#دمعة_فرح 1
مجاهد يوسف
بعد ما خلص عاصم الجامعة والخدمة واستلم شهاداتو بقى عاطل ساي وشايل الشهادة ولافي بيها ما خلى ليهو باب ما دقاهو ونهائي ما لقى شغل واكان عندو خالو في السعودية مقيم هناك بي اولادو من بدري سلوى ام عاصم شايفة ولدها تعبان من العطال والشقاء والجري وراء الوظيفة وما لاقي شغل قالت ليهو بكرة من الصباح بكلم ليك محمد خالك يشوف ليك عقد عمل هناك في السعودية احسن ليك من الجهجهة دي هنا وعلى الاقل تنفع نفسك واخوانك وتساعد ابوك دا المعيشة بقت صعبة عليهو براهو والهموم مغرقاهو خلتو يهضرب نايم ويناهد حايم وما قصر تب فيكم رباكم وكبركم وعلمكم والدور عليك تشد حيلك وتسندو ،
عاصم وعيونو مزرزرة الدمع يرقرق فوقها زي رهاب الصي قال ليها انا يا امي كل يوم بمرق من الصباح بحوم بكرعي ساكت افتش للشغل بدون فايدة لمن قررت انسى شهاداتي ديل واخش السوق من بكرة اداقش امكن رزقي فيهو
قالت اصبر بعد انشوف خالك باكر من الصباح بكلمو وهو ما بقصر لو في طريقة
عاصم دا كبير امو وابوهو وعندهم تلاتة بنات اصغر منو منى وهدى وسهى والحتالة ولد مسمنو عامر وابوهم علي شغال حداد في المنطقة الصناعية ومصر يعلم اولادو احسن تعليم وعاصم الوحيد الاتخرج درس اقتصاد ولد محترم خلاس ومؤدب ،
في ونسة عاصم وامو ابوهو جاء داخل من الشغل تعبان قعد شوية وقام استحمى وغير وجاء قعد يتونس معاهم وسلوى كلمتو انها دايرة تكلم اخوها محمد بعاصم اكان يشوف ليهو عقد عمل في السعودية وعلي سكت مسافة ومطا خشمو وشتح عيونو وقال ليها خير وسكت
عاصم ما ارتاح من حركة ابوهو لانو ما بعرف خالو كويس وشافو مرة واحدة بس وزمان لمن كان صغير وكت خالو جاء لوفاة حبوبتو ام امو وما قعد كتير
الصباح عاصم ما مرق يفتش للشغل واصلا اليوم زاتو أكان جمعة ابوهو برضو قاعد في البيت وسلوى اتصلت علي محمد اخوها وقال ليها تمام ما في مشكلة بشتري ليهو اقامة على الاقل ينفعكم وينفع نفسو
وجرت فرحانة صحت عاصم من النوم بشرتو بكلام خالو وقضى اليوم داك مبسوووط
عاصم عندو عمو عمر ساكن في حي ما بعيد منهم وبريد عاصم دا ريدة شديدة وعاصم زاتو بريدو وطوالي بمشي ليهم
عمو عمر عندو بتين ماجدة وعايدة وولد واحد صغير قدر عامر اسمو ماجد وعاصم بحب الكبيرة ماجدة حب شديد ومعروفين من صغار هم لبعض
بعد العصر عاصم مشى ليهم وكلم ماجدة بخبر سفرو السعودية قالت ليهو والله ما عارفة اقول ليك شنو لا عارفة افرح عشان مستقبلك وللا عارفة ابكي على فراقك
قال ليها افرحي ها العويرة دي دا مستقبلنا ما مستقبلي براي
وبعد تلات يوم عاصم شايل شهاداتو ويفتش جاهو اتصال من السعودية وطلع من خالو بعد سلم عليهو سألو عن دراستو وقال ليهو خلاس العقد جاهز واليوم بعمل ليك التوكيل اديني بس رقم مكتب ،
عاصم جرى المكاتب واتفق مع مكتب رسل رقمو لخالو وقال بكرة بمشي يطلع جوازو
جاء البيت فرحان ومبسوط كلم امو وطوالي زغردت فرحت ليهو فرح شديد وجرى ناس عمو عشان يكلم ماجدة ، لقى عمو عمر قاعد وعاصم اكان مبسوط شديد كلم عمو وعمو ابتسم ابتسامة صفراء وعمل حركة قريبة من حركة ابوهو لمن عرف انو ماشي لخالو وقال ليهو ربنا يوفقك آ ولدي
وعاصم اكان من الفرحة الدنيا ولا سايعاهو لكن حركة ابوهو وعمو دي ما فهمها وكلم ماجدة وجرى جاب ليهو حلاوة وزعها ليهم وفات بيتهم
ماجدة قالت لابوها ما عجبك سفر عاصم دا وللا شنو؟
ابوها قال ليها السفر ما كعب وربنا يوفقو ويكفيهو شر خالو محمد دا لانو ما فيهو خير ولا بعمل حاجة لوجه الله
يتبع ...
