مجنون حب فرعون الجزء الثاني

الفصل الخامس

الحياه ف اسكندرية ..لسه زي ماهي هي ،لسه صوت البحر بيرن ف وداني ..ولسه بغرق ف الاغاني ،لسه مش عارف مكانك ..يعني مش عارف مكاني، كل حاجه مكان ماهي ..الا انا ..انا ؟شخص تاني !!

عم بكر :ايه اللي شاغل بالك يا حضرة الظابط؟
_معرفش ..حقيقي معرفش
*هو في حد مايعرفش ايه اللي شاغله ؟!
_عارف انك تكون بتحس حاجه بتبسطك وبتزعلك ف نفس الوقت ؟احاجه مش عايز تبطل تفكير فيها وف نفس الوقت نفسك ترتاح منها ،وعلي قد ماهي قريبه منك..بس مش عارف حتي تلمسها .. ريحتها علطول محاوطاك ،بس هي مش موجودة !
*للدرجادي هي حلوة ؟!
_هي مين ؟!
*اللي مش عارف تنولها.. اللي عايز تحبسها ف عينك وتبعدها عن الخلق.. اللي هتصحيك من احلي نومه علي حلم ضحكتلك فيه، ومين عارف..مش يمكن الحلم يبقي حقيقه ؟!
_الله الله ..ده انت بقيت شاعر كمان ياعم بكر وانا معرفش ؟!
* دي الحاجه الوحيدة  اللي مش محتاجه تعليم ولا مدارس عشان تفهمها ،كفايه عليك انك بس تحسها وتستمتع بيها، لانه بيبقي مرض دواه ف ضحكتها ...اوعي ف يوم تعاند اللي انت حاسس بيه ده ، اعمل كل حاجه عشان ماتروحش منك ..عشان لو راحت ،هتندم زي م انا ندمان ..
_قصدك ايه بالكلام ده ؟!!
رد عليا وعيونه مليانه دموع
*انت ما سالتش نفسك انا ليه اشتغلت سواق عند عمك مع اني كنت كاتب كبير ؟
_كل م كنت بسألك كنت بتهرب م الاجابه..ياتري ليه ؟!
*عشان ضيعتها مني ، ماحسيتش بقيمتها الا لما راحت ..ماقدرتش نعمه أن في قلب حبني ..سيبتها تمشي وعمري ما اتمسكت بيها ،ضمنتها اوي لدرجة أن ما جاش ف بالي انها ممكن تروح لغيري، قولتلها اني بحب غيرها وطلعت بحبها هي ..
_ طب وهي فين دلوقتي ؟!
*ماتت.. ماتت وهي متأكدة اني مش بحبها وأنها مش مهمه عندي ،عاقبتني أسوأ عقاب ممكن حبيب يعاقبه ل حبيبه ...
ساعتها مكنتش عارف اواسيه ولا اقسي عليه علي اللي عمله ف حبيبته ..اكتفيت بالسكوت طول الطريق ، مفيش ثواني ولاقيت طيفها معكوس علي موج البحر ساعتها المطر ابتدي ينزل عشان يعزف احلي سينفونيه حنين مختومه ب زمرد عيونها .. منظر غرقت فيه لحد م وصلنا البيت ، واللي كان زي ماسيبته من 10سنين ..
نفس الدفا اللي كنت بحس بيه اول لما بلمس بابه ...غضب والدتي واحنا راجعين البيت و هدومنا متبهدلة من لعب الكورة، ذكريات يوم الشوي كل ليلة جمعه ، صوت الطاولة وضحك عمي اللي كان بيكسب والدي كل مرة ، كمانجة عمتي اللي كانت بتسحرنا بيها ، وصوت طارق(ابن عمه) اللي كان بيزين عزفها !!
اه لو ترجع الايام دي ، ساعتها مكنش ف بالنا مسئوليه ولا بيشغلنا هموم .. وبالرغم من كدة كنا بنقول أيامها أمتي نكبر ،ولما كبرنا بقينا نترحم علي الايام دي !!!
ذكريات كتيرة كنت بقابلها ب ابتسامة قهر مع كل خطوة ، وبعد لحظات من السرحان...لاقيت نفسي قدام عمي (بهجت) واللي كان ماسك البوم العيلة وبيبص فيه بعيون مليانه دموع ، الظاهر أن مش انا بس اللي بيحن ل الايام دي ..فضلت باصص ناحيته من غير اي صوت ،لحد م انتبه اني وصلت ..ف اللحظه دي نظرات الحزن والضيقه اللي كانت علي ملامحه اختفت ، واتبدلت ب امل وتفاؤل ..

_ياااااه ....كبرت ياليث ..بقيت ليث فعلا
* وانت عجزت اوي يا سيادة اللواء

ف اللحظة دي لاقيتني بحضن عمي!! ، اللواء بهجت اللي علطول كان بيعنفني ويزعقلي وانا صغير ، بحضنه ب شوق ولهفه دلوقتي !!
مفيش ثواني ولاقيت (طارق ) بيسقف وبيقابلني ب ابتسامه جميله مليانه فرح وسرور ....وكانت الصدمه لما شوفت الواد اللي مكنش بيبطل هزار وحركة وهو صغير ..قاعد علي كرسي متحرك دلوقتي !!

