أَقْنِعَة مُزَيَفَة

{•••5•••}

إحسان:سامحوني على الروتار
راحت قعدت فبلاصتها بعيدة عليهم كامل و تسيي تتحاشا نظراتهم  فتحت الملف موراها و مازال أنيس يشوف ليها
أنيس:أنا قتلك أقعدي !؟؟
شافت ليه إحسان حشمت باسكو كامل شافو ليها و خافت فنفس الوقت منو  عاودت ناضت من بلاصتها و هبطت راسها
إحسان:سمحلي ما كنتش عارفة
أنيس: c'est ta dernière fois !!! (دور راسو و عاود بدا يقرا فالدوسي
هزت راسها إحسان و قاعدة تستنا فيه باه يقولها أقعدي
حس بيها مزالت واقفة دار شاف ليها من الفوق لتحت و أشارلها تقعد
أنيس:قسم العلاقات الخارجية واش درتو فيها
حطت قدامو الدوسي إحسان
إحسان:تفاهمنا مع 25 centres commerciaux ف4 بلدان تفاهمنا على التطبيق عجبهم المشروع و وقعو العقد بقات برك نروحو و نبداو بالخدمة
أنيس: و وقتاش نروحو!!؟
إحسان:بون الخدمة لازملها على الأقل شهر من رايي نديرو لكل بلاد ڨروب يشد الخدمة  باه في شهر نكملوا كامل الخدمة و قادرين نبداو السمانة الجاية
سكت أنيس ماهدر والو و كان يشوف فالدوسي حاجة ما خاصة دارت كلش  أدق التفاصيل و عملت عليهم ،كمل قرا الدوسي غلقو و ناض
أنيس:نمدلك خدمة نتي!!
إحسان ؛ أنا!؟؟؟ ولات تشير لروحها بصبعها و تخزر فلي يخدمو معاها
أنيس:وي نتي!! لي ڨروب نتيا ديريهم أهتمي بكلش لهاذ لي ڨروب الإقامة الأكل الترونسبور كلش و ديري فبالك أنا كل سمانة راني نروح نزور ڨروب ونشوف كيفاه ماشية الخدمة !! و نتيا لازم تكوني مع ڨروب من هذو تروحي معاهم
إحسان: داكور !!
غلق الكوستيم تاعو و خرج خلاها
ناضت إحسان رايحة لبيرو تاعها صونا تيلي تاعها لقاتها صونيا اللي تخدم عندهم
إحسان:ألو
صونيا:ألو إحسان بنتي 😭😭
حبست إحسان فبلاصتها :طاطا صونيا واش كاين!؟؟
صونيا؛خوك خوك!!
إحسان :وش بيه
صونيا:جا يحوس على الدراهم ما حبيتش نمدلو قلب الدار و راهو غير يعيط و يخرب حتى يماك و طيحها مالكرسي رانا خايفين
إحسان:راني جاية ما تخافوش
راحت إلحسان لبيروها جابت صاكها و خرجت ركبت فطونوبيلتها قلعت لدارهم
وصلت نزلت مالطونوبيل خلات الباب محلول و الطونوبيل مشعولة و دخلت تجري خوها ماهوش فوعي تاعو
حلت الباب صابت الدنيا مقلوبة و خوها يعيط مالشومبرة تاعو و يسب طلعت تجري الشومبرة يماها لقاتها مغلوقة
إحسان:ماما!!!ماما
صونيا: إحسان بنتي جيتي!؟
فتحتلها الباب
إحسان:كيفاه راهي يما!؟؟(شافتها متكسلة فوق للبونك)
صونيا راهي مليحة مديتلها دواها و راهي راقدة روحي شوفي خوك
إحسان:تسمعي واش تسمعي ماتخليش يما وحدها أغلقي الباب و بلاكي تجي
راحت إحسان لشومبرة خوها وقفت عند الباب خايفة تدخل
فتحت الباب بلعقل لقاتو قاعد فوسط الزجاج تع المراية و داير راسو بين يديه
إحسان:إسلام!!!
رفد راسو إسلام شاف لختو عينيه حمورا بدا يضحك
إسلا: هههههه راهي جات لالة إحسان جيتي تمديلي دراهم بسك خلاص راسي رايح يطرطق مانيش قادر
بدا شاد راسو
ناض ليها وقف قدامها
إسلام:هيا مديلي دراهم!!!؟
إحسان:ماعنديش و ما نمدلكش
دار إسلام ولا يضرب فراسو بيديه :راسي راسي راسيييي!!
دار ليها حكمها من خمارها
إسلام:حطي ر* الدراهم دوكا راسي رايح يطرطڨ
إحسان:قتلك ماعنديش باه نمدلك
إسلام:واقيلا راكي تخدمي باطل
إحسان:آحح !نحي يدك ضريتني !! ني نخدم على الدوا تع ماما و عليك نتا ني خدمة ني والو غير الكاشيات و نخدم على ذي الدار
إسلام؛مراحليش فيك مديلي دراهم
و بدا يضرب فيها
شدها من شعرها من بعد ما بان من تحت خيمارها بسبة الضرب  طاحو نواضرها
إسلام:وين راهم الدراهمممممم!؟؟
إحسان:قتلك ماعنديش
خبطلها راسها على الحيط حتى ولا يسيل الدم طلقها طاحت فالأرض دخل عليها يضرب فيها لكرشها برجليه كسرلها نواضرها عفسة عليهم
راح لشومبرتها حوس على الدراهم ما لقاش بصح لقا الذهب داه و راح و هي بقات مقيوسة فشومبرتها
شافت صونيا مالتاقة بلي إسلام خرج راحت تجري لإحسان لقاتها تسيي تنوض عاونتها داتها لشومبرتها كسلتها و صونيا تبكي على حالتها طول حياتها و هي تعاني