قصه قمر

البارت1

#رواسي الصبر
#قصه قمر

دخلنا سنه 1990 والكل يتمنى عام سعيد وخير مديد .بعد ان اكلت الحرب العراقيه الايرانيه خيره الرجال والشباب .وتركت هواي يتامى وارامل وامهات ثكلى. يروحن كل ليله جمعه ويشعلن الشموع والبخور ويكعدن على الشط. ويبجن وينوحن عليهم .يتخيلك منظر كطيور النوارس وطير
الططوه يحوم فوكهن ويصيح وهنه يغبكنه بديهن البريئة ويتطيرن منه .
بكاء وانين وحزن طويل واحنا البنات نؤمل هاي السنه على خير ...
.
محمد بحظني يلعب وسهيده كل شوي وتاخذه وتروح بيه وتفتر بيه وي ام جميل .
واني بعدني حزينه على سميره وجدي الشيخ.
جميل كبرته المحن والصعاب صار زلمه خشنه ...

بس من يختلي بيه.يصير شاب يجر كل احزاني بكلامه الطيب ويحجي شعر ومرات يشاقيني
ودوم يباوعلي بعيون كلها إعجاب وحب وحنان
يخليني احس تجاهه بالتقصير ...

قرر جميل بعد ماصار عدنا هواي فلوس
يبني لكل وحده من اخواته بيت جبير ويكمل تاثيثه ....
كالي لازم نطيهن حقهن من سوم كاع ابوهن
راح جمعهن وكعدهن بالهول
واشوفهن شلون يباوعله كابوهن .تعجبت منهم لايقرون ولايكتبون ولايشوفون من الدنيا بس الشمس والحيطان
بس تعاملهن وي جميل تعامل كله حب واحترام
ماقبلن ياخذن فلس منه.وكامن يبجن ...

حربيه.بعد كلبي يخوي. شمالنه محتازات و عنده رجولتنا وخوش عيشه معيشينا واصلا همه دللوننا وانت تحس بنفسك بالتقصير .لايخوي مامقبوله منك وكامت تبجي
عكبت خيرية.شسوي بالحوش وام ثامر كلساعه ودكلي يمه رايحه للسوك شجيبلج وياي وكل روحه وجايبتلي حاجه واتخجلني واسكت
فخريه. شنو تبني حوش .تريدني اعوف الحجي وحده .كلما يطب يصيحلي بويه جيبي السلبجه وحضري مصلاتي ومن يخلص يكعدني يمه ويسولف وياي .والله مرات من يتأخر اكعد بالباب وزوجي يتخبل مني

منتظرته وانوب تريدني افاركهم
جميل ضاج. ولجن هذا من سوم ابوجن وأريد ابري ذمتي
حربيه .يييح .شمالك تصيح علينا يخوي .كتلك مرتاحات
جميل .زعلت منجن .تردني واني ابن البدويه
بجن البنات وامهم دله. تباوعلهن وتكمل مغزلها
ولجن راضن اخوجن .ليش تحركن كلبه
واني متعجبه وساكته .واسمع عن ناس تتكاتل على الورث حتى لو خرابه 50 متر
وهذوله جدامي يتعاركن بالترك ومايقبلن ياخذن حجاره
قررت اسحبه للغرفه واجاني ومعصب
جميل .وتالي وياهن. يردن اخوهن ..

كعدته عل الجربايه وادري اعصابه ..حجيت وياه بهدوء..
قمر .خليهن يروحن .وانته اشتري كاع يم عيالهن .وابنيها اربع بيوت كون متراصفات سوه وباسمهن سوه. وكمل اغراضهن .وبعد راح يرضون بالأمر الواقع ...
مااحس الا باسني براسي ضحكت منه ..دومه هيج ولا يتغير
.
جميل .انتي صدك كمر. راح اشوف خالج نمرق هو خوش مقاول ومهندس
وطلع جميل

دكتور ثامر ..

شفت من حربيه وأخواتها .شلون الحور العين
تفاصيلهن وطيبتهن ومعاملتهن وي الكل وانوب يركضن لنبع الحنان مايخلنها تشيل طاسه ...