أصبحت خادمة طليقي(قصة قصيرة )

2

مي حكيمة شادة من فمها و كتشوف في جيلالي : اويلي على دري تاتجمع تا تحليتي
انا شادني ضحكة و جيلالي ولا كامل حمر : لا امي حكيمة راه غير عزت عليا
مي حكيمة: مممم عزت عليك
صافي ركبنا في ديك القزديرة لي كلها كتزوي نوبا نوبا تحبس و جيلالي غيفرنس و انا و مي حكيمة نتناقرو و تحلف عليا حتى وصلنا نزلنا كان واحد الدار ديرا فيها مليكة مشروع و رداها شركة صغيرة كتعامل مع دوك ناس لي لباس عليهم لي خاصاه خدامة ولا لي عندو شي حفلة كيعيط ليها دخلنا لقينا فيها بزاف ديال البنات كيتقيدو باش يخدمهم عند الناس لي لباس عليهم كل وحدة و على حساب المؤهلات ديولها و كيخلصو مزيان بقينا داخلين حتى وصلنا لبيرو ديال مليكة و ديك مليكة كبيرة و شارفة و باقا ممزوجاش و كيصحاب ليها راسها باقا صغيرة
مليكة: سلام مي حكيمة لاباس
مي حكيمة: الحمدالله ابنيتي
انا: اويلي علي مي حكيمة و نتي قدك قدها
جمعتها معايا مي حكيمة بقرصة
مليكة: هنتي راني مكنجبدهاش غير على وجعك نتي
مي حكيمة: مسحيها فيها عافا كبيدتي
مليكة : المهيم راه لقيت ليها بلاصة عند واحد الناس لباس عليهم هنتي علميها بلاما تحشميني معاهم فحال لي دارت المرة لي فاتت مع دوك الناس كبت سطل ديال الما على ولدهم
انا: اويلي هو لي تحرش بيا بغيتووني نبقا ساكتة ليه
مليكة: مم على زينك مهيم سربي خلاص خاصك تكوني عند الناس مع جوج هاكي العنوان ..مهيم لبست كيف العادة ديك الكسوة الكحلة حد ركبة فوق منها طابلية بيضة و تقاشر بيضين مع صبيبط كحل (هاد البسة كتعطيها لينا شركة ) لبست جلابتي فوقها وودعت مي حكيمة لي كان عندها ختانة تمشي طيب فيها وصلني جيلالي طريق كاملة وهو طالق عليا سلوقية كتجري باع البكيرات شرا ارض باع خيمة و انا كنجوبو غير بممم مزيان وصلني للفيلا كانت غير صغيورة ماشي شي حاااجة تاني دخلت وصلني الجاردينيي تال الكوزينة لقيت تما شي ربعة الخدامات لابسين بحالي ووحدة لبسة بدلة كحلة صايا كحلة فايتا الركبة و قميجة بيضة و لافيست كحلة ومستقيمة مكينش ريحة الضحكة في فمها ديرة فحال المسطرة
هي: سلام نتي هي مدموزيل صوفيا
انا: ويي سيكي ؟؟ههه
هي: مكنضحكوش هنايا(جمعت الضحكة) حطي دوك الحوايج و تبعيني نوريك شغالك ...انا حطيت جلابتي و تبعتها عطاتني شطابة
هي : سمعي هاد دروج بغيتهم يوليو يشعلو ...و مشات اويلي هاد مالها غطرطق غاراسها مخلاتني تنرتاح شوية يخ تفو على بنادم ممرتاحش ميخلي يرتاح بديت كنشطب و كنكر شوية و هي تمات هابطة واحد البنت مستيليا لبسا شورط قصير بزاف ديال دجين و ديباردو في البيض و طالقا شعرها و كتلعب في تيلي ديالها فكرتني غير فراسي شحال هادي
هي حانيا راسها: شوفي جيبي ليا واحد كاس ديال الما
انا: و علاش مالك احبيبة نتي محنية
هي طلعت راسها فيا : ايكسكيوزمي(عفوا)
انا: كيفما سمعتي مكتشوفينيش مشغولة سيري جيبيه لراسك
هي: واش معايا كتهدري كيفاش تجرئي الخدامة لخرى
انا: ااايه خدامة و حلي بيها فمك
هي : يخ تفو شكون دخل هاد الهماج لهنا
انا: غتسدي فمك و لانجي نوريك الهماج كيف داير الحمارة لخرى
هي : اوميكود مامييي مامييي
ماماها نازلة من الفوق: مالكي ا ملاك كتغوتي اش واقع
هي : شوفي عليا هاد خيتيي وسط داري كتعيرني
ماماها: اايه نتي واش سافا با
انا: مهدرتش معاك نتي بقاي بعيدا هدشي و بيني و بينها خليني محترماك امدام
ماماها: اويليي شكون دخل هاد زبل ديال الزنقة هنا
انا: ايييه عرفي اش كتخرجي من فمك راه غير جيتيني مرة كبيرة اما نوريك الزنقة فين جات
ماماها: اشنو هادشي خاالد ميلودااا
جات ديك المرأة المسطرة و موراها واحد القلدة تبركالله
ماماها: اشنو هاد الحالة لي جبتي ليا اميلودة
ميلودة: سمحليا امدام دابا غنعالج الموقف
انا: هههه دابا هاد الاناقة كاملة و في الاخر سميتك ميلودا
ميلودا: خالد دير خدمتك (داك القلدة جاي لجيهتي)