وعد 🥀 ( روايات ليبية )

حلقة 1 🥀 " اللقاء الاول "

رواية #وعد .......حلقة 1
بقلم : #أحمد_عبدالله ،،،،،،،،" اللقاء الاول "
.
" أصعب شيء في حياتنا غدر الاهل ، وطعنهم لنا. ولا خير في خلٍ يخون خليله ويلقاه من بعد المودة بالجفا "
.
" وعد ؛ و ما ادراك ما وعد "
( بنت في احدى مستشفيات الامراض العقلية )
.
أحمد : قبل سنة و اول يوم لي في هذه المستشفي و وسط كل الحالات المريضة نفسيآ لفتت نضري بنت اسمها ✨ وعد ✨ بنت ذات عيون لونها متل لون السماء ، ذات شعر حريري ، بيضة كالبن ، تأملت في عيونها لاكتشف حزن عميق و جرح كبير داخلها ، حاولت ان أبتسم لها 
و لكن نضراتها كان كلها صدمة و حزن ،، يوم و راء يوم و انا احاول التقرب منها و اتمني ان تفتح قلبها لي ، و لكن كانت تبتعد عني ،، أتمني ان تتحدث ولو بكلمة واحدة لي "
" وعد ستكون مشروع كبير و مغامرة في مهنتي " من اقوال دكتور أحمد الجويلدي في كتابه
.
( بعد الكلام هذا بدي دكتور أحمد يدور في اوراق حالة وعد و لقي انها ليس لها علاقة بلمرض النفسي ابدا و تأكد اكتر لما سمع كلمة المديرة لما قالتله الحالة هادي فوتها ، لكن شغفه كان كبير و حاول بكل الطرق ان يوصل ليها و يكلمها و للاسف للان وعد رافضة )
.
📍 مستشفي الرازي ، قسم النساء ، عنبر 6
ممرضة : وعد ، هيا وقت الاستراحة
وعد : ( طلعت من العنبر للجردينة و قعمزت و قدامي كان الدكتور يلي كل يوم يشوف و يتأمل فيا ، خاطري نعرف شن يبي مني ، خايفة نتكلم معاه ، معش عندي تقة في حد في المكان هذا )
( نضت من قدامه و خشيت لمطعم المستشفي )
مريم : وعد تعالي يا وعد
وعد : 👁👁😊
( قربت علي مريم و قعمزت في جنبها )
مريم :خيرك وعد فيه شي
وعد : ( شفتلها و قمت صبعي علي الدكتور و هو مقعمز في الجردينة )
مريم : خيره دكتور أحمد معاك
وعد : ( درت حركة بأيدي علي فمي بمعني انه حابب يتكلم معاي )
مريم : هو حابب يتكلم معاك
وعد : ( هزيت راسي بمعني ايه )
مريم : عادي تكلمي معاه
وعد : ( درت إشارة بصبعي بمعني لا )
مريم ؛ ليش يا وعد ، وعد حبيبتي دكتور أحمد مرات يقدر يساعدك ، تكلمي معاه يا وعد و احكي معاه و رح يلقالك حل ، ما تخافيش
وعد : ( شفتلها بخوف )
مريم : عارفة حبيبتي انك خايفة بس مش كل يلي في المستشفي زي بعض و دكتور أحمد انسان كويس و يساعد في هلبا حالات ،
وعد : ( نزلت راسي )
مريم : وعد اني حاسة بيك ، و عارفة انك خايفة و عارفة شن يصير ليك في المستشفي هادي و عارفة ان المديرة تضرب فيك بلكهرباء ، بس جربي تكلمي معاه ، و رد بالك تصدقي انك بكوشة او ما تعرفيش تتكلمي ، اني سامعة صوتك اول ما جيتي قبل 15 سنين ، فا حاولي انك تتكلمي معاه
.
