#دمعة_فرح 3
مجاهد يوسف
عاصم ما نام الليل كلو ويفكر ساااي في يوم بكرة لمن يجي مارق من البيت وكيف بودع امو وابوهو واخواتو واخوهو ودي اول مرة في حياتو ح يبعد منهم كدا وما عارف اللحظة دي ح تعدي كيف وهو قبل تحين متجرس منها
البيت كلو نام الا هو مشى المطبخ فتح التلاجة شرب ليهو موية لقى ليهو كستر جابو اكلو چت واتصل علي ماجدة
_إنت لسة صاحي ؟
_هو انا بجيني نوم ؟
_نوم نوم عشان ما تمشي لناس خالك ديل تعبان وتنوم ليهم هناك
_والله قدر ما حاولت مافي كلو كلو ومتجرس من لحظة الوداع ولي مراد امرق هسي امشي يصحوا يلقوني مافي
_المفارق عينو قوية ما تشيل هم الوداع ساي لحظة وح تعدي سريع
_يعني هسي بكرة انا ما ح أشوفك؟
_بكرة بس ؟
_ما عارف انا والله لسة ما مستوعب حكاية الغربة اول حاجة جات سريعة شديد زي التقول الاقدار مودياني لحاجة مقدرة ما معروفة شنو
_دي اوهام وساوس ساي ما تختها في راسك
_والله نقول ربنا يسهل بس لكن في شي كل ما اقول اتفاءل ألقاهو زي الطيف العابر وبكدر المزاج
_عاصم تصبح على خير نوم نوم
_وانتي من اهلو
الاقلاع الساعة عشرة والحضور من ستة صباحا وامو قامت بدري سوت الشاي وعملت ليهو فطور سريع جات لقت عاصم لابس وجاهز وعندو هاندباك صغيرة سوداء دخل فيها غياراتو وفتح الجيب اتأكد من جوازو وتذكرتو وعمو عمر جاء عشان يوصلو المطار وراكب في العربية حقتو ابى ينزل ويدق في البوري وعاصم ودع امو واخوانو وابوهو سريع سريع وكلهم قعدوا يبكوا بس هو ما بكى وكان مستعجل داير يتخارج وبس
ركب مع عمو وعمو طوالي فات ولا انتظر ابوهو يجي وصلوا المطار وعمو اداهو قروش قال ديل رسوم المغادرة عارفك ناسيهن يللا ادخل وأبقى عشرة قبل يدخل رجع حضن عمو وبرضو ما بكى وقال ليهو ماجدة يا ابوي
قال ليهو عارف عارف بس انت شد حيلك وما اوصيك ويللا تاني بقول ليك أبقى عشرة
دخل عاصم المطار وكمل اجراءاتو وانتظر لمن جاء وقت الاقلاع وكل امورو ظابطة وطارت بيهو الطيارة
وصل الرياض وبعد عمل اجراءات الدخول الساعة بقت اتنين وطلع من المطار ما بعرف خالو كويس وخالو زاتو ما جاء المطار رسل ليهو ولدو الكبير سامي وسامي ساق معاهو واحد صاحبو اسمو ايمن والاتنين ما بعرفوا عاصم
والناس كانوا كتيرين وعاصم فتش لخالو كلو كلو ما لقاهو بس لقى ليهو اتنين شباب واقفين يتضاحكوا ساي قال ليهم لو سمحتو ممكن تدقوا لي الرقم دا واحد منهم اداهو موبايلو دق رقم خالو ظهر ليهو الاسم الحاج
قفل الخط وسأل الولد الرقم دا محفوظ عندك باسم الحاج قال ليهو ايوة الحاج دا ابوي انت عاصم موش ؟
قال ايوة انا عاصم وسامي ضحك مع ايمن وقال ليهو انا سامي ود خالك ودا ايمن صاحبي وسلموا عليهو سلام بارد وقال ليهو ارح ارح المواقف
عاصم كان داير يسلم عليهو بالحضن وياخد ليهو حبة بكية قطعها ليهو في راسو
نزلوا المواقف وركبوا العربية وسامي وايمن آخر ونسة والهلال والنصر والريال والبرشا وشارع التحلية وماسكين موبايلاتهم والواتس والفيس واليوتيوب ولا كأنو عاصم معاهم
عاصم اتنحنح واتنحنح وقال ليهو خالي كيف ؟ سامي قال ليهو دقايق بس وبنصل البيت وتشوفو كيف ولا زاد كلامو
شعر مفلفل وتي شيرت كيف كيف وبنطلون ناصل وسجارة وراء سجارة وايمن اخير سامي ومافي فرق كبير لابس ليهو برمودا وفنيلة مانشستر سيتي وسفنجة وعامل ليهو دقينة رقيقووونة زري درب النمل وحلاقة أخير اسكت
وصلوا البيت والغريبة خالو سلم عليهو سلام حار شديد لمن كيفو وعاصم بكى وسألو من امو واخوانو ونهائي ما جاب سيرة ابوهو لمن عاصم قال ليهو وابوي يسلم عليك كتير خالو قال ايوااا واخد ليهو ضحيكة كدا ما سمحة وقال ليهو علي الحداد كيف هو كويس ؟ وطوالي غير الحديث كورك لي ولدو وقعد يتكلم عن ولدو وقام فات
عاصم بالرغم من انو سلام خالو دا كيفو لكن حس بالغربة من قولة تيت
يتبع....