طارق: انا مش عارف ظابط ازاي بدموعك دي ؟! بقي في ظابط بالقلب والحنيه دي ؟!

حاولت اداري حزني عليه ب ابتسامه صامته ،بس عيني قالتهاله ..

_ايه ياعم انت اول مرة تشوف مدرعه بشريه ؟!
*ههههههههه...انت لسه فيك العادة دي ؟! .
_اللي زينا عمرهم مابيتغيرو ..بنعيش ونموت واحنا علي حالنا ..ممكن نغير ف غيرنا ، بس احنا ما بنتغيرش ..
*بكرة تجيلك اللي تغيرك ..ساعتها مش هتقول كدة
رد عليا وكل دموع الدنيا ف عينه ...
_عمرها ما هتيجي ..وان جت هيبقي عشان تبكي علي قبري ساعه ولا اتنين كل سنه وبعدين تسيبني وتمشي
*ليه بتقول كدة ..ده انت الف واحدة تتمناك
_مش لازم الف واحدة تكون بتتمناني ، المهم انا بتمني مين؟! ..
كلمه عم بعدها الصمت ..زي مايكون بيوصفني فيه ..
مر الليل والكلمه شغلاني ، سكنت عقلي ورافضه تطلع منه...ساعتها قررت اني اتمشي علي الكورنيش يمكن بالي يرتاح شويه .. وبعد ساعتين من صوت الموج اللي بيخبط ف الصخور ، حسيت بنسمه هوا باردة !! نفس النسمه اللي حسيتها لما شوفتها ..ساعتها قلبي دق جامد ، ولاقيت نفسي ببص ف كل مكان بدور عليها !!
مفيش دقائق ولاقيتها قاعدة ف العربيه جمب الشاب إياه وبتضحك معاه ..مش عارف ليه ف اللحظة دي عيني دمعت ؟! معقول اكون حبيتها فعلا ؟!
ابتسمت ابتسامة حزن مليانه كسرة والم ..وبعد لحظات قررت اني انسحب من المكان كله ..ياتري القدر بيعمل معايا كدة ليه ؟! ولحد أمتي هيفضل يحطها قدامي ويوجعني بالشكل ده ؟!!ياتري دي علامه ل حاجه ؟! ولا مجرد صدفه من غير اي مغزي ؟!
اسئله كتير فضلت شغلاني لحد ما وصلت البيت ..ببص ف الساعه لاقيتها 10 الصبح !!
حاولت أمر ب خطوات هاديه عشان محدش يصحي ..بس لاحظت أن الباب بتاع عم بكر مفتوح ، ومرة واحدة لاقيتني ببص عليه من جمب الباب ..كان ماسك براوز عليه صورة بنت وبيعيط ..شوية وحس بوجودي ، بصلي بنظرة مليانه كسرة وطلب مني اني اقربله ..
_شايف قد ايه جميله ؟! ما استحقهاش مش كدة ..كان نفسها تسمع مني اني بحبها .. بس انا كنت غبي ...اوعي تبقي زيي ، قولها انك بتحبها ..عشان هترجع بعد كدة تقول ياريت
*بصيتله وعيوني مليانه دموع وقولتله ...
هقولها اني بحبها ..اوعدك اني هقولها
___________________________________من 3 ساعات

-انا مش عارف احنا هنفضل ف الشارع لحد أمتي ؟! سيادتك مش ناوية نروح؟! ...زمانهم قلقانين علينا ف البيت
*اصبر ..عشان خاطري شووية وهنمشي
_هو انت مستنيه حد يعني ..وحد مين ده اللي هيجيلك الساعه 7 الصبح ؟!
*أنا حاسه أنه هييجي ..في حاجه جوايا بتقول أنه جاي
_هو ..هو مين ده اللي هيجيلك ؟!
*الامان ...اماني اللي كنت بدور عليه ..ادعيلي أنه يفضل معايا .
كانت اول مرة اشوف عمر بيبصلي بصه بجد من غير تريقه ولا هزار ..
_ماشي ..هنستناه سوا ، بس لو اتاخرنا هيبقي انتي السبب
*هههههه موافقه ..فضلت ببص ف كل مكان بدور عليه ..شوية ومرت نسمه برد جميله ، زي النسمه اللي حسيتها اول مرة شوفته فيها ...مفيش ثواني ولمحته من بعيد ، كان ماشي بسرعه زي مايكون وراه معاد مهم ...كان نفسي انادي عليه واقوله اني هنا وبدور عليه زي ماهو بيدور عليا ، بس كان اختفي تاني .
ابتسمت ابتسامه رضا .. لاني ساعتها اتاكدت أن مش كل الحاجات الحلوة بتروح ، في منها اللي بيفضل ..اللي بيدور عليك زي م انت بتدور عليه.