دايمًا لما حد يجي يقولي أنا مخنوق ومهموم وفيا وعليا أول حاجة بتيجي فـ بالي أسألهاله قبل مقوله مخنوق من إيه:
" بتصلي؟ "
ومش قصدي بالصلاة هنا الـ بتتصلى في دقيقتين منغير خشوع،
تخيل كدة تروح لأعظم دكتور للعلاج النفسي وتروح لأعظم Life coach وبردو مخنوق!
وللَّه المثل الأعلي،
ربنا الأكبر والأعظم، الفرد الصمد،
الـ خلق نفسك وبثّ فيها من روحه،
متخيل إنه مش هيرضيك؟
ولا يفك همك وغمك؟
النبي - صلّي اللَّه عليه وسلم - قال عن الصلاة:
" أرحنا بها (الصلاة) يا بلال "
لما الرسول - صلّي اللَّه عليه وسلم - سُئل عن الروح من قومه،
مكنش عارف يرد،
فنزل عليه چبريل بالآية الكريمة:
{ وَيَسْأَلُونَكَ عَنِ الرُّوحِ ۖ قُلِ الرُّوحُ مِنْ أَمْرِ رَبِّي }
روحك محتاجة تتغذي زي مبتغذي جسمك بالأكل الصحي والچيم والفلوس والعربيات والعلم،
بس روحك هي الشيء الوحيد الـ عمرك ما هتغذيه بأمور دنيوية، غذائها عند صانعها فروحله وتوكل عليه،
دول مش مجرد ٥ فروض كل فرض ٥ دقايق وخلصت، دول الهدف، الركن الأساسي من اليوم، شغال وبتقبض ملايين الملايين لا تساوي سجودك في اليوم في الـ ٥ فروض،
قبل ما تقول أنا مخنوق، وتشتكي للعباد، و٢٤ ساعة ستوريهات حزن وضيقة، راجع حساباتك مع ربك،
وحتي لو بتصلي صح وبخشوع وحاسس بضيقة فرسولك الحبيب كان أكثر الناس همًا، بس كان ظنه برب العالمين كل الخير،
متخليش ربنا هو الخيار الأخير بعد كل الأسباب الدنيوية، مخنوق هنزل مع صحابي أتفسح، مخنوق يبقي لازم يكون معايا ملايين عشان أنبسط، مخنوق يبقي لازم أحقق ذاتي وأبقي مشهور عشان الخنقة تفك،
وهتيجي بعد كل دة برضه مهما وصلت ومهما علي شأنك في الدنيا، ومش هترتاح، روحك هتبقي بهتانة، زي جسمك لما بتقضي يوم كامل لا بتشربه ماية ولا بتأكله، مبالك روحك الـ بتظلمها ومش بتغذيها سنين!
{ فَفِرُّوا إِلَى اللَّه }
{ وَأَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ }
{ فَإِذَا قَضَيْتُمُ الصَّلَاةَ فَاذْكُرُوا اللَّهَ قِيَامًا وَقُعُودًا وَعَلَىٰ جُنُوبِكُمْ ۚ فَإِذَا اطْمَأْنَنتُمْ فَأَقِيمُوا الصَّلَاةَ ۚ إِنَّ الصَّلَاةَ كَانَتْ عَلَى الْمُؤْمِنِينَ كِتَابًا مَّوْقُوتًا }💙
