#دمعة_فرح11
مجاهد يوسف
دخل خال عاصم البيت ولقى عاصم في المجلس يبكي واولادو داقنو دقة صاح ويبكي ساي قاعد في الكرسي ووشو مورم ومخرش بالضفور ونخريو يكبن في الدم
_عاصم؟ دا شنو دا والجابك هنا شنو؟
_جيت أشيل شنطتي ودي مرتك واولادك
كورك لسامي ولامي جاتو امهم قال ليها الاولاد وينن؟
جوا داخلين وقفتهم وراها وقالت ليهو الاولاد اخدوا حقهم منو وزي ما دقاهم دقوهو قال لكن هو ما دقاهم كدا
قالت والله لو ما البلد دي فيها سيف وقصاص اكان كتلتو ليك بيدي دي الكريه امشوا يا اولاد غرفكم وانت طلع لي الوسخ دا من بيتي
خالو قال ليها حاضر
واتلفت علي عاصم قال ليو قوم ارح ومعليش
قال ليهو داير شهاداتي عند مرتك دي
قال ليها اديهو شهاداتو قالت ليهو ما شفتهن ودا شبه شهادات دا ؟ اسمع يا ولد هوي تاني بيتي دا ما تجيهو ولا توريني خلقتك القبيحة دي
خالو قال ليهو يللا ارح علي البقالة وانا بحل ليك كل المشاكل دي انا خالك وانت ود أختي ولا اقول ليك خلينا للصباح امسح العملوهو دا في وشي وهداهو وسكتو
عاصم اول مرة يحس بحنية خالو وما عندو اي حل غير يسمع كلامو دخل الحمام استحمى وغير هدومو وخالو قال ليهو ما تشيل هم ديل برضو اخوانك وانا هسي بجيبهم يعتذروا ليك كلهم
ومشى علي مرتو بهناك قال ليها عارفة لو عاصم دا مشى الشرطة بحصل شنو ؟ والله انتي زاتك بسجنوك الا هو يسامح ولو طالب بتعويض اقل حاجة بياخد ليهو عشرين ألف في الكفوف بس والبلد دي ما هاملة ساي وانا فكرت اوديهو لكن هو بعرف حاج اللمين جارنا الزمان ابو الطيب وداك من زمان داير ينتقم مني من زمن أكلنا حقو فالولد دا اكان ما بقى كويس من هنا ما بطردو لاننا بنتورط يللا نعتذر ليو ونصبر عليهو يومين بعدها انا بطردو طردة كلب
قالت ليهو يومين بس
قال ليها يومين بس احسن من يجهجهنا في الشرطة
خالو جاب اولادو واعتذروا ليهو وفاتوا منو وخلوهو مرمي في المجلس زي الأجرب زول بدخل عليهو مافي بعد تلاتة اربعة يوم بقى كويس وخالو في الايام دي قدر يحنكو واقنعو يرجع البقالة ويشتغل عشان الهندي أكان براهو ما لقى ليهو عامل يشغلو معاهو وقال لعاصم اشتغل واتصل السودان للشهادات ولمن يرسلوا ليك شهاداتك من هناك انا بشغلك محاسب في شركتنا
عاصم قال ليهو انا داير امشي العمرة قال ليهو جدن تمشي طوالي وساقو مكاتب العمرة قطع ليهو تذكرة البصات كلها مية ريال ماشي وجاي وبسكنها جمب الحرم
عاصم مشى مكة والمدينة عمر وزار النبي عليه الصلاة والسلام وكلم اهلو ورسل ليهم الصور وجاء من هناك مبسووط
ورجع البقالة وقال لاهلو شهاداتو راحات منو عشان يطلعوا ليهو بدل فاقد ومشى ابوهو وعمو طلعوهن ورسلوهن ليهو بالمطار والزول الجابن معاهو اتصل علي خالو مشى استلمن ودساهن عندو في المكتب قال ليهو قدمت ليك بيهن في شركتنا اول . وساقو الشركة عمل ليهو معاينة وهمية مع موظف صاحبو متفق معاهو واداهو صورة من عقد وهمي راتب ستة ألف وسيارة وبدل سكن وقال ليهو بعلمك السواقة كمان وح تشتغل وتنزل تتزوج وتجيب اولادك هنا وامك وابوك زاتهم تجيبهم زيارة وملاهو اوهام لمن خلاهو يضحك سن سن
عاصم شغال مع الهندي عامل ومعنوياتو مرتفعة واول شهر خالو ابى يخصم منو وشابكو ليك ود أختي الكلس عافي منك آ ود أختي وجاري بيهو هواء وهو المغيب مصدق وبقى يحترمو شديد ومشى كلم ابو الطيب بكل شي وابو الطيب قال ليهو سبحان الله مغير الاحوال مع انو ضنب الكلب ما بنعدل لكن ما بنتمنى الا حالك ينصلح وخالك ينفضح
وعاصم قعد يضحك وقال ليهو والله خالي اتغير شديد يا ابوي والدليل بقى ما بخصم مني وانا هسي جبت ليك الألف الشلتو منك قال ليهو انا ما طالبك شي وانت زي الطيب ولدي دا خلي قروشك معاك او اديهن الطيب يحولن لاهلك وابى يشيلهن منو وعاصم اداهن الطيب حولن لابوهو
لمن كمل الشهرين وخشى في التالت عاصم قال لخالو ناس الشركة ما اتصلوا علي قال ليهو انت داخل بواسطتي وفي محاسبين شغالين عقدم قرب يخلص تاني ما عاوزين يجددوا ليهم اصبر بس
قال خير
خالو مشى الشركة وعندو سعودي صاحبو جابو معاهو البقالة لعاصم والسعودي سلم علي عاصم وقال ليهو انا المدير التنفيذي وعندي شغل حق محاسبة عاوزك تشتغلو لي ودي آخر معاينة وبعدها التوظيف
قال ليهو جدا وخالو عندو لابتوب قدييييم جابو ليهو ووهمو بالشغل دا عشان يحسسو بإنو جادي والمسكين مصدق كضب خالو لمن تمت السنة كل مرة يديهو كضبة ومرات يسوقو معاهو الشركة يدخلو مكتب فخم يقول ليهو دا ح يكون مكتبك
تمت السنة وعاصم شغال عامل في البقالة وتعبان في الفاضي شهر خالو يخصم وشهر يديهو ألف يرسلو لاهلو بعد السنة عاصم ابيض وقرش ما عندو عايش على امل وهمي وخالو امورو سالكة وظابطة وشغلو ماشي
يتبع....
