نزلنا وكان هناك ثلاتة شباب من غير راكان وواحد منهم مالك خشوا البنات واني قعدت واقفة نشوفلهم قالي راكان باستغراب:خيرك؟!
اني:منيش خاشة🙂
راكان:نسيت انه اول يوم ليك .. تعالي تعالي ولاد خوالك
خشيت وقعدوا يشبحولي الشباب الزوز
راكان:هادي اخت حلا التوأم
واحد منهم:واضح😏
راكان:اسمها عُلا .. علا هادا اللي تكلم توا ابو خشم كبير اسمه رامي نسموا فيه خشم
رامي:كذاب واللهي لا انت بس
راكان:والتاني اسمه عمَّار وبارد لنم وتافه حد النخاع زينا
اني:يعني عندك توأم روحي
عمَّار:روْحِي ولا تعالي
اني:والله انك تافه حق😂
مستريحتش ليهم مشيت قعمزت بحدا مالك بعيد عليه شوي وقَعَدت حاضنة رجليا بيديا وهما فتحوا فليم رعب!🙄حلا مقعمزة جنب راكان وريان ورزان مقعمزين بحدا بعض وشادين في بعض
اني نهمس لروحي:توا وقت فيلم هوا
مالك:نفس كلامي لكن هذا روتينهم كل اسبوع يحضروا في فيلم وانت جيتي في يوم فيلم الرعب
اني:نبي نمشي نرقد
شوية والبنات صيحوا وريان ورزان حصنوا بعض اما حلا لصقت في راكان وهوا يضحك واني باردة اما رامي يدير في روحه مش خايف وهوا خايف اما عمَّار كان شبه راقد وينوض كل مايصيحوا البنات
تم الفيلم وكلهم كانوا راقدين طلعت برا نتفرج على القمر لحقني مالك وقعمز جنبي
مالك:عُلا؟
اني:نعم
مالك:احكيلي كيف جبتي خالتي وان راكان
وقعمز جنبي قعدت نشبحله بعدين سرحت نذكر واني نشرحله:بعد ما بديت في خطتي مع صالحة تكلمت مع راكان قتله من هيا خالتي ومرت خالي اللي طلعوا سحارات؟ فجأة وجها تغير وتعلوا عيونه دموع تفاجأت واعتذرت منه قالي امي وتوأم امك قعدت نعتذر بعدين سألته هما وين قالي في الحبس ميبوش يطلعوا لأنهم ميبوش يقابلوا العيلة تاني طلبت منه اني نزورهم لأَنِّي محتاجتلهم قالي تمام رفعني للحبس ونادا خالتي ولما قابلتني قعدت تشبحلي متعرفنيش اني منو واني قعدت نبكي وقتلها اني بنت خديجة بدت تبكي وحضنا بعض وقَعَدت تعتذر وحمالي كل شي قتلها اني محتاجة ليها في القضية هادي قتلي من عيني هادي قبل هادي واتفقنا مع بعض وبعدين قابلت ام راكان وكانت انسانة طيبة وحلوة وقَعَدت تعتذر من ولدها على الموقف اللي بتحطه فيه يوم الجلسة وهوا قالها عادي .. وقَعَدت نتردد عليهم ديما ونجيبلهم في حاجات ووليت رابطتنا قرابة
بعدين قعدت نشوفله لفترة من الوقت وقتله:منيش مقاطعة صالحة وخالتي ومرت خالي مهما داروا اني نحبهم
قعد يشوفلي باستغراب بعدين ابتسم وقال:ديري اللي يريحك واللي تشوفي فيه احسن ليك
مشت الأيام عادي وملل والروتين بايخ ابيخ من حيات بنات الاعدادي🙂🙂
_____________________________________
بعد فترة خطبت رزان لايهم ووافقت بس تبي تكمل قرايتها قبل ومشت كل الأمور عادي الى ان...
في يوم نضت ونزلت تفطر كانت الجو متوتر واني لاحظت الشيء هذا بس مبيتش نبين وقلت:صباح الخير
ردوا:صباح النور
مالك:خميرة راقدة لا توا؟!