( مريم : ممرضة في المستشفي ، و اقرب وحدة لوعد )
وعد : ( فكرت في كلام مريم و قلت نجرب و مش رح نخسر شي )
✨ و في يوم ✨
( طلعت الصبح من الدار للجردينة و اني نفطر و هو قدامي اشرتله بأيدي )
( ناض دكتور احمد يجري و قعمز بحداها )
( قعدت نشوفله و يشوفلي )
احمد : اشرتي بأيدك يعني بتتكلمي
وعد : 👁👁
احمد ؛ اني و اللهي نبي نساعدك
وعد : ( وخرت السفرة من ايدي و شديت ايده و نضت )
( رفعته و قعمزت اني و ياه في اخر كرسي في الجردينة متع المستشفي )
أحمد : توا بتتكلمي ، تكلمي حتي بلاشارة اني نفهم
وعد : شفتله و قلت ✨ انا ✨
أحمد : ( شافلي بصدمة ) انتي تتكلمي
وعد : 👁👁
( شد ايدي ) حي هذا صوتك
وعد ( نضت )
( شد ايدي )
أحمد : خلاص خلاص اخر مرة ، تكلمي نسمع فيك
وعد : 👁👁
( رجعت قعمزت )
وعد : تجي معاي للغرفة متعي
أحمد : 😳 به وينها الغرفة
( شديت ايده )
( رفعته معاي ) ( دخلته للدار )
.
🔥 ادارة المستشفي 🔥
مروة ؛ يا دكتورة يا دكتورة
نوال : شن فيه
مروة : دكتور أحمد خش مع وعد لدارها
نوال : شني و ليش
مروة : مش عارفة بس هو ليه فترة حاطها في راسه
نوال : هذا يبي يخربلي بيتي و يلعب مع بنت بيت المال
.
وعد : ( دخلته و قعمزته في الدار و اعطيته صور )
أحمد : 👁👁 هذه صور اني نبي نسمع منك انتي القصة
وعد : ( شفتله ) و شن ضمنك اني عاقلة و كل يلي نقوله حقيقة
أحمد : أني متاكد انك عاقلة  
.
وعد : ( بديت نحكي )
✨ الرجوع الي الماضي ✨
( عيلة بيت المال ، جلال بيت المال اكبر تاجر خيول في ليبيا ، ربي ما رزقاش الا ببنت و سماها وعد ، جلال عنده اخ اسمه ( علي ) عنده 3 ولاد و بنت ، و للاسف معتمد علي جلال في كل شي )
( حفلة كبيرة في قصر بيت المال ، نساء و رجال )
( بوي كل فترة و فترة لازم يدير عزومة ، بس المرة هادي كانت مختلفة ، حب بوي ان يقسم الورث بما انه الله ما رزقاش بولاد ، و قرر ان يكتب 70 ‎%‎ من املاكه ليا ، و 30‎%‎ لعمي ، الليلة هادي ما مشتش علي خير ابدا و هيا يلي غيرت مجري حياتنا )
،
( مجمع الرجالة )
علي : شفت عمك الحمار
ياسر ( ولد علي ) : هذه إهانة ليك يا بوي
علي ؛ باهي شن بنقوله ، نقوله ما تكتبش الفلوس لبنتك و اعطيهملي اني ،
خيري : اني مقهور ، فلوسنا بتاخدهم بنت و تبدا تحكم فينا
علي : عمك هبل خلاص
.
( مجمع النساوين )
( في الصالة و نساوين العيلة كلها موجودة )
نهلة ( بنت علي ) : خلاص الموضوع انتهي ، الفلوس كلها مشت للحيوانة هادي و راجلها ، و خوتي ما حصلوا شي
نجوي ( مرت علي ) شوفيها القح،،ة خلاص عاد بتبدا تحكم فينا زي ما تبي
( نزلت من الدروج و اعطيت ولدي ( انس ) للشغالة و قعمزت )
وحدة من المعزومات ؛ هذا ورث بوك و حافظي عليه يا وعد و رد بالك تبيعي الخيل ابدا
وعد : من غير ما توصي عمتي ، انا و عمي و ولاد عمي بأذن الله حنحافظوا عليه
نجوي : 😒
نهلة : 🙁
.
( مجمع الرجالة )
واحد من المعزومين ؛ شن خطر عليك يا جلال تقسم الورث من تو
جلال ( بو وعد )  : تعرف انت الدنيا فيها حياة و موت و الحق نبي نصفي دمتي و نعطي كل حد حقه ،
واحد من المعزومين : باين عليك تحب راجل بنتك
جلال : وليد راجل كويس و ينشد بيه الضهر
...
