«لـــو!»✔️⁩

" ١٢. ورد قلبُـه ."

"بارك الله لكما وبارك عليكما وجمع بينكما في خير، بالرفاء والبنين إن شاء الله ."

إيذانًا وميثاقًا لحبي ليه، بقيت بتاعته وملكه وحبيبته ودنيته كلها ..

وهو! .. هو بقى ليا، من حقي!

ياااه، مش متخيلة، مش قادرة أصدق إني بقيت مراته!!
وهو .. بقى جوزي!

عايزة أصرخ للدنيا كلها إني بحبه أوي، حقيقي بحبه أوي ..

خلّوني أحكي باختصار اللي حصل، من بعد الحادثة بإسبوعين، زين خرج من المستشفى يكمل علاجه في البيت، ولأول مرة نروح نزوره أنا وماما في بيته، عند مامته ..

ماما يومها قعدت مع مامته كتير جدًا وكان واضح إنها بتحاول تقنعها بحاجة، واللي اكتشفت في الآخر إنها حبنا لبعض .. أنا وزين، وإنها متفرقناش وإني عارفة كل حاجة عنه وعن حبه لداليا وراضية بيه ..

قعدنا إسبوع كمان بعدها لحد ما زين بقى كويس جدًا وفي يوم قال لي ألبس فستان حلو جدًا عشان عامل لي مفاجأة، رُحت لقيته قاعد مع مامته مع بابا وماما وبيطلب إيدي💙

يومها كنت مصدومة جدًا، إزاي وفين وامتى وليه!!ا

زين قال لبابا إنه بيحبني جدًا ومستعد لأي طلبات، بشرط إننا هنتخطب شهر بالظبط وفي آخره نعمل الفرح وكتب الكتاب ..

وحاليًا .. إحنا بالفعل كتبنا الكتاب وفي الفرح💙

الناس بدأت تبارك لنا، وخلصنا .. وجيه وقت الرقصة💙

زين هو اللي اختارها وفضولي كان مموتني أعرف اختار إيه لأنه ملوش تجارب مع الأغاني الرومانسية ..

" منغير ما أحكي لك عن بكره، ولا أجيب لك سيرة عن الماضي .. أنا عمري ما عشت إلا في قربك .. واسألي في عينيكِ على ميلادي .. أنا قصة انكتبت على إيدك من أول سطر!، مش عارف عني غير اللي انتِ عني عرفتيه .. بدأت وأنا جنبك أيامي الحلوين في العمر .. محلمتش بيكِ لكن هحلم .. بعديكِ بمين!"

زين كان حافظها، فعلًا كان حافظها وبيغنيها بكل مشاعر الحب اللي في الدنيا ..💙

"مبارك عليا انتِ يا ورد قلبي .." قال وهو بيبتسم بحب ..

" مبارك عليا انت يا زين، بجد" كنت بحضنه بعينيا، كل حاجة حلوة ليا ده💙

وأنا!
أنا كنت أسعد مخلوقة في الكون دلوقتي، مش مصدقة إني معاه، بقيت ليه .. ليه وبس!
بعد كل ده، وكل الحب ده، وكل التعب ده، وكل المؤشرات على فراقنا ده .. بس أنا دلوقتي مراته فعلًا!

خلصنا الرقصة وباس جبهتي وشالني ولفّ بيا، وأنا ضحكتي كان كله سامعها، كان باين جدًا في عينيا إني بحبه حب ميتوصفش، وإني فرحانة بيه وإني بقيت ليه أخيرًا ..

قعدنا في الكوشة لحد ما الليلة خلصت وروحنا خلاص، كنت حاسة إني جعانة جدًا، لأني فرحانة جدًا ..