اني😒:صباح يا فتاح
علي:اسكت انت وياها، عُلا تعالي قعمزي بش تآكلي
اني:لا الحمدلله صائمة اليوم اني
راكان:دين ولا اجر
ضربه جدي باللقاحة على راسه😂😂 وجني سكتنا ولا حد زاد حرف😁
قعمزت معاهم وشديت تليفوني هدرزت على ايناس بعدين صكرت لما تنحنح جدي وواضع انه عنده شن يقول في اللحظة هيا .. زدت تاكدت لما الكل سكتوا والتفتوا جيهته
علي:عُلا اسمعي يا بنت تعالي قعمزي هني
سكرت تليفوني بس فتحت التسجيل وحطيته في جيبي الله اعلم شن السبب .. قعمزت بحداه واني نفكر شن بيقولوا؟
طبعاً اني منبيش نتكلم باش ميطلعش صوتي في التسجيل لأَنِّي منحبش نسمعه😅😅
علي:والله مشعارف كيف بنبدا
راكان:بِسْم الله والصلاة والسلام على رسول الله
ضربه خالي برجله😂سكت وشاد رجله وقريب يعيط وكلما نشبحوا لجدي اللي بدّي:عُلا انت مليكش الا ثلاثة أسابيع معانا بس معرفتيش قوانين هادا الحوش كويس قعدَ
رفعت حاجبي واني ساكتة وهوا كمل:لكن بما انك خلاص مستقرة هني لازم تعرفيها كويس كويس وهيا صعبة هلبا راه ولكن بِمَا انك خشيتي معاش تقدري تطلعي ومنقدرش تتراجعي
اني نفكر:من حاسب نفسه علّام في عدنان ولينا؟!🤔
جدي بدّي يقول في القوانين وكلهم يشبحولي واني نفكر في كل واخد يقوله توا بالله من جده يتكلم حتى معمر مكانش مداير قوانين لحوشه😒 مرات مندري🌚🌚
طبعاً بعد هذا كله وقفت وقلت:لازم تعطيني وقت نفكر في الحاجات هادي وبعدين ساهل
طبعاً ركبت وفتحت التسجيل وبديت نسمع فيه
>>جدي:1هو ان كل شي هني تحت امري اني وكل شيء يمشي لما انا نقول.فخاطري من حاسب نفسك بس؟!
عبدالحميد:بابنتي لازم تفهمي انك لما بتعيشي هني حتى زواجك بيقرره جدك تمام؟
في نفسي:لاء مش تمام🙂🙂
جدي:2ملاك هوا وراكان من اهم أفراد العيلة
عمَّار بالمعنى:ان حني طراطير
جدي:بالزبط👌🏻
جدي:3اي شي نقوله يتنفذ واللي يقوله مالك ولا راكان يتنفذ لانه كأنه امري اني
4نتزوجوا في بَعضُنَا وناخذوش البراني الا لو اني واقفت
فخاطري تفكرت رواية عائلة من جهنم لاروى الطاهر شكله بيصير فيا هلبا هني😶😶
جدي:5من حقك تطلعي ونشرب شن تبي وتلبسي شن تبي بس انك تفكري تجيبي العار للعيلة مينغفرش
6اي شي تبيه كلميني وقوليلي وإذا حد قالك لا تعالي أسئلني اني
حلا:7الزواج فيه قانون للإعمار حسب الأشخاص💔
واضح ان القانون هادا راجع حلا لسبب معرفتاش
جدي:يابنيتي ياحلا عارفتني منحبش نشوفك هكي لكن القانون قانون جربي تفكري بـ...
حلا قاطعاته بعياط:لاء مستحيل
بعدين قالت:اسفة
تنهد مشي مالك قال:جو اني حرة في قراراتي فوتيه تمام
اني مدورتاش وقَعَدت نسمع وكانوا هلبا قوانين المهم تو نعرف شن أنفذ اني منهم<<
سكرت التسجيل ولقيت يوسف ولد عني انتظار رديت عليه:السلام عليكم🙃
يوسف:وعليكم .. اسمعي بنقولك تعالي اسمعيهم شن يقولوا يبوا يزوجونا اني وانت جداك هيا وامي وبوك مسكرين روسهم
اني وقف بسرعة وساويت حوايجي حطيت وشاح ونزلت جري وقتله:تمام جاية مسافة الطريق
سكرت وكلهم يشوفولي جدي:على خير
اني😌:حاجة تخصني
وطلعت جري وخديت تمشي وصلني عطيته فلوسه ونزلت ولما وصلت لقيت خوتي وعماتي في المربوعة وولاد عماني وجداي وعماتي خشيت بقوة وقلت:ترا وحد منكم يشرولي شن فيه
عمي جلا:تستور .. هكي يابنت بدون احم ولا السلام عليكم ولا اهلًا عمامي
اني:لا عمامي لاشي من اللي بيزوجني؟
كلهم شبحوا لي يوسف اللي دار روحه احول🙄 وبعدين شبحتلي وقالت عمتي:انت فاهمة غلط ماهو...
