السلام عليكم ورحمه الله وبركاته♥️
حبايبي واخواتي راغبات الفردوس اتمني تكونوا بخير
موضوعي النهارده اني اتكلم عن اختيار الزوج المناسب او عدم التسرع في الاختيار
طيب مبدأياً كتير من البنات في دماغها فكره واحده عن الخطوبه وهي فستان الخطوبه وشبكه وهدايا وخروجات وقصه حب متينه ومكالمات وهكذا
ومفيش في دماغها غير الفكره دي وعمرها مافكرت تقعد مع نفسها كده وتفهم اي اللي هي محتجاه في فتره الخطوبه او مواصفات حتي الشخص اللي هي عيزاه!! ولكن الفكره طاغيه علي دماغها لدرجه انها مستعجله علي الخطوبه وخلاص ولما فعلا تتخطب وتتسرع وهي مكنش عندها مبادئ بيبقي خلاصه الموضوع يا اما بتفركش الخطوبه بعد فتره طويله او قصيره مش هتفرق يا اما بتكمل وبتتصدم بعد الجواز لانها مكنش عندها مبادئ لاختيار الزوج ولا عندها مواصفات معينه هي اصلا مش عارفه هي عايزه اي
ولما بتفوق وتعرف هي عايزه اي بيكون فات الاوان!
طيب انا في الاول كده عايزه اقولك قبل ماتتسرعي في اي اتخاذ خطوه تجاه الخطوبه لازم تكوني فاهمه وعارفه المواصفات اللي انتي عيزاها ومحدداها من دلوقت علشان تبقي محدده هدفك مش سيباها كده مفتوحه زي ماتيجي تيجي لا ياحبيبتي الخطوبه والزواج دي قرارات مصيريه في حياتك ودي قرارات هتترتب عليها كل حياتك بعد كده يعني مش مجرد اختيار حاجه سهله وهتعدي لا انتي مش رايحه تشتري طقم من محل ومش محدده انتي عايزه اي فلو معجبكيش هترجعيه او هتخليه عندك وتركنيه ومتلبسيهوش او تلبسيه وانتي مش طيقاه وتقولي هعوضه في طقم تاني!! كل الامور اللي في حياتك معرضه لأنك متحدديش من قبلها هدفك
إلا الجواز دي خطوه لازم تكوني محضرالها من قبلها فتره ومحدده هدفك ومحدده المواصفات اللي انتي محتجاها وعلي فكره في بنات هتقولي ياغادة انتي مش مخطوبه طب بتكتبي البوست دا علي اي اساس اولا: علي اساس ان البنت هي اللي طلبت مني وعلي اساس تاني اني بتكلم علي اساس نتيجه لتجارب لبنات كتير اعرفهم ومش بس اعرفهم كده لا قريبين مني جامد وكان في حاله استعجال وتسرع وعدم تحديد هدف ومواصفات وفي الاخر النتيجه كانت واضحه اصلا من الاول
وعن كذا تجربه قدامي+ اني بتكلم عن اللي اتعلمته وبطبقه في حياتي واني اللي مقرراه هو الصح وبفيدكم بوجه نظري مش اكتر عايزه تقتنعي وتعملي اللي هقولك عليه كان بها وانتي الكسبانه ،هتطنشي كلامي وتمشي بمفهومك برضو وبتسرعك ومش هتحطي مواصفات للزوج اللي هتختاريه برضو براحتك بس هتشيلي نتيجه تسرعك دا وهتفهمي بعدين بس بعد ماتكوني عديتي بتجربه فاشله ضحيه تسرعك وطيشك وتجربه انتي في غني عنها من دلوقت وفي الاول والاخر ليكي حريه الاختيار والكلام اللي هقوله ماهو الا نصيحه من اخت زيي كده لأخواتها البنات اللي خايفه علي مصلحتهم وزي مابحب لنفسي الخير وجوايا تفكير سليم تجاه موضوع معين فلازم افيدكم بفكري ومبدأي💙
هتكلم في الاول عن المواصفات المبدأيه لأختيار الزوح طبعا كل بنت فينا عندها مواصفات ممكن متكونش موجوده عند بنت تانيه وكل واحده حاطه في دماغها مواصفات معينه..فأنا هوحد دا في اني هتكلم عن الصفات المبدأيه اللي لازم كل بنت فينا بدون استثناء تكون حاطه المواصفات دي شرط اول في الزوج اللي هتختاره وبعد كده تبقي كل بنت ترتب المواصفات اللي عيزاها بس اللي هكتبه دا لازم يكون اول الشروط
