Mia cara Palermo si na bedda stidda
china ri luci e pi sempri picciridda
Tra tutti li carusi si a me favorita
nuddu comu a ttia e accussi sapurita
Mia cara Palermo cu tanti purtuni
Un'avemu i chiavi ma semu patruni
Ne casi è ne strati sintemu a to vuci
e si nuddu parra stu silenziu e duci
Mia cara Palermo si na granni chiazza
runni si ferma ogni populu e razza
Ca prima arriva e dopu sinni parti
e nni lassa ricchi di là so arti
Mia cara Palermo si u beni ri Diu
na tavula runni manciu e m'arricriu
Ra baddarò o capu è na vucciria
picchi cu vinni 'nzoccu avi abbannia
Mia cara Palermo si ghiochi o Barbera
ca rosa ri venti si smovi a bannera
Sé quattru canti si ferma u fistinu
'ncapu a stu munti acchiana u piddirinu
Mia cara Palermo mi fa fari i cianchi
cu Cicciu Ingrassia e Francu Franchi
Si atturi i tiatru ca recita un branu
graziusu stu pupu ca spada 'nte manu