اني ربعت يدي:لا غلط لاشيء ناقصني نفخ راس واني توا كنت عند هداكا التاني وحتى هوا عطاني عرم قوانين نص امهم على الزواج .. مني اللي اقترح عليكم ادورولي عريس بالله مني؟!
سراج:عُلا تفضلي سكري الباب وافهمي قبل ماتتكلمي
سكرت الباب وقَعَدت واقفة وكلهم منزلين روسهم ويوسف يشوفلي بنظرة انتصار{طبعاً حني اصدقاء هلبااا لدرجة ان كل أسرارنا عند بعض مش مجرد ولاد عم}
عمي جلال:والله يابنتي ريهام قالت انها خايفة عليك لان معاش عندك من يسندك وبوك تزوج وانت رفضتي تقعدي معاه وحني والله خايفين عليك و...
اني:صار ريهام صار
بعدين رنت عليها قتلها:حبي شن صار فيك ياللي خايفة عليا شن وصاك عليا حد ولا كيف
سكرت ريهام بخوف اما عُلا طلعت وقالت:جربوا تحاولوا تتدخلوا فيا نوريكم، الله والايام بينا .. اساساً اني جدي هداكا قرر لمن بيعطيني
وطلعت وقربعت الباب وراي وطلعت في الشارع وروحت لحوش بابا خديت ورقة ورخصتي وشنطة صغيرة .. صار كل واخد يبي يزوجني على هواه صار تو انوريكم اني تلعبوا مع مني .. طلعت لمعرض سيارات شريت سيارة من أغلى وحدات فيهم بعدين طلعت بيها واتجهت للزاوية❤️❤️❤️ وصلت ونزلت من السيارة قدام شقة وطقيت الباب فتحتلي بنت صغيرة ونقدت لحضني:عمتو❤️
خشيت وقتلها:ماما وين؟رورو
رنا:ماما ادير في الغدي
خشيت للمطبخ ولما سمعتني تفاجئت وحضنتني وهيا تبكي:عُلا لين وحشة وينك؟
اني:والله خوتي باعوا السيارة وتوا شريت وحدة تانية
مشينا للصالة وقعدنا مقعمزين مع بعض نهدرزوا
ريم:استاحشتك؟
اني:والله حتى اني .. شن معاش كلمك أنس؟
ريم:تخرج وبيروح بعد شهر
اني بفرحة:الحمدلله
[خلوني نقوللكم من هيا ريم .. ريم هيا بنت نديدة خوي أنس قاري عليها فاتحة من لما كانوا في ثانوي .. السبب ان اَهلها توفوا معندهاش وين تمشي وخوالها ميبوهاش وعمام معندهاش .. شفتو خوي شهم😅😅🌚🌚]
ريم:خيرك مضايقة؟
اني:عارفتيني منجيكش الا واني مضايقة وبنكد عليك اسمعي بنقعد معاك هني فترة بعدين سهل
ريم:اقعدي امتا متبي الحوش حوشك
بعدين مشت تكمل في الغدي واني تليفوني يرن مبطلش رديت لما كثر وبالصدفة كانت حلا
حلا:وينك يابنت؟!
اني:اسمعي اني منيش مولية غادي لفترة طويييييلة بس مرات نولي ومرات لا فلهم ميقلقوش عليا تمام
وصكرت ولوحت الشفرة من التليفون حطيتها في المكتبة في كتاب وبعدين اتكيت على الصالون ورقدت
ميتخشموش ناس متخلفة والله متفهميلها راس من ساس كلها تفكر في كيف تخلي الكل يمشوا على مسفها وخلاص يارب خوذلي حقي منهم بس هادا يلي نبيه حتى لو متت بعدين💔💔💔
_____________________________________
ما تخلوا حماسكم ينطفئ حني بعدين في البداية ترا👌🏻👌🏻😏😏🌺🌺
