ထာဝရသူငယ်ချင်း (B.F.F) (Z+U){Completed}

18: နိဂုံး၏အစ

(Unicode)

မေ့ဖျောက်မရသော စကားများကနားထဲတွင် ထပ်ခါတစ်လဲလဲ ပဲ့တင်ထပ်နေသည်။ 'ကို..သူနဲ့ဝေးဝေးနေပေးလို့..မရဘူးလား..' တဲ့ တစ်ချို့သောစကားတွေက ပြောလိုက်သော လူအတွက်တော့ ဘာမှမဟုတ်ပေမယ့် အပြောခံလိုက်ရတဲ့သူအတွက်ကတော့....

ထိုခရီးမှပြန်လာပြီးကတည်းက ကျွန်တော်တို့သုံးယောက်လုံး မဆုံဖြစ်ကြတော့ချေ။ ချစ်ရိပ်သည်ပင် အိမ်ကိုမကြာခဏ လာခြင်းမရှိတော့ပေ။ ဘာသာစကားသင်တန်းတစ်ခု သူမ တက်နေသည်ဟု မေမေတို့ပြောသည်ကိုတော့ ကြားသည်။ သို့သော် မသိချင်၍ သေချာမမေးဖြစ်ခဲ့။

သိချင်မြင်ချင်သော သူကလေးအကြောင်းကျတော့ ပြောပြမည့်သူ မရှိချေ။ သူကလေးကလည်း ဖုန်းမဆက်၊အိမ်လည်းမလာတော့ ခက်ပြီလေ။ အနည်းဆုံးတော့ သူကလေးက ကျွန်တော်စိတ်ဆိုးနေသည်ကို သိပြီး လာချော့သင့်သည်မဟုတ်လား။ ကျွန်တော့်ဘက်ကတော့ စပြီးမဆက်သွယ်ဘူးဟု ဆုံးဖြတ်ထားသည်။ သို့သော် တစ်ခါတစ်ရံ သူကလေးကို တွေ့ချင် မြင်ချင်စိတ်က တားမရ၍ သူကလေးအိမ်ရှေ့သို့ မသိမသာရောက်သော်လည်း မတွေ့ရ။ နေနိုင်လိုက်တာ ဟုလည်း အပြစ်မတင်ချင်ပေ၊ ကျွန်တော်ကိုယ်တိုင်ကလည်း နေနိုင်အောင် နေသင့်သည် မဟုတ်လား။

ထို့ကြောင့်လည်း ခံစားချက်များကို ကြိတ်မှိတ်ကာ တစ်နေ့တစ်နေ့ gym သွားလိုက်၊ ရေကူးလိုက်၊ Boxing ထိုးလိုက်ဖြင့်ပင် အချိန်များကို ခက်ခက်ခဲခဲ ကုန်ဆုံးနေရသည်။ ဖေဖေကတော့ နေ့တိုင်းကိုယ့်အလုပ်နှင့်ကိုယ်ရှုပ်နေသော ကျွန်တော့်ကို အမြင်မကြည်ချင်တော့။ အနည်းဆုံးတော့ အငြိမ်းစား အရာရှိတစ်ယောက်ဖြစ်သောဖေဖေက စတင်ပြီးလုပ်ဆောင်နေသော သူ၏စီးပွားရေးလုပ်ငန်းများတွင် ကျွန်တော့်ကို ကူညီလုပ်ဆောင်ပေး စေလိုသည်။သို့သော် စိတ်မပါလျှင် ဘာမျှမလုပ်ချင်သော အမူအကျင့်အတိုင်းပင် ကျွန်တော်မဆိုင်သလို နေနေလိုက်သည်။

ဒီနေ့လည်း မိုးလင်းကတည်းက မင်းပြည့်နှင့် boxing ထိုးရန်ချိန်းထား၍ သွားရန် ပြင်ဆင်နေ ချိန် ဖုန်းဝင်လာ၍ ကြည့်လိုက်ရာ 'Thway Thit'
ဖြစ်နေသည်။ ကိုယ့်မျက်လုံးကိုပင် မယုံနိုင်အောင် ဖြစ်ရသည်။ မေ့ထားနိုင်ပြီဆိုသော အချိန်တွင်မှ သူကလေးက စ၍ ဆက်သွယ်လာသည်လေ။ ကျွန်တော် call ကို cancel လိုက်သည်။ အနည်းဆုံးတော့ သူကလေးဘက်က ကျွန်တော့်ကို ထပ်ခါထပ်ခါ ဆက်သွယ်ခြင်းကို မျှော်လင့်မိသည်။