யாதுமாகி நின்றவள் (முடிந்தது)

part 4

பாகம் 4

"அம்மா நான் முன் சீட்டில் உட்காரட்டுமா?" அபியை பார்த்து கொண்டு மஹாவிடம் கேட்டாள், யாழினி.

"ஓ...தாராளமா" என்றார் மஹா.

"நான் அவர்கிட்ட முக்கியமா ஒன்னு கேட்கணும்"

அபியும், மஹாவும் ஒருவரை ஒருவர் பார்த்துகொண்டனர். மஹா தலையசைக்க முன் சீட்டில், அபியின் பக்கத்தில் அமர்ந்து கொண்டாள் யாழினி.

"சீட் பெல்ட்" என்று கூறிய அபியை குழப்பமாக பார்த்தாள் யாழினி.

"உன்னோட சீட் பெல்டை போட சொன்னேன்"

யாழினி தன்னை சீட் பெல்டுடன் பிணைத்துக்கொண்டாள்.

அபி, காரை ஸ்டார்ட் செய்தான்.

"இது யாரோட கார்?" யாழினி கேட்டாள்.

"என்னோடது தான்"

"உங்களோட கார வேற யார்கிட்டயாவது கொடுத்திருந்திங்களா?"

"இல்ல. எனக்கு என்னோட பொருளை வேற யாரும் தொட்றது பிடிக்காது"

"ஒரு கார் மேல இவ்வளவு பொசசிவ்நெஸ்ஸா?"

"காரோ, ரிலேஷன்ஷிப்போ, எனக்கு எல்லாமே ஒன்னு தான். காருக்கே இவ்ளோ பொசசிவ்நெஸ்ன்னா, ரிலேஷன்ஷிப் பத்தி நான் சொல்ல வேண்டியது இல்லைன்னு நினைக்குறேன்."

அவன் ஆணித்தரமாகக் கூறியது, அவளை லேசாக கலக்கித்தான் விட்டது. இந்த இடத்தில், இந்த விளக்கதிற்கு என்ன தேவை என அவளுக்கு புரியவில்லை.

"நேத்து நைட்டு, இந்த காரை, எங்க வீட்டு பக்கத்துல நான் பார்த்தேன்"

ரியர் வியூ மிரர் மூலமாக மகாவை பார்த்தான் அபி. தனக்கு எதுவும் தெரியாது என்பது போல் தலையசைத்தார் மகா.

"இருக்கலாம். நான் அடிக்கடி அந்த பக்கம் வருவேன்"

சாதாரணமாக கூறினான்.

"என்னோட பெஸ்ட் ஃபிரெண்டா இருந்துகிட்டு, என்னை வந்து பார்க்கனும்னு உங்களுக்கு தோணலையா?"

அபிக்கு என்ன பதில் கூறுவது என்று தெரியவில்லை. அதேநேரம், யாழினி, ஏன் இதைக் கேட்டாள் என்பது அவளுக்கும் புரியவில்லை.