#شرف قيد التنفيذ (أثال)

البارت الثامن عشر

#بقلم
#ايزابيل
#البارت الثامن عشر
#شرف قيد التنفيذ (أثال)
..
أثال

ماعرف شسوي وشتصرف احس تبنجت واكفه بمكاني
ارجف واباوع على أمي الي فاتحه عيونهه وبؤبؤ عينهه مثبت عليه كأنهه تباوعلي او بألاصح تستنجد بيه ..

احس شريط المواقف المؤلمه كلهه نعاد كدامي رغم ماتعبانه ولا راكضه بس صدري يلهث وروحي جمرت ..

من غير احساس ركضت بتجاه امي على بالي اسحبهه من الموت الزمهه ماخليهه تعوفني وتروح ..

اجيت اتزحلك بالزاهي لان مطشر بكل مكان بس تماسكت كعدت بصفهه ولزمت ايدهه ضليت اضرب على خدهه ضربات خفيفه تمنيت ملك الموت يشوف دموعي بلكي ينحسب يعوفهه لبنتهه الماعندهه غيرهه ..

بلعت ريكي ومسحت دموعي لتفتت لابوي واكف يخابر
اتوقع يخابر الأسعاف صحت بوجهه :- لك امييي راح تموت شسوووويت الهه راح تعوفنييي ،،

اجه ليمي دفعني من يمهه وشال راسهه الي مدمه خلى بحضنه ويمسح الدم ..

دقايق وسمعنه صوت الأسعاف ابوي شالهه وركض بيهه اني على كعدتي ابجي من كل كلبي اباوع على دمهه الي بالكاع وروحي تفور ياربي دخيلك لاتفجعني بأامي ...

دخلو الجيران ونترس البيت بيهم اجن البنات جوارينه
كعدن بصفي وحاولن يهدني

:- اش اش أثال نشاءلله مابيهه شيء لاتخافين ،

ضربت على وجهي توقعت هالشيء راح يريحني من ارسم حزني وتعبني بضربات على وجهي ..

كلبي ضل يم امي وصورتهه وهي مدمايه بعدهه ببالي
خطيه نسوان المنطقه كلهن لتمن عليه ويحاولن يهدني ..

كومني من المطبخ للصاله كعدني على التخم وشربني مي رغم بروده المي بس ماسحيتهه لامست ولو شعره من النار الي واجه بيه ..

ضحكت على نفسي
اليشوفني مايصدك الي احجيله يتعجب
ب18 سنه اني جاريت 100 سنه تعب ليكدام
ولكم والله ماشفت من الدنيا شيء حلو ليش هيج اتجازه اجيت اشوف امي المتلفهه الشوفتهه أنوب
توكع ودمهه يسبحهه كدامي ليش هيج ياربي ليش ..

ضميت وجهي بين كفوف اديه وابجي بشهكه ونحيب احس الصرخات تزرف كلبي وتطلع من كل اعماقي ..

دموعي حرفن طريقهن غير عن العاده ..
حسيت بأيد تربت على كتفي رفعت راسي شفتهه ام ميسون جوارينه سحبت راسي وخلته على صدرهه ..
ضمتني بشيلتهه وتكلي :- لاتبجين يمه نشاءلله امج تطلع بخير وسلامه بس ادعيلهه ..

حسيت كلماتهه على الجرح دفنت راسي بصدرهه وابجي واصرخ بقوه جسمي النحيل كله يهتز
شراين ايدي وركبتي البارزه تلونت بعصبيتي وقهري ..

حتاجيت شخص يسندني بهالحضه شخص يطمني
يوكف بجانبي شخص ينطيني جرعه توكفني على حيلي ركضت من مكاني للغرفه ادور على الموبايل بخبال لكيته وومن دون تردد دكيت على عمار ..