دمعة_فرح 7
مجاهد يوسف
دخلوا سامي وايمن يتضاحكوا وخلوا صاحبنا عاصم دا مغبون وقافلة معاهو من خالو ومن مرة خالو ومن اهلو كلهم مشى البقالة والهندي قعد ينهر فيهو ويتفاصح قام بزهجو دي قبقب الهندي وقرب يرشو بنية لكن اتمالك اعصابو وكانو في زباين حجزوهو ومشى دخل الغرفة وشغل الجوال واتصل علي ماجدة وحكى ليها كل الحاصل بالتفصيل الممل
قالت ليهو في حاجة في نفس خالك دا او مشكلة مع ابوك او امك أكيد
قال ليها ابوي كلمني انو كانت في مشاكل بيناتهم لكن انا ذنبي شنو؟ بس ما مشكلة وكويس اني عرفت حقيقتو من اول شهر وقال ليها كلامي دا كأنو ما قلتو ليك وانا بعرف اتصرف كيف معاهو
طلع من الغرفة بعد غير ملابسو وفات ويشيل ويعاين للوحات في الشوارع لمن عتر في اللوحة الزرقاء الطويلة المكتوب فيها بالابيض للتموين الغذائي
دخل لقى ليهو شاب سوداني بشوش سلم عليهو سلام حار وقبل ما يسألو الشاب مشى علي التلاجة جاب ليهو بارد وموية
عاصم قال ليهو ما داير والله
داك قال لا حرم تشرب
قال ليهو انا اخوك عاصم علي
قال انا علي حسن اسمي زي اسم ابوك واتونسوا شوية وعاصم سألو من حاج اللمين والطيب ولدو
قال ليهو بعرفهم بالحيل والطيب دا قبل شوية أكان معاي هنا لكن ابوهو دا بكون في الشغل وطلع جوالو اتصل علي الطيب قال ليهو معاي زول بسأل عنك ودايرك هاك ليهو
_ألو الطيب كيف حالك ياخ
_أهلا وسهلا معاي منو ؟
_معاك عاصم بتتذكرني ؟
_عاصم عاصم ، عاصم صديق ؟
_لا لا ياخي عاصم علي لو بتتذكر قبل شهر وشوية كدا قابلتك وجيت معاك البيت وانت وصلتني بيت خالي محمد ابو سامي
_أيوااااا عرفتك ازيك يا رجل
_والله تمام بس دايرك والله ضروري انت في البيت ؟
_ ايوة في البيت ودقيقتين بس بجيك
_لا لا انا البجيك عشان داير اسلم علي الوالد والوالدة برضو
_اوكي منتظرك خلي علي حسن يوريك الباب عشان ما تروح تاني ههههههه
_ههههههه لا لا بقيت خبرة انا
عاصم قال ما بمشي يدو فاضية مشى فتح التلاجة وشال ليهو اتنين عصير كبير وبيبسي وسڤن حجم عايلي وعلي دخلن في كيس وعاصم طلع المية وخمسة عشرين الما عندو غيرها
علي قال ليهو الحساب واصل دخل قروشك في جيبك
وعاصم قال ليهو مستحيل وبخليهن في محلهن وبفوت
قال ليو حرم قرش ما تدفعو وحرم تشيلهن معاك ، عاصم سكت مساااافة وشكر علي شديد ودخل قروشو وفات للطيب في البيت
الطيب فتح الباب وسلم عليهو سلام حار ودخل معاهو ودا شنو الجبتو دا وليه مكلف نفسك كدا عاصم قال ليهو والله قلت ما بجي يدي فاضية وعلي طلع اكرم مني حلف ما يشيل ريال ودخلوا المجلس اتونسوا شوية وجات ام الطيب مرة حنينة خلاس وطيبة الدنيا كلها فيها وسلامها وكلامها وصوتها حنييين يخش جوة القلب ويتحكر ومن شافها شاف فيها امو وهي التقول عرفتو قلدتو قلدة الأم الرؤوم وشم فيها ريحة امو الاول مرة في حياتو يفارقها وقعد يبكي لمن الطيب بقى يهدي فيهو في اللحظة ديك جاء حاج اللمين داخل لقاهو يبكي ويتنهف وزاد الطين بلة برضو حضنو حضن حاااار التقول موصى عليهو وعاصم قعد يجعر التقول مات ليهو زول اكان محروم واكان كايس حضن يحتويهو ويد تربت عليهو فوق كتفو وبقوا في الطريقة التسكتو لمن الطيب احتار وحاج اللمين غمز للطيب واشر ليو خليهو خليهو وعاصم اخد بكيتو والبكية دي ريحتو شدييييد وسكت بعد زمن وحكى ليهم العملو معاهو خالو بالتفصيل ما خلى حاجة
حاج اللمين قال ليهو والله يا ولدي اسأل عمتك دي اول ما طلعت كلمتها قلت ليها خالو دا كلب وما فيهو خير وانا بعرفو من بدري مثل معاي دور مافي داعي اذكرو لكن زول كعب وما فيهو فايدة وربنا يعينك بس عليهو
_والله يا عمي اللمين انا من اول يوم شفتكم حسيت اني زي البعرفكم واتمنيتك لو كنت خالي لكن الزول ما بيدو يختار اهلو
_مافي مشكلة يا ولدي هسي نحن اهلك وما تشيل هم
_والله بشكر الله اني اليوم داك ضهبت من البيت ولاقيت الطيب اخوي دا وجيت معاهو لاقيتكم
_كل شي مقدر ولحكمة ونحن زاتنا من الليلة بنعتبرك زي الطيب وواحد
قعد معاهم لمن اتغدى وقال ليهم انا الكبسة كرهتها ما بعرف اطبخ والهندي كتلني بالرز وملاح الشطة اول مرة آكل لي أكل سمح من جيت
حاج اللمين قال ليهو بعد تصلي العصر امشي علي شغلك واصبر وحاول ألقى ليك مع خالك دا حل براحة براحة ولو دايرني اتدخل بتدخل لكن انا من زمان بعدت منو وخايف اكلمو بقوم اتعبك زيادة
عاصم قال ليهو انا بصبر ليهو شوية لكن ما بسكت ليهو
حاج اللمين اداهو رقمو وقال ليهو شيل رقم الطيب ونحن يا ولديما بنخليك وبيتنا مفتوح ليك في اي وكت دق علي الطيب يجيك يجيبك واداهو ألف ريال قال ليهو رسلو لابوك عاصم ابى لكن حاج اللمين قال ليهو بعدين رجعو لي براحتك حتى شالو والطيب قال ليهو انا بعرف واحد بسلمهم سريع سجل ليهو رقم ابوهو وشال الالف وطلعوا مشوا البقالة والطيب في الطريق قال ليهو بحول الألف وبتصل عليك
نزل عاصم في البقالة وروحو المعنوية في السماء ومبسوووط
يتبع....
