سراج:اسمعوا هذا يقعد سر بينا نحن الستة لي يوم الدين الا لو صار شي يستحق الفضح
كلما مع بعضنا:حاضر😖
سراج:زمان لما كنت صغير واحمد كيف مجيوب كنّا نمشواْ لحوش خوالي ونتفكر ديما انه خوالي وخالاتي ناس حلوين ديما يشرولي في حاجات وفي يوم صارت مشكلة وطلعت وحدة من نساوين خوالي هيا وخالتي ساحارات...
اني:نهار مغبر😱😱
احتد يأكل في الشيبس:ضمي فمك
سراح:اححم احم .. معاش تقصوا .. مشي عماتي بدوا يقولوا ان امي خسارة لأنهم ميحبوهاش من يومها وبوي واخذها غصب عليهم كلهم .. وبدت عمتي صالحة تحط في حرستا في شعر ولما نشوفها تقولي متقولش مشي صورتها في تليفون امي وريتها ليها قالتلي متقولش لحد لازم ندسوا على الناس لان ربي يسترنا يوم القيامة
اني في نفسي:ونتعلم من امي انه منظلمش من ظلمني
سراج:وخوالي طلبوا من اني تقاطعهم باش معاش يقولوا عليها سحارة لكن زادت شكوك الناس بعد قاطعتهم وقالوا عيالها لزاها لانها سحارة .. وبما اني قريب نتزوج تليفون امي بنعطيهولك يا عُلا استعداداً لاي حدث يمكن يصير مستقبلاً
كلنا وافقنا وكل واحد مشي لداره وفي اليوم اللي بعده عرفنا ان بابا بيتزوج وهادي بداية الحرب بالنسبة ليا .. مشينا حوش العيلة الكبير وفتحناه لان موعد العرس بعد ثلاثة أسابيع وعرس خوتي بعد شهرين وبروح خوي اني من القراية بعد ثلاثة أسابيع أي في عرس بوي .. جو عماتي لحوش العيلة وبناتهم وعمتي وبناتهم وجداي حتى هيا جابوها .. طبعاً منقوللكمش النظرات بيناتي اني وعماتي وبناتهم نظرات حرب قائمة بين يعود بني قريضة والمسلمين وانا المسلمين بالتأكيد😌
ريهام:ها شن خوك مسكين تراه يفكر كيف سيبته من...
اني:😒ريحي رأسك خوي عنده وحده وفاتك على خاطرها محلاها عليك
ريهام حمقت لين وجها ولا احمر😡كيف الايموجي هادا واني واسراء نضحكوا عليها😂😂
خش ايهم ونازلين مشيتله قالي:بنسألك مرت بوك شن اسمها ومن عيلة من؟!
اني:تعرف؟ اني قعد منعرفش😐
ايهم:هزي😒
ومشي وخلاني واني قعدت نضحك تقول شاربة حاجة واسراء تضحك معاي ولين تتفرج علينا
لين:والله شكلكم شربتوا الوريكنة اللي نسيقوا بيها
اني😂:مرات
اسراء😂:قداش ليا مضحكتش هكي
وحني شادين بطونا ومقعمزين على السيراميك المبلول ويشلبك مية وميتات ضحك بلا سبب .. خش عمي علاء لقانا نضحكوا قعد يبرم في راسه😅:ربي يثبت علينا العقل والدين
اني واسراء:يارب امين😂😂
طلع وهوا يضحك علينا وحني جي هزبنا سراج واحني شادين افامنا بيدينا منبوشي يسمع صوت الضحك😁😁
كملنا تسييق وخشينا الدار وقعمزنا دهشانين ونضحكوا شوية ويرن تليفوني رقم غريب رديت صوت راجل واضح انه كبير في العمر
اني:من معاي؟!
***:انت عُلا بنت خديجة ومحمد صح؟
اني:نعم منوا معاي!؟
***:اني مش حنقولك توا خشي على صفحة الفيس متع رقمي وضيفيني ونتكلموا...
طوط طوط طوط
وفصل الخط عليا واني معنديش نت هني قعدت على نار
اني:اسراء عند يوسف G4؟
اسراء:ايه .. تو نقوله نبوه ضروري
اتصلت بخوها وقالتله ضروري قاللها لا خديت منها التليفون وقتله نبيه ضروري يا يوسف قالي جايبه قولي لإيواء تطلع تاخذه .. مشت خداته وجاباته واني فتحت فيس ضفت البني آدم هادا ولقيته واحد طرف كان نقوللكم محلاه يهبل😍😍 وواحد غني واتي بكل شي الا انه مش خاطب .. شن يبي مني🤔
لقيت لقبه نفس لقب امي خشيتله خاص ودزيت
-السلام عليكم
-وعليكم السلام
-انت اللي كلمت عُلا بنت محمد ولا غيرك؟
-ايوا اني😌
-اهااا شن تبي مني؟!