( انتهت الليلة )
( و بعد ما روحوا كل المعازيم و فضي الحوش قعد الا عمي علي و ولاده و قعدوا يستنوا في بوي لين سقد الناس و خش )
( اول ما خش شده عمي من ايده و دخله للمكتب و بديت نسمع في صوت الدوشة )
( انا و راجلي كنا في الدور التاني بس نشوفوا و نسمعوا من الدروج )
.
( في المكتب )
علي : انت هبلت يا جلال تكتب كل املاكك بأسم بنتك و راجلها ، حلال علي الغريب و حرام علي خوك ، ضحكت عليا كل الناس
جلال : ايه حرام عليك انت و ولادك و حلال عليه
علي : 👁👁🔥انت شن تقول
جلال : زي ما سمعت ، حلال علي الولد يلي صان بنتي ، حلال علي يلي ما خنبنيش ، حلال علي ما طعنيش من وراء ضهري ، حلال علي أمنته علي فلوسي و بنتي و صان الامانة ، و حرام فيك انت و ولادك ، انت عمرك ما كنت خوي يا علي ، انت عرفتني لما حسيت اني بنموت ، خنبتني و طعنت فيا من ضهري و خليت ولادك يغشوني وانت عارف ، لانك يا علي تعودت انك تاخد كل شي علي الجاهز ، اتكالي في كل شي ، انت كانك خوي راهو ما خليتش ولادك يخنبوا 4 خيول عندي قبل المسابقة بشهر
علي : قتلك مش ولادي
جلال : الكاميرا تكذب يا علي ، اني عطيتك 30 في المية من فلوسي يلي تعبت فيهم و شقيت ، و الباقي من حق بنتي و الراجل يلي وقف معاي
علي : هذا كلامك
جلال : الباب و معش نبي نشوف وجهك ، حقك و خديته و يوم عزاي تعالا خود العزي و بارك الله فيك
.
وعد : 👁👁 ( لما سمعت الكلام هذا عرفت ان بوي اعلن عليا الحرب مع عمي و ولاده ، و خفت علي راجلي و كرهت الفلوس )
،
( بعد الليلة هادي نزلت الصبح و قعدت ندهور مع بوي في اسطبل الخيل )
وعد : خيرك بابا
جلال : ما خيرني شي ، شوفي يا بنتي رد بالك تنسي وعد
وعد : وعد المهرة صح
جلال : ايه صح ، هدي مهرتك ، بأسمك و تعرفي غلاتها في قلبي
وعد : هذه في عيوني يا عيوني
جلال : ربي يحفظك يا بنتي و يبعد عليك كل شر يارب ،
( باسني في راسي )
جلال : نبيك تحافظي علي كل يلي بنيته يا وعد
وعد : من غير ما تقول يا بوي
جلال : وعد علمي انس الخيل
وعد : خيرك بابا حبيبي ، انت بأذن الله حتعلمه و يتربي علي ايدك
جلال : 😌 ان شاء الله يا بنتي ، اني زوجتك صغيرة عشان تبني اسرة و نموت و انا مرتاح . شفتي السرايا  هذه  يا بنتي
وعد : 👁👁 خيرها
جلال : هذه بنيتها طوبة طوبة ، نبيك تعيشي فيها انتي و عيالك و زوجك و ما تطلعيش منها الا و انتي ميتة
وعد : بابا فيك شي
جلال : اني نقولك و كلامي هذا خليه حلق في ودنك ، رد بالك تأمني لحد حتي لو كان من عيلتك ، لان الكل يا وعد يبي يهد يلي بنيته ، انتي رح تتصدي ليهم حتي لو بنت انتي ارجل منهم و قوتك بالله
.
( الكلام هذا ، كان زي وداع يقولي فيه بوي ، و من مش حاسة ، و في نفس هذا اليوم و الساعة 12 رنت الساعة يلي في وسط الحوش ، كان بوي عند يلي خالقه ، ترك ليا حرب انا و راجلي مع ناس ما فيش في قلبها رحمة ابدا ، ترك ليا فلوس و املاك و لكن خايفة منها ، خايفة من طمع الناس ، خايفة من عيونهم )
.
( درت عزاء و انطوت صفحة الحزن ، نضرة عمي و ولاده في عزاء بوي لراجلي للان في عيني ، نضرت مرت عمي و بنتها للان في عيني و في قلبي نقول " يارب سترك " )
.
( بدت خطة عمي في الانتقام و بدي يخطط هو و ولاده )
( و الخطة كانت ان ينقب قبر بوي و يبصمه ، وصلت بيه ان يطلع خوه من القبر )
.
أحمد : وكيف عرفتي
وعد : واحد قالي و شفت حتي القبر ، و للاسف لما قلتله اشهد معش لقيته
المهم و اتفق هو و وحدة من الشغالات انها تخنب الاوراق من عندي ، و فاجئني في يوم ان جايب مقاول و يساوم في اسطبل الخيل )
.
وعد : اهلا بيك يا عمي
علي : اهلين
وعد : شن فيه ان شاء الله خير
علي : لا شي غير جاي بنبيع الاسطبل و بنغيره باسبطل عادي خير من الغالي هذا
وعد : و علي ما اظن يا علي ان هذا مش من حقك
علي : انتي جاية تعلميني حقي و مش حقي ، هذا رزقي
وعد : رزقك عارفه و عارفينه كل الناس . برا اسأل
( مدلي ورقة )
علي : بوك كتبلي كل هذا بأسمي قبل ما يموت
وعد : امتا قبل ليلة المشكلة . عمي الاوراق عندي و كل شي موتق و الناس كلها عارفة ،
علي : اني قلت يلي عندي و قولي للغزال راجلك الشركات يلي مقعمز فيها و مربع ، يطلع خير ما نوريه الوجه التاني
.
( بعد ما سمعت الكلام هذا خديته بضحكة و إستهزاء و كلمت الامن متع الحديقة ان يلزهم )
.
( بدوا ولاد عمي يجوا للشركة و يقعمزوا فيها و يشوف فيهم راجلي و ساكت )
.
( و في يوم جي و جايب معاه الامن و هد عليا ، و بلفعل شدوني الشرطة و قالولي ان هذا رزق عمك و لما قدمت الاوراق قالولي مزورة و لما كلمت المحامي يلي كان شاهد ما لقيتاش و قالولي سافر و لما كلمت الشهود و الناس ما باش حد يوقف معاي ، بديت نحس بلخطر ، بديت نحس ان كل شي بدي يضيع مني ، خليتله كل شي و بديت ندور في محامين شاطرين و يلي سمع بيه تعاقد معاي يمشي يرشيه )
.
( و في يوم روحت و لقيت ولدي قعمز بروحه و راجلي للان ما روحش ، قلبي نقبض عليا حسيت ان فيه شي )
( قعدت 3 ايام و اني ندور و في الاخير مشيت لحوش عمي )
.
( طق الباب )
ياسر : مني
وعد : افتح
( فتح الباب )
( وقفت في الصالة و بديت نعيط )
وعد : يا علي راجلي وين ، راجلي وين ، وين رفعتوه
ياسر : انتي شن تقولي
خيري : هادي خيرها
نهلة : نقصي صوتك نقصي
علي : ( يكلم فيا من الدور التاني ) راجلك مش عندي اطلعي برا
نجوي : زي ما سمعتي برا
وعد : بنطلع لكن راجعة ، و حسابكم معاي بعدين
.
و انا طالعة وصلت للحوش وفجاء سمعت تليفون يرن و قالولي ان فيه حالة يبوك تتعرفي عليها ، وصلت للمستشفي و شفته ، شفت راجلي محروق ، ميت  💔 اللحظة هادي وقفت بيا الدنيا حسيت اني بروحي )
.
( راجلي دار عركة معاهم في الشركة و هو طالع دار حادت مع حافلة كبيرة و لما جي التحقيق قالولي ان الحافلة متعمدة الحادت و الجتة ليها 3 ايام في المستشفي )
.
( عرفت ان هما من داروا هكي و المرة الجاية اني ، مشيت طقيت علي كل حوش ، تنازلت لصغير و كبير نبيهم يشهودا معاي ، نبيهم يقولوا كلام بوي ، نبي حقي و حق ولدي و حق راجلي ، و للاسف ما فيش حد وقف معاي حتي من خولاي و خالتي ، حتي من صاحبتي )
،
( و في يوم و اني طالعة لقيت عمي راكب خيل بوي و و ولاد عمي مقعمزين في الارض ، دمي غلي ، مشيت نجري للمسدس و رفعته عليه. و حلفت اني بنقتله ، و طلقت عليه الرصاصة و للاسف جت في خيل ، شدوني و بلغوا فيا و قالوا اني قتلت بوي و زورت اوراق الاملاك و حاولت قتل عمي و شهدوا كل العيلة اني مريضة نفسية و غمضت عين فتحت عين لقيت روحي هني و هذا طبعا بمساعدة صاحب عمي يلي يشتغلوا في المستشفي  )
( و للاسف لاني بنت و لاني ضعيفة كلوا حقي ، حتي الناس ما رحمتنيش ، حرموني من ولدي 15 سنة ، و قتلوا ولدي و اتهموني بأني مريضة ، و هذه قصتي )
.
