السلام عليكم اسمي عُلا مواليد 2000 عندي خمس خوت اكبر مني وواحد اصغر مني حياتي جحيم وماما متوفية من لما جابت خوي الصغير ونعرفكم على خوتي بالواحد_
أولهم سراج:-مواليد 89 بكر العيلة المتحكم بكل شيء تقريباً واعر نين خلاص اهم شي عنده كلام الناس وميهتمش لأي شيء ثاني حتى بابا يخاف منه
احمد:-مواليد 92 أربعة وعشرين ساعة على ألنت وما يهتمش للحياة الخارجية ل شوية مع بنت عنده عشرين وحده وميهتمش بان اغلبهم يحبوه ويحسابوه ما يكلم في حد بس التفاهة على اصولها
ايهم:-مواليد 95 بارد وديما قارن حواجبه ميهماش شي وماشي على حاله ميكلمكش الا كان درتي حاجة حرام وبتفاهم باللتي هي احسن
أنس:-مواليد 97 يقرا برا يحضر ليه ثلاثة سنين مروحش لحد الان بس مرة مرة يكلم فينا
عبدالرحمن:-مواليد 99 دودة قراية وبسببه هوا اني كملت قرايتي قلي مستحيل انك توقفي وضد العيلة كلها وقف معاي بش نكمل
وبعدين اني وبعدي عبدالله:-مواليد 2003 قاعد يقرا ودينا اني وياه أسراره كلها عندي ويحب وحده صغيرة ويستنى امتا تولي كبيرة شوية بش يقدر يمشي يطلبها
بوي اسمه محمد وامي الله يرحمها اسمها خديجة
______________________________________
ماشية في امان الله على حالي اني وصاحبتي ايناس جت وقفت بحدانا بنت وهيا تكلم في ولد على الجيهة التانية من الشارع اني تنرفزت وشافني خوي وين تلقيني عاد وأول مارحت استقبلني بالسبتة يضرب فيا بكل جهده وكل قوته وبعدها بدي برجله هوا ومعاه خوي احمد وبوي يضربوا فيا تقول مدايرة الفاحشة وخلوني حالتي حالة ومعاش قادرة نتحرك .. به في سؤال يدور في بالي علاش بما انهم ميبونيش تشبح ولاد ميرفعونيش هما للمدرسة؟!
مشيت لداري ودوشت بعدها قعدت نخلص في شعري ومهزوز مع ايناس فيديو شوية وخش خوي ايهم قالي بحماقة:في من تكلمي؟
اني بكل برود:ايناس من بنكلم يعني!؟
كان شاك بس طلع وسيبني لانها هيا قالت من هناك المهم قعدنا نهدرزوا بعدين صكرت لانها بنرقد واني نزلت للكوجينة بناخذ تُلِّح نكمد بيه مكانات الضرب .. نزلت نسمع في اخمد يكلم في وحدة وهوا مقعمز في الكوجينة فته وخديت تلج وقعمزت مقابلاته وبيناتنا طاولة وهوا يكلم في بنت واني نتأوه كل منحط الثلج على مكان فهي قالت:من بحزام يا احمد؟!
احمد:هادي اختي طايحة من الدروج وتكمد في الجرح متعها بالثلج
ردت:اها🙄 لا باس عليها
كانت نبرتها مش مصدقة نوعاً ما لكن مدورتهاش وكملت اللي ندير فيه وإذن الفجر نضت صليت وقلت الحمد يصلي ناض صلى وأيهم حتى هوا وسراج وكلهم ناضوا صلوا واني لبست بنمشي للجامعة عندي محاضرة مهمة قلي عبدالرحمن انه بيرفعني ركبت معاه وصلني وخشيت نص البنات ماتوا فيه ويسألوا حبيبك خطيبك خوك من هادا والخ!
