#دمعة_فرح (٢)
مجاهد يوسف
عاصم رغم فرحتو الكبيرة بالسفر بس شايف ابوهو ما كان متحمس شديد وكلم امو قال ليها ابوي دا ما راضي بسفري دا وللا شنو؟
قالت ليهو احتمال عشان واجعاهو فرقتك ساي وهو اصلا قلبو حنين لكن حوجتك للشغل ومستقبلك القدامك بصبرنو.
اليوم التاني عاصم مشى المكتب لقى عقد العمل وصل ومشى لابوهو كان داسي ليهو حبة قريشات كدا اداهن ليهو كلهن بس ما كفنو وقال ليهو انا بتصرف وعمو كمان ما قصر معاهو برضو اداهو وطلع الجواز وعمل باقي الاجراءات كلها مافي شي فاضل غير حق المكتب والتذاكر وما عندهم ولا قرش
رجع البيت قال لامو كلمي لي خالي يدعمنا بأي حاجة وبعد انا امشي هناك واشتغل برجعن ليهو
امو قالت ليهو انا بتصرف وكان عندها خاتم دهب وحلق ادتن ليهو مشى باعهن ما عملن شي قام براهو دق لمحمد خالو ووراهو الظروف وخالو قال ليهو انت تأمر أمر والغالي كلو يرخص ليك يا ابني
كلامو دا فرح بيهو عاصم فرح شديد وجاء كلم امو قال ليها والله خالي دا طلع راجل تمام شديد آ يمة وزول حبوب خلاس دقيت عليهو قبيل وطوالي اتصل علي عشان ما يخسرني رصيد وسألني باقي ليك شنو قلت ليهو التذاكر وشوية حاجات كدا بسيطة قال برسل لي ألف ريال سعودي وكمان قال بقطع التذكرة هو وبرسلها من هناك
امو ضحكت ليها ضحكة كدا برضو ما عجبتو لانها لمن عاصم طلع اتصلت علي خالو قبالو وخالو نهرها وقال ليها ما عندي قروش
معقول اتغير فجأة كدا وفي نفس اليوم ؟
محمد فعلا عمل بكلامو مع عاصم ورسل لعاصم الالف ريال والتذكرة ودا انتهى من كل شي وبقى زول سفر بس
قال يقعد ليهو اسبوعين مع اهلو وبعدن يسافر وكان كل يوم بمشي بيت عمو عمر ويقعد مع ماجدة يتونسوا ويبنوا في الاحلام وح نعمل ونسوي ويكون عندنا وعندنا وووو
احلام وآمال عريضة خلاس وكل مرة وهو بتكلم معاها يقول ليها تتذكري ايام شايل شهاداتي وجاري افتش للشغل ؟ والله احمد الله الما لقيت لي شغل في البلد الفقر دي وكنت حاسس بعدم التوفيق دا بتجي حاجة بعدو تفتحها علينا كلنا واصلو املي ما خاب . ما قاعد اقول ليك ( سوف تصفو الليالي بعد كدرتها ..)
اهو خلاس بدت تصفو وانا يا ماجدة ما بطول هناك وحأجيك طاير فوق براق أبيض في ليلة صافية وهااادية وألقى النسيم يداعب في خصلات شعرك وتلوحي لي بإيديك وانزل زي الطيف وآخدك ونطوف فوق السحاب ونلامس بيدينا النجوم ونتوهط جمب القمر والقمرة تتوارى منك خجلانه لمن تشوف عينيك
ماجدة ضحكت وقالت ليهو اعمل حسابك شديد يا عاصم الغربة مرة والسفر قطعة عذاب واهلك بعاينوا ليك ولسة دايرين منك كتير لازم تبر عمي وامك ديل اول حاجة وتسعدهم
قال ليها دي اهم حاجة وانا عندي منو غيرهم وغيرك انتي
واخد قعدتو وفات
قبل ما يسافر بيومين ابوهو ناداهو وقال ليهو اسمع انا ما تقول فرحان بسفرك دا بالعكس ما دايرك تفارقني لحظة مع انك بقيت راجل وقدامك مستقبلك فالدايرو منك تبقى راجل وتحترم نفسك وتحترم كل الناس عشان يحترموك وما تتهاون في صلاتك وخليك قدوة حسنة للناس بأخلاقك وتعاملك معاهم ونحن ما تشيل همنا نهائي بس انفع نفسك وما عايزك ترسل لينا قروش كل شهر عايزك بس تبقى عشرة علي مالك وحقك وانا لو احتجت لحاجة وللا انعصرت في شي ضروري وشديد بدق عليك ياكا ولدي الكبير وسندي البسندني لو الزمن جار بي والشي التاني الدايرو منك خالك دا زمان اكان بيني وبينو مشاكل كتيرة والزمن احتمال يكون حلاها والايام نستو زي ما نستني لكن ما تعتمد عليهو كتير ولا تديهو حقك ولا توريهو سرك وهو ما كعب ولا بدور اكرهك في خالك بس دايرك تكون حريص وحريص شديد
عاصم قال ليهو ان شاء الله يا ابوي ما بتشوف ولا بتسمع عني الا البرضي الله ويرضيك ، بس انا والله داير لي منك حاجة واحدة عشان امشي مرتاح انك تكون راضي عني وعافي لي ودي اهم حاجة وتاني في حاجة صغيرونة وهي ماجدة بت عمي عمر انا بحبها وبتحبني وبعد ما اموري توضح وهي تتخرج دايرك تخطبها لي
ابوهو قال ليهو خير وانا وعمك عارفين كل شي والفيها الخير الله يسويها
آخر يوم لعاصم قبل ما يسافر جاء عمو عمر ومعاهو اولادو اتعشوا معاهو وعملوا ليهم جلسة وداع ظريفة وعاصم صورهم كلهم فيديو بموبايلو وكل زول قال ليهو كلمة ولمن جاء دور ماجدة أبت تتكلم لكن هو قال ليها لازم لازم انتي اهم زول وكلهم قالوا ليها لازم تسجلي كلمة
قالت ليهو ربنا يسهل امرك ويرد غربتك ولمن ليالي الغربة عليك تطول وتتعكر وتتكدر اتذكر دايما انها ...
وسكتت مساااافة وعاينت ليهو وعاصم قال ليها سوف تصفو.....
يتبع...