أحمد : 👁👁🥺🔥 خيرك ما تكلمتيش قبل هكي
وعد : الانسان الطبيعي كان ضحك قالوا مهبول ، و كان بكي قالوا مختل و كان شكي قالوا كذاب و كان شكر قالوا مغرور ، فضلت السكون و خليتهم يقولوا ( معقدة )
أحمد : و ولدك
وعد : ولدي توا عمره 18 سنة ، خليته عمره 3 سنين ، مش عارفة هل حي او ميت هل شبعان او جعان ، هل في حوش او في الشارع ، اني نبيك تشوف ولدي ، تشوف هل هو كويس او لا ،
( شديت ايده )
وعد : ( نبكي بلعبرة ) اني معش نبي فلوس ، نبي ولدي نبي انس
،
أحمد : عندك عنوان حوشك
وعد : استنا
( نضت نجري جبتهوله )
وعد : هذا العنوان ، كان تبي تساعدني شوف انس و طمني عليه ، 💔
أحمد : انتي عاقلة و حنتبت انك عاقلة بلاوراق يلي عندي ، بس ما تقولي لحد حتي لمديرة المستشفي
وعد : ( هزت راسها بمعني حاضر )
.
( قرر الدكتور احمد بعد ما سمع كل هذا من وعد ان يكلم وزارة الصحة و يبعت كل اوراق وعد للجنة و قرر ان يمشي للقصر و يخش يهدرز عليهم و يقوللهم ان بنت عمكم صحيحة و رح تطلع من المستشفي قريب )
.
( وصل يتفاجئ بسراية كبيرة و خيل في كل مكان و شغالين و خدم )
( خش احمد للحوش و قعمز في وحدة من ديار القصر )
.
الخدامة : مدام نهالة الضيف في جلسة الضيوف
نهلة : حطيتي القهوة
الخدامة : نعم مدام
نهلة : ياسر طلع
الخدامة : نعم مدام هو و معتز باشا
نهلة : باشا 😂 تمام بري انتي توا
( نزلت نهلة و خشت للدكتور )
نهلة : السلام عليكم اهلا بيك
احمد : اهلا بيك
نهلة : تفضل قعمز
احمد : 😊
نهلة : تفضل خوي كيف نساعدك
أحمد : اني دكتور حالة وعد
نهلة : من وعد
أحمد : وعد بنت عمكم
نهلة :  👁👁🔥 ما عندناش بنت عم اسمها وعد
أحمد : يا هانم ، وعد حالتها كويسة و رح تجي ورقة خروجها من وزارة الصحة
نهلة : ترا جرب
أحمد : عفوا
نهلة : قتلك ترا جرب طلعها و شوف شن يصير فيك ، توا نتفاهم مع مديرة المستشفي الحقيرة فالحة غير تاخد في الفلوس ، و من توا نقولك وعد هادي ، فوتها ، انت تلعب بنار و حارم تخرب مستقبلك تفضل المقابلة انتهت
أحمد : بس
نهلة : قتلك انتهت
.
انس : السلام عليكم
احمد : 👁👁 ( شفت شاب ماشاء الله عضلات و جمال و شخصية )
نهلة : اهلا حبيبي انس كيف كان الخيل اليوم ، استاذ احمد ممكن تتفضل المقابلة انتهت 
انس : مية مية أمي الغالية
احمد : 😳🔥............يتبع
دكتور أحمد مش رح يستسلم لين يطلع وعد ، شن قصة العيلة و من هما افراد الاسرة كاملة و هل عمها قاعد حي او لا و شن ممكن تدير مديرة المستشفي لوعد ، و هل حتطلع او لا ؟ و السوال اكبر ،،،،شن بدير بعد كل يلي سمعتوه ...
رايكم في الرواية ،،،،،،، ياريت ما تضلموهاش لان يلي جاي نار 🔥