الدين والخلق أهم حاجه لازم تكون موجوده في زوجك واللي لو كانوا فيه هتضمني بأذن الله معاه حياه مرتاحه
الرسول صلي الله عليه وسلم قال"من جاءكم ترضونه ديناً وخلقاً فزوجوه" بصله كده تمشي وراها ونصيحه من رسولك الكريم ومفيش افضل ولا احكم ولا احسن من رسولك في البشر ينصحك شوفي الرسول قال ديناً وخلقاً اول حاجه مش شكلاً ومادياً علشان بس تفكير البنات بقي محصور في الشكل والفلوس مقلناش حاجه فعلا لازم تكوني متقبله شكله وبرضو لازم تكون حالته الماديه كويسه بس الاهم الدين والاخلاق علشان دول اللي هيوفرولك حياه سعيده بعد كده
يعني الشخص اللي هتختاريه لو مكنش علي خلق عالي وعلي التزام بأوامر دينه وعلي علاقه كويسه بالله مينفعش من غير تفكير لأن اللي علاقته بربه مذبذبه او مفيش علاقه اصلا واخلاقه مش كويسه ومش بيتبع اللي امره بيه ونهاه عنه الله يبقي مينفعكيش زوج لأن ببساطه مش دا الزوج الصالح اللي هياخد بأيدك للجنه ويعينك علي طاعه الله ويكون نعم الزوج والاب الصالح لأولادك بعد كده
ولو علاقته بأهله مش كويسه برضو مينفعش لو مش بار بأبوه وامه وبيعاملهم كويس يبقي هيعاملك انتي كويس بعد كده ازاي دا مش عارف يبر اللي ربوه وليهم فضل كبير عليه يبقي هيعاملك انتي ازاي اكيد كده مش محتاجه كلام
يبقي الاخلاق والالتزام وبر الوالدين اهم مايكون في اختيار الزوج ثم بعد كده شخصيته شخصيه سويه وعقلاني ولا لا..بيقدر ياخد قرارات لوحده وقرارات صحيحه ولا لا متسرع وطايش ولا هادي ومتأني طريقته جافه في الكلام وقاسي ولا بيراعي شعور اللي قدامه وياخد باله من كلامه أهم حاجه طريقه محاورته و طريقه كلامه لأن اللي هيعكس طريقه تفكيره هي طريقه كلامه وانتقاءه للكلمات هتعرفي تفكيره عامل ازاي ومن هنا هتفهمي شخصيته ان كانت شخصيه صعبه ولا شخصيته وطبعه لين هين
ومن الحاجات اللي لازم ولابد ومينفعش تتنازلي عنها في زوجك انه يكون غيور مش ديوث
يعني غيور تطلعي بزينه او تبرج غيور يشوف راجل بيبصلك باصه مش كويسه، غيور تكوني بره البيت من غير زي شرعي ساتر وغيور عليكي من عيون كل الناس لأنه لو مش كده وهو بطبعه ديوث يعني مش بيغير فدي مصيبه في حد ذاتها بلس انه ذنب عظيم الرسول قال الديوث لا يدخل الجنه ولا يشم ريحها
ديوث يعني عادي عنده تطلعي من البيت بالبنطلون والشميز وجسمك كله معروض سلعه للناس تتفرج وعادي عنده الميكب واظهار مفاتنك ومحاسنك وعادي عنده تطلعي حاطه برفيوم وتكوني بالبرفيوم دا زانيه والعياذ بالله وعادي عنده تطلعي قدام اخواته الكبار الرجال بشعرك والبيجامه وعادي عنده تطلعي تقعدي مع اصحابه الشباب وعادي وعادي كله عنده عادي ومش فارق يعني بعيداً عن كونك كده في نظره مش غاليه عليه لا وكمان هو علي ذنب عظيم فلابد يكون الشخص اللي هتختاريه غيور ودا هتعرفيه من نفسك انتي الاول شوفي انتي بتلبسي ايه وهو علي اساس لبسك دا اختارك فهتعرفي الاجابه من نفسك انتي ومن شكلك لو اختارك بزيك الشرعي فهو غيور ولو رضي بشكلك والتبرج فهو ديوث وراضي علي كده
