تلبيس إبليس

- 15 -

مرت الأيام ومنى تزداد في الطاعات وأصبحت تواظب على أداء الفروض والنوافل وتغير أسلوب حياتها.. حتى أهلها شعروا بذلك .... هم غير ملتزمين ولكن كانوا سعداء جدا بالتغير المفاجئ لمنى ... دخل والد منى حجرتها فوجدها تنهي صلاتها ...

الأب مداعباً ابنته : حرماً يا ست الشيخة

منى وهي تضحك : ماشي ماشي بتتريق عليا كده برضه

الأب : انا اقدر برضه ