الوعد والرحيل.
الفصل. 20
نانا راحت المصنع.
دخلت مكتبها من غير ما ترمي السلام علي اي حد زي ماهي متعوده
الكل عرف ان نانا زعلانه جدا
جريت وراها داليا السكرتيره.
دخلت وقفلت الباب. وقالت:- اهدي يا نانا مالك كده داخله غضبانه
نانا بصوت عال:- اهدا ايه وزفت ايه ! انا بقالي احداشر سنه في المصنع ده عمر ما طلبيه رجعت
اذاي في خلال شهرين طلبيتين يرجعو
واشمعني في الظروف دي
هو انتو فاكرين ان غيابي معناه ان الدنيا سايبه
اجمعي لي كل العمال والصنايعيه والمحاسبين والمروجين والمناديب بسرعه
داليا:- طيب خليها وقت البريك.
نانا:- انا قولت دلوقت. ولو سمحتي اسمعي من اول كلمه بلاش مناهده انا مش ناقصه
جريت داليا وجمعت الجميع قدام مكتب نانا.
خرجت نانا حاطه ايديها ورا ضهرها.
وقالت.:- العمال يروحو يجيبو البضاعه اللي رجعت
وبالفعل جابوا الطرود اللي فيها البضاعه.
وقالت نانا. لواحد منهم. افتح
فتح اول طرد. شافت نانا. فيه خطأ في التصميم.
قالت للعامل افتح الطرد التاني
فتح العامل الطرد التاني وكانت نفس المشكله.
نانا. :- مين المسؤل عن شحن الطلبيه دي وتسليمها؟
داليا:- رأفت.
رأفت:- يا استاذه الخطأفي الصميم انا ماليش............
قاطعته نانا:- هو انت بتشحن بطاطس
بتعبي وترمي
دانت شغلتك تفرز ولو فيه حبه مش مطابقه تخرجها.
رأفت:- يا استاذه انا قولت للاستاذ احمد......
قاطعته نانا:- ششششششش خصم عشر ايام
نانا:- ومين اللي اشتغل علي الماكينه؟
داليا:- حسام
حسام:- انا جالي التصميم. وزي كل مره بنفذ المطلوب
نانا:- وهو يا حسام انت من امتي شغال معايا؟
حسام:- من خمس سنين
نانا:-من امتي مصنعي بيعمل الشغل ده
من امتي الاخطاء دي بنخرجها من مصنعنا.
حسام:- انا ماليش ذنب.....
قاطعته نانا:- خصم عشر ايام.
وخصم لكل موظف في المصنع بعد دول. يومين
داليا:- والباقيين ذنبهم ايه بس!
نانا:- السيئه بتعم. دي خساره علينا كلنا. ولازم نتحملها.
علشان بعد كده ماحدش يشوف الغلط ويسكت عليه
امجد بنبره ضاحكه:- اهدي يا خالتي. بقي
هدي اعصابك ، اعمليلها يا داليا لمون
نانا:- تعالي يا اشرقت
اشرقت:- نعم يا استاذه
نانا:- امجد اما جه يطبع التصميم قولتيله ايه!
اشرقت:- قولتله علي الخطأ .، قالي مالكيش فيه
امجد بغضب:- هو انتي حاطاها جاسوسه علينا
نانا بصراخ:- ما اسمحلكش. اللي انت عملته واضح للكل
والغلط ده مقصود
وحضرتك اتسببت للكل في الخصم
وانا ماجبتش اسمك في الخصم مش علشان حضرتك شريك في الشغل. اطلاقا.
انت شريك. وهتتحمل نص البضاعه اللي رجعت دي.
امجد:- نانا انا قولت اعمل ديفوهات جديده.
نانا:- انا مش حقل تجربه.
انا شغلي عمره ماحصل فيه كده
واللي عايز يستمر هنا. يشتغل كويس وبضمير
انا مش مقصره مع حد فيكم.