ايناس:من هادا؟
اني ببرود:خوي عبدالرحمن
ايناس:اها .. حلو لكن
اني ببرود:ايه ايه خليك هكي تقولي حلو احسن ما تعرفي الحقيقة أصلاً كلهم حلوين كان بالشكل
ايناس🤔:وهادا خيره!؟
اني:دبوس قراية دودة قراية والله كان مش منه واني مبطلة وهوا لا الشهادة والشهادة تموتي عليه ضحك
ايناس:اها
خشينا للمحاضرة وبعدها قاللنا الدكتور:فيه محاضرة اخلاقية بعد ساعتين كل يوم لمدة شهر أحضروها
نصنا ميبيش يحضرها بس اني لسبب منعرفاش خشيت همي نبي نعرف شن هيا الاخلاقية هادي وكان في اليوم الاول يعرفوا فينا ببنفسهم وكلام زي هادا .. إلخ
طلعت منها ومشيت روحت واني سرحانة لقيت عندنا عمتي وجداي!!😳 هادوا على ما اذكر مقاطعينا ليهم اكثر من ثلاثة سنين لما عبدالرحمن رفض اني ناخذ من ولادهم باش نكمل قرايتي .. عمتي تهدرز على بابا وكأنها تحاول تقنعه بحاجة🤔 فتتهم وخشيت لداري وقعمزت نقرا في امتحاني شوية وخداني النوم ..نضت مخلوعة نسمع في عمتي تزغرط نزلت مستغربة نلقى خوتي مقعمزين قدامي وعبدالله دمعته في عينه نزلت وقلت:خيركم شن فيه؟!
عمتي بنظرة شماتة:بوك خدي بكلامي اخيراً وبياخذ مرة
حسّيت بان قلبي وجعني وقَعَدت نشبحلها وقلت بتحدي ونبرة جادة:ايه والله متطلعي الا ساحراته بابا ياللي متتحشميش على وجهك ياتافهة يالـ...
قاطع كلامي كف جاني من أعز الناس ليا .. بابا ضربني كف بقوة جهده وقال:مدخلكش في حاجة زي هادي
اني بحماقة:لا دخلي فيها انت تبي تبدل ماما لكن اني منبيش والله امتا نورطها الويل اللي تجيبها ولما نهججها وتجيب غيرها وحتى هيا نهججها تقعد تجيب واني نهجج واني وياكم والزمان طويل تو نوريك الويل الله ياعمتي
وركبت فوق الحيط وعيطت:يارب انك تقول لدعوة المظلوم لتنصرنك ولو بعد حين .. يارب انصرنا يارب اني مظلومة يارب انتقم منهم يارب على أيدي يااااااارب
واني نبكي جوني كلهم يبوا يهزبوني على خطر انعيط ونسمع في الناس ركبت على الشاشية وقلت:اللي يقرب مني بنقز والله نديرها وعمتي تعيط وجداي تقول:يكاه انزلي سلم بنيتي انزلي
رجلي زلقت وكنت على وشك انطيح نضت مخلوعة من النوم لقيت روحي على المكتب متاعي!! طلع كله حلم الحمدلله ونضت نغسل في وجهي ونشرب في ميا نحاول نستوعب انه مصار شي .. نزلت لقيتهم مقعمزين يتكلموا شوية وعمتي تقول:اعطوهالنا البنت حني احق بينها من اي حد تاني يامحمد...
عبدالرحمن:الا منعطوهاش اختي نين تكمل
اني بكل وقاحة:منبيش ولدك المردف سلم عمتي لمس باقي كرامتك واطلعي
وكلهم يشبحولي وخوي احمد شاد بطنه من كثر الضحك ويقول:والله كلام الحق وجاع ياعمتي ولدك مردف حق
وهيا طلعت ومعاها جداي واني نستنا في التهزيب بس محدش عديني فوتوها كأني مدرت شيء وليت لداري وقعمزت نقرا واني فيا نوع من الراحة لأنهم مغصبونيش على ولدها💗💗💗
بعد اسبوع مر عادي روتيني اليومي مشيت للجامعة قالولنا فجأة هكي بروا روحوا بدون سبب مدخلوناش!؟
روحت مستغربة بس رقدت براحة غريبة
نضت الظهر😄 خشي الكوجينة لقيت احمد مقعمز على المرسي ويلعب في ببجي .. احمد:عُلا .. قوليلي شن هوا معنى انك لما تكلم حد قلبك يبدأ ينبض؟!
رفعت حاجبي وقلت:هادا الحب يابابا من تعيسة الحظ!؟
احمد:😂والله متتحشمي ياحقيرة اني البنات كلهم يحبوني
اني:وانت خقير تلعب عليهم كلهم لما يولي في صغارك اللي أدير فيه ياواطي
____________________________________
وهادي مقدمة للرواية وأتمنى تنال إعجابكم