حاجه كمان مهمه جداً لو بيشتغل شغلانه حرام اوعي توافقي عليه لو مش هيتنازل عن الشغل دا ويشوف غيره لو بيكسب فلوسه من شغل حرام اوعي ترضي علي نفسك تعيشي معاه وتصرفوا من مال من عمل حرام اوعي يبنتي وركزي جداً ومتتساهليش كده
خليكي واعيه وبلاش تكون فكرتك عن الخطوبه والزواج مجرد فستان وفرح وشويه هيصه لا دا انتي بتختاري شريك لحياتك كلها مش يوم ولا اتنين دا عمر كامل.شخص هيتحكم فيكي بشكل كبير ،شخص ممكن يرفعك لفوق او يخسف بيكي الارض،شخص يا إما اولادك هيشكروكي علي اختيارك ليه او هيفضلوا يأنبوكي طول العمر عليه
شخص يا أما معاه هيزيد إيمانك والتزامك وقربك من الله يا إما معاه هيقل إيمانك وتبعدي عن الله ..يا اما يكون سبب في هدايتك وياخد بأيدك للجنه ييكون سبب في دمار علاقتك بالله وزياده ذنوبك
ونصيحه مني لو دورتي علي صاحب الدين والاخلاق هتلاقي فيه كل المواصفات اللي قولتها هتلاقيه بار بأهله ومتواضع وطيب الطبع وحنون وغيور وهين لين ومتحمل للمسؤليه وعقلاني لأن ببساطه اي حد واخد الرسول قدوه ليه وبيتبع الرسول لازم تكون شخصيته وطباعه جميله جدا دا متبع خير الخلق فلازم يكون فيه اكبر قدر من المواصفات الكويسه اللي انتي محتجاها فتأني جدا في الاختيار وكوني انتي كمان عقلانيه في الاختيار دا ومتخليش المظاهر تبهرك وتخدعك، لأن الفلوس والشكل والوضع المادي والحاجات دي جميله وكل حاجه بس لو اتوجدت في شخص قليل الدين والاخلاق يبقي متختاريش لان الفلوس والشكل من غير الدين والاخلاق ولا حاجه صفر علي الشمال
بالنسبه لبعض الشروط اللي كتبتها دي في منها هيبان ليكي ويتضح في الرؤيه الشرعيه وفي منها هيفضل مش باين وواضح في الاول بس عايزه اقولك لما يجيلك شخص ولقيتي فيه بعض المواصفات دي في الاول لما تقعدي معاه اسئليه وحاوريه متتكسفيش انتي مش بتعملي حاجه غلط لا خليكي جريئه واسألي واعرفي وانتي بتتكلمي معاه هتلاقي حاجات كتير بتظهرلك بس ركزي اووي وخلي عقلك هو اللي يشتغل الفتره دي واركني قلبك خالص ومشاعرك ولو امكن قرري الرؤيه الشرعيه اكتر من مره قبل ماتوافقي وتقولي قرارك علشان كل مره لما تقعدي معاه وتتكلموا هتكتشفي عيوب ومميزات وهتلاقي حاجات من اللي قولتها انا الاول فوق وحاجات تانيه عكسها بس اهم حاجه ركزي وتأني هتشوفي من كلامه وهتفهمي عنه كتير وحاولي وانتي قاعده معاه في الاول تختلفي معاه في الرأي علي اي حاجه وتشوفي رده فعله عامله ازاي هل هيكون متحكم في اعصابه وعقلاني فعلا وبيعرف يدبر الامور بحيث تمشي علي هواكي وهواه ولا عنده كلمته هي الاولي و الاخيره ورأيه هو الصح حتي لو غلط شوفيه بيسبلك مساحه لطرح رأيك والمناقشه ولا متسلط وعنيد وكلمته هي بس وانتي ملكيش رأي ولا شأن وواحده واحده حتي هو لو بيداري غصب عنه هيبان عليه ووقتها متسايريش الامور علي حساب نفسك لا في عيوب سهل التغاضي عنها والتجاوز وفي عيوب لا ومش بقولك في ناس مفيهاش عيوب لا لازم ولابد يكون فيه عيوب زي مانتي برضو فيكي عيوب وكلنا فينا عيوب بس زي ماقولتلك في عيوب سهل التعامل معاها وعلي حسب شخصيتك انتي برضو هتقدري تتماشي مع دا ولالا لان في بنت تتماشي مع شخصيه الراجل دا وعيوبه وفي بنت تانيه لا يعني الامر كله في ايدك بس فكري وشغلي عقلك وبصي لمستقبلك مع الشخص اللي متقدملك وانتي تحكمي بنفسك
كل اللي قولته دا بخصوص فكرك ومبدأك قبل فتره الخطوبه،ولو متقدملك شخص بيتعاطي اي شئ من المخدرات او ماشبه ذلك إياكي ثم إياكي توافقي وتقولي هيبطل او هقنعه والكلام دا انسي يبنتي خالص الفكره دي ، وفي فتره لو حد متقدملك وهتعملي اي وقبل كل شئ الاستخاره أهم حاجه والاستشار من الناس اللي يقدروا يفيدوكي وينصحوكي، فلنفترض بقي تمت الخطوبه وعلي شخص إلي حد ما فيه كل اللي شرحته
يبقي فتره الخطوبه بقي اللي انتي مقبله عليها دي مش للحب والدلع والهدايا والجو دا لا دا انتي تحطي عينك وسط راسك زي مابيقولوا وتركزي في كل تصرف ليه حتي لوصغير وبسيط بالتأكيد هتعرفي ولو بشكل بسيط نبذه عن تعاملاته خلوق ولا لا ذوق ولا لا بخيل ولا كريم بيلتزم معاكي في فتره الخطوبه بضوابط الخطويه ولا مقضيها تجاوزات بيخاف يعصي ربنا فيكي ولا مش هامه خايف يكون هو سبب غضب ربنا عنك وسبب تدهور علاقته وعلاقتك بربنا ولا ولا في دماغه بيتقي الله فيكي وخايف يخدش حيائك ولا قليل ذوق ودين وحياء بيعرف يقول الكلمه الطيبه ولا اسلوبه جاف بيغض بصره عن النساء زي ما امره ربه ولا بيطلق البصر ومقاضيها علي اللي رايحه واللي جايه نظراته ليكي عامله ازاي هتقدري تفهمي من كلامه اذا كان حريص علي امور دينه وملتزم بيها ولا لا وحاجات كتير جدا بس انتي ركزي كويس مش تخلي الفتره دي للتفاهات وتتغاضي وتغمضي عنيكي وبعدين تفتحيها بعد الفرح وتلاقي نفسك وقعتي وتقعدي ندمانه لا لسه في إيدك من دلوقت تقدري
ولو في فتره الخطوبه دي بقي حسيتي بأي قلق او شك او شعور بعدم الرغبه في الاستمرار او احساس بأنه مش هو دا الشخص اللي حابه تكملي معاه اقطعي العلاقه فوراً ومتستنيش،وإياك وفكره التغيير بعد الزواج والله ماحد بيتغير علشان حد لو مش هتقبليه بطباعه وعيوبه قبل مميزاته من اولها يبقي متنتظريش تغيير في اي شئ
انا عارفه اني اول مره اتقل عليكوا في القرايه كده بس فعلا الموضوع مش تافه وبسيط علشان البنات تتعامل معاه بالسطحيه دي فوقوا كده اللي يرضي عنكم علشان دي قرارات تحديد مصير
الخُطوبة فترة تشغيل العقل مُش القلب أبدًا ، و ده لِمصلَحتكم صدقوني.💙
وأخيراً: اختاري صح او علي الاقل حاول تعملي كده اختاري سند ليكي وقدوه لأولادك اختاري اللي يعينك علي القرب من ربنا ويرفعك دايما لفوق اوعي ترضي بأي حاجه والسلام حتي لو مش هتتجوزي خالص يفوتك قطر الجواز أحسن بكتير من انه يدوسك!
فلتختاروا اباً يصلح لأولادكم فلتختاروه بعنايه ولا تتعجلوا💙✨
وزوجكن الله زوجاً صالحاً ناصحاً،صواماً قواماً تقياً نقياً خفياً🌻
كأنما السماء لفظته من ثغر غيمها فأمطرته صيباً نافعاً لقلوبكن🌧️💕
قلبه معلق بالمساجد🌸
وبصره معلق بالله✨
وتهتز اوطار الفؤاد من جمال تلاوته للقرءان💙
سبحانك اللهم وبحمدك لا إله إلا انت استغفرك واتوب إليك
راغبه الفردوس الاعلي💚🌻
