#دمعة_فرح (١٠)
بقلم مجاهد يوسف
عاصم شعر بجية خالو قبل علي الحيطة واتحسس السكين خلاها في المتناول تحت اللحاف وخالو دخل وقال ليهو قوم يا حيوان ولا اتلفت عليهو قال ليهو داير شنو يا محمد
_أنا قلت ليك قوم علي حيلك ومحمد دي شنو كمان
_اسمك منو ما محمد ؟
خالو جراهو من يدو وقال ليهو انا بتكلم معاك ولمن انا اتكلم معاك تقوم علي حيلك عاصم قام ولا عاين في وشو قال ليهو نعم وخالو طاخ كفتو عاصم ولا كضب مشى قفل الباب وجاء طلع السكين وقال ليهو الكف دا مشيتو ليك لكن لو راجل وقنعان من حياتك مد يدك تاني
_ والله عال يا ود علي الحداد داير تكتل خالك
_ ما خالي ولا بتشرف انك تكون خالي وتاني ما تجيب اسم ابوي دا في خشمك
_نفس لماضة ابوك وخلقتو والاتنين كريهين وما تقول انا خايف من سكينك دي والله أكتلك بيها
ولوى يدو شال منو السكين واداهو كفين وقال ليهو داقي الاولاد ديل مالك؟
قلوا ادبهم علي ودقيتهم وانت دقيتني برا سبب
_انا دقيتك لانك حرامي
_انا ما حرامي ولو عشان الالف الرسلتو لابوي اداني ليهو حاج اللمين ابو الطيب ودا موبايلو اسألوا
_ وانت بتعرف ابو الطيب من وين يا كلب وتشيل منو قروش علي اي اساس وقلت ليهو عني شنو
_ ما قلت ليهو شي براهو اداني ليهو سلف ما شلتو ساي
_والله عملت ليك دريبات آ ود علي الحداد ، يعني الالف ما سرقتو ؟
_أسرق شنو انا لو داير اسرق ما جيتك تذلني كدا
_طيب قوم علي شغلك وبنتفاهم
_انا ما داير شغل وقروشك دي بمشي اشتغل محاسب كلها اربعة خمسة شهور وبتاخدها كلها
_دا كلام ابو الطيب والله لكن فتحت يللا اطلع من هنا وامشي ليهو خليهو يشغلك ما اشوفك هنا تاني
عاصم طلع وشعر بالحرية حس كأنو كان شايل جبل من الهموم وانزاحت مرق ومن الفرحة قعد ينطط واصلو ما متوقع اتخارج من خالو بالسهولة دي ، من شدة الفرح قرب يرجع لخالو ويعتذر ليهو ويرضيهو مشى وصل بيت حاج اللمين في دقايق بس ولا كان مصدق انو بقى فري
لاقى الطيب وكلمو وكان مبسوووط والطيب قال ليهو احسن حاجة عملتها انك انفكيت من خالك الفقر دا بلا مشاكل وجاء حاج اللمين وقال ليهو اقامتك معاك وشهاداتك ؟
قال ليهو ما معاي الاقامة في الغرفة لكن الشهادات في الشنطة في بيت خالي
قال ليهو امشي مع الطيب جيب اقامتك مشوا الغرفة ما لقاها سأل الهندي قال ليهو مافي معلوم وعرف انو خالو شالها معاهو طوالي اتصل عليهو
_ ألو يا خال معاك عاصم
_ عاصم منو ؟
_عاصم ود أختك
_ ما عندي ود أخت اسمو عاصم ولا بتشرف أكون خالك
_ما مشكلة بس انا داير الاقامة والشهادات
_ما عندي وتاني ما تدق علي
وقفل الخط في وشو ومشى عاصم كلم حاج اللمين قال ليهو لازم تجيبهن منو وامشي ليهو في البيت لو ما اداك الاقامة شوف كفيلك وين
عاصم طوالي بعد المغرب مشى بيت خالو طلع فوق ودق الجرس فتحتو فاتن وكانت عارفة كل شي قالت ليهو أهلا يا عاصم اتفضل اتفضل لمن عاصم استغرب دي مالها الليلة طيبة كدا قال ليها خالي في ؟ قالت ليهو موجود يعني انا ما خالتك خش خش
دخل عاصم وراسو ضارب ومندهش ومستغرب دخل في المجلس وقالت ليهو دقيقة بس وخالك بجيك ولقى شنطتو زي ماهي فتحها ولقى شهاداتو كلها موجودة قبل يدخلها في الشنطة دخلت فاتن ومعاها سامي ولامي وايمن ولموا فيهو ضرب جد وشرطت ليهو شهاداتو كلها ودقوهو دقة لمن قرب يموت قالت ليهم يللا خلوهو وشالت الشهادات مشت حرقتها
يتبع....