-اني ولد خالك يا عُلا واسمي مالك نبي منك أدلك لقضية امك اللي قاعدة مفتوحة لليوم عندنا
سبحان الله كيف حس سراج اني حنحتاج هادي الأدلة عن قريب ولحكمة لا يعلمها الا الله رديت-خلينا على تواصل حتى نزيد نطلع على القضية
وسبحان الله من كان يتوقع اول قضية نخدم عليها لما نتخرج تكون قضية امي!!**
مشيت للجامعة وكانوا يشرحولنا في قضية غريبة قضية جنائية محدش عرف حلها قعدت نربط في الأحداث ولقيت حل وبديت نشرح للدكتور والشرطي ولقيت الأدلة وشدوا المجرم وبهذا القضية تخرجت بامتياز قبل وقتي وقالولي مبارك روحت فرحانة وحكيت لخوتي وجابولي هدايا وحاجات وشكلاطة وجنتي هدية من مجهول بوكس ورد وشكلاطة وفيها لابتوب آبل احسن نوع فرحت بيها شوية يوصلني مسج-عجباتك الهدية
فتحت لقيتها من مالك قتله-انت دازها؟
-ايه مبارك التخرج
-يبارك فيم☺️
-اني نخدم في الشرطة والقضية اللي حليتيها كنت من المشرفين عليها قبل وحدك ليها حاجة ابداع بتكوني من أفضل الناس مستقبلاً
-شكلنا بنخدموا مع بعض هلبا
-ايه😎😎
صكرنا النت وكملنا الضمان والتسييق وتطليع الحاجات وكل يوم بقرب عرس بابا واني متقطع بس قهر لعماتي كل يوم امشياته في الضحك لين دموعي ينزلوا😂😂 بس من الداخل💔💔
وصلنا عرس بوي واني جبت الدربوكة وجابوا متظومة ايجار كسرتها
منيرة:علاش توا؟!😡
اني:😌عرس بابا واني نتحكم مفيش موسيقى دربوكة وغيرها لا
ريهام:عليك نفاخة وووك
خش ايهم لقانا نتعاركوا بدّي يهزب فيا قتله بكل ثقة:يبوا يفتحوا منظومة في العرس
حمق وبدئ يلعلع ويهزب وقالهم:دبروا من يدفعكم حقها
وطلع قربه الباب ركبت للدار اتصلت بايناس وقتلها تجي تبات معانا لا نهاية العرس قتلي باه منها نكلم سراج ومنها نقعد معاك في وجعك .. وجع شنو؟! اني الدنيا قلبتها فوق راسي لحد الان
جت ايناس وقعدنا اني وياها واسراء مع بعض نهدرزوا ومائتين ضحك ودموع الضحك على وجوهنا وفي عيونا
وكل يوم في العرس يفوت عليا تقول سنة وآخر يوم فات وجت العروسة وبابا مشي هوا وياها لحوشنا وحني قعدنا في حوش العيلة .. لو تتخيلوا انِّي اني رفعت الكسوة معاهم .. تم العرس واني قعمزت فوق الحوش نبكي كيف هانت عليه ماما صح معشتش معاها الا ثلاثة سنين الا انِّي نحبها منتفكرش في ملامحها لكن امي امي امييييييي
وتثبت لك الأيام انه لا شيء اكثر الماً من فقد الام ولاحب يغلب على حب الام
_____________________________________
لحد هني انتهى العرس بس بدت احداث جديدة ملهاش حل وبعد وصول عُلا للمحاماة وصلت لمبتغاها هل بتوصل لتبرئة أمها هل بتوصل للحقيقة ولإنجاح في فضح من لَبْس أمها التهم
ومالك شن بيصير فيه وشن قصته وحسب ما فهمنا على شن ناوي ومن يكون؟!
