أزيك يازميلى ...... فاكرنى !!!؟
أنا منصور البواب ,
الأستاذ بكر المحامى شغلنى فى قصر الدوسرى علشان أراقب صمد الدوسرى وأنقله كل أخباره .
الحوار بدأ لما نادالى صمد فى يوم وقالى أشيل الطبق , اللى كان قيصر بيأكله فيه العضم زى الكلب , جيت وشيلت الطبق ومشيت شويه لقيته بيندهلى تانى
وبيقولى :
خد الكرسى ده كمان وارميه فى أى داهيه!!!
وشاورلى على الكرسى الخشب المخروم .
فرجعت تانى علشان أشيل الكرسى , فلقيته تقيل أوى لدرجه أنى مقدرتش أزيحه حتى من مكانه .
فقلت لصمد:
الكرسى تقيل أوى يازميلى , ماتيجى تشيله معايا
فقالى:
شوف حد يشيله معاك يامنصور متقرفنيش !!!
فروحت للكردى والطبق فى أيدى , كان واقف ومعاه 5 من رجالته , اللى كانوا رجالة القيصر .
قولتله :
أزيك يازميلى ؟!!
بصلى من فوق لتحت ومردش عليا ..
فكملت كلامى وقولتله :
معلش يازميلى , ممكن تقول لحد من الرجاله يجى يشيل معايا حاجه ونطلعها بره القصر ؟!!!
بصلى بس المره دى
قالى وهو بيزعق فيا :
غور ياله من هنا !!!
فخدت نفسى وجريت من قدامه , ورحت للأسوانى وأبو بشله واللى زعقوا فى وشى برده !!!
فكلمت عيل صاحبى شغال قريب من المنطقة فى مخزن منظفات , كان بيعدى عليا على طول بالتروسيكل أسمه " علوله المترمل " وسموه المترمل علشان الترامادول والبرشام اللى على طول بيبلبعه , لدرجة أنه من كتر البرشام وشه كرمش وبقى شبه صفيحة السمنه !!
علوله المترمل بيضرب أى حاجه يشك بس أنها ممكن تعمل دماغ !!
ضرب كل أنواع المخدرات اللى ممكن تتخيلها واللى مش ممكن تتخيلها ترامادول , تامول , برونفكين وتركبيات دوا كحه , أمتريل بتاع الصرع, حتى حقن طلق النسوان !!!
قلت لعلوله يجيلى على القصر ومعاه التروسيكل علشان نشيل الكرسى على التروسيكل ونرميه فى أى مقلب زباله .
جالى علوله بعد ماكلمته بساعه , ودخل عليا بالتروسيكل وهو بيتمطوح هوه والتروسيكل , كان عميان برشام مش شايف قدامه , بصيت على التروسيكل لقيته مخبوط جامد .
فقلته :
واله ياعلوله أنت عملت حادثه وأنت جاى !!؟
حرك شفايفه وكان عايز يقول حاجه بس ماطلعش صوت !!!
فهزيته بأيدى وأنا بقولته :
علوله ,أنت فايق ؟!! بقولك أنت عملت حادثه بالتروسيكل !!؟
أنت تقرأ
كاليفورنيوم 2 (مكتمل)
Akcja3 شبان يعثرون علي كرسي يحتوى بداخله علي مادة الكاليفورنيوم (ثانى أغلى مادة على وجه الأرض) يقررون بيعه علي الديب ويب ويتورطون مع عصابات خطيرة
