\حطام الطفولة/
-علاش متزوجش حفيدتك؟؟
عبد سلام شاف في المتكلم و نطق: سي"عماد" كنظنك مسمعتيش مزيان؟؟ لشيئ لكندويو عليه انا و "حمد".
-عماد تكا على الطابلة و تكلم:لا كتدوي على ظروف المادية الصعيبة لكتدوزها؟؟ و اكيد انت مقادش على مصاريف حفيدتك لغادة و كتزااد. و بلا الفلوس ديال الصداق لهتحطهم في جيبك.
عبد سلام عقد حجبانو: وانت اشنو علاقتك؟؟
واش كتخطب مني"سمرا" بطريقة غير مباشرة؟؟
عماد: سمعني ا سي عبد سلام....انت كبرتي و داخل في ثمانين عام...و تخيل نهار تنعس ما تنوض.
عبد سلام تغيرو ملامحو للغضب:كتفايل عليا ولا آشنو؟؟
تدخل حميد لسيفتو بحال شيطان و شعال العوافي 100/100: اييه كتفايل على سيد؟؟ ا سي قدور؟؟
عماد قاد قاميجتو: سميتي "عماد" ا لحاج...و الموضوع بعيد عليك....(شاف في عبد السلام) راه "محمد"و "علي" و بزاف اخرين من ناس الدوار...زوجو بناتهم ملي صعب عليهم الحال...و الجيب صغار.
و انت كتشوف محمد عندو 2 ديور في المدينة. و علي راه عندو فيرما بكمالها. ربي يسر عليهم ملي زوجو بناتهم.
عبد سلام: فك حجبانو المعقودين و دارت ليه الفكر"طن" في راسو....
عبد السلام :باغي تزوج حفيدتي؟؟
حمد كيراقب الحديث بهدوء...و كينتاظر جواب عماد بفارغ الصبر باش ينشر الخبار في الدوار.
عماذ:لا ماشي انا ولكن لخويا كيقلب على مرأة يسترها.
عبد السلام ابتاسم بفرح: ايه قول كتدوي على رضوان الطبيب؟؟
عماذ حرك راسو بنفي: لا...رضوان راه مشا لفرانسا و تزوج كاورية....انا كندوي ليك على خويا الكبير "مصطفى"
حمد خرج عينيه بصدمة...و عبد السلام نفس الشيئ.
حمد فاتح فمو: ولكن رضوان راه مزوج بربعة ديال. النسا؟؟
عماذ حك ذقنو بحرج بسبب ردة فعلهم و صدمتهم المبالغ فيها: راه طلق 2 و بقا مزوج غير ب2....و دبا باغي يزيد الثالثة.
عبد سلام تكلم بإنفعال:راه مصطفى في نفس عمري...و حفدتي باقي ماختمات حتى 13 عام.راه الفرق بيناتهم كثر من 50 عام....واش فاهم...بيناتهم كثر من خمسيييين سنة...ماشي عشرة ولا 15 ولا حتى 20....و مكملها مزوج بزوج آخرين...و الله الا كملات.
عماذ حرك عينيه في الناس لكيشوفو فيهم:انت عارف خويا بخيرو و خميرو و معاه ماينقصها خير....الفيرمات...و الديور و العمارات....و الطومبيلات راه اشكال و انواع....و متنساش انه اذا تناسبتي مع احد في هاد المقام راك هتعيش في النعيم.
عبد سلام سكت البرهة و ابليس داير خدمتو كيوسوس ليه و الفكرة بدات كتحفر في دماغو.
يتبع....
