يسطرب عل الجنب وكمل طريقه واسامه يعيط عليه بالشوية وهذاكا لا حياة لمن تنادي ..........