I ADORE YOU. (COMPLETED)

Chapter-3

(Unicode)

၂၀၂၀ ခုနှစ်၊ ဇန်နဝါရီလ ၆ ရက်။

တမှူး၊ နယုန်နှင့်ဝသုန်တို့ညီအစ်မနှင့်အတူ ကန်တင်းရှိထိုင်နေကျ ဆိုင်ထဲသို့အဝင် စားပွဲဝိုင်းတစ်ခု၌ သူငယ်ချင်းများနှင့်အတူထိုင်နေသော စီနီယာနေရင့်ရောင်ကို တွေ့လိုက်ရသည်။ ယခုရက်ပိုင်း လိုင်းပေါ်တွင် ညတိုင်းစကားပြောဖြစ်ခဲ့ပြီး ရင်းနှီးသလိုရှိခဲ့ပေမဲ့ တကယ့်အပြင်တွင်တော့ တမှူးဘက်က စီနီယာ့ကို စတင်နှုတ်ဆက်ဖို့ ရှိုန်နေသလိုခံစားရသည်။

ထို့ပြင် နယုန်တို့အရှေ့မှာ မိမိက စီနီယာ ယောက်ျားလေးတစ်ဦးနှင့်ရင်းနှီးကြောင်းလည်းမပြချင်။ သိလျှင်ထိုနှစ်ယောက်က ထုံးစံအတိုင်း သင်္ဘောရွက်လွှင့်ကြပေလိမ့်မည်။ ထို့ကြောင် စီနီယာ့ကို မမြင်ချင်ယောင်ဆောင်လိုက်ပြီး မျက်နှာကို လက်ဖြင့်မသိမသာကွယ်လိုက်မိသည်။

အမှန်က ရှက်သောကြောင့်လည်းဖြစ်သည်။ လိုင်းပေါ်တွင် Jayy အကြောင်းပြောလွန်း၍ Jayy ကို သဘောကျသည်ထက်ပိုနေသလားဟု စီနီယာက မေးလာသည်အထိပင်။ မဖြေလည်း စီနီယာရိပ်မိနေလောက်ပြီ။ ဘာကြောင့်ရယ်မသိ စီနီယာနေရင့်ရောင်ကို ယုံကြည်သလို ခံစားရသောကြောင့် စိတ်ထဲရှိသမျှအကုန်ပြောပြီးတာတောင် သိပ်ပြီး စိုးရိမ်တာမျိုးတော့မဖြစ်။

သူတို့သုံးယောက် စီနီယာတို့ စားပွဲဝိုင်းနှင့် ခပ်လှမ်းလှမ်းရှိ ဝိုင်းတစ်ခုတွင်နေရာယူလိုက်ကြပြီး ထိုင်ဖို့ပြင်မိချိန်တွင်

"ဟေး...ကောင်လေး"

မိမိ၏ခုံ အနောက်တည့်တည့်ဆီမှ မိမိဆံပင်ကို ဖွလိုက်သည့်လက်တစ်စုံနှင့်အတူ ခေါ်သံက ပျံ့လွင့်လာသည့်အခါ တမှူး ကိုယ့်နဖူးကိုယ်သာ စိတ်ပျက်လက်ပျက်အုပ်ကိုင်လိုက်မိသည်။ စီနီယာက မြင်ဖြစ်အောင်မြင်သွားသေးလေသည်။ ဘာလဲဆိုသည့် အရှေ့တည့်တည့်မှ စူးစူးစမ်းစမ်းအကြည့်များက တမှူးအပေါ်ကျရောက်လာသည်။

"အာ...စီနီယာ"

အခုမှတွေ့သည့်ပုံစံဖြင့် မသက်မသာ ပြုံးပြလိုက်ရသည်။ စီနီယာက တမှူးဘေးခုံတွင် ဝင်ထိုင်ရင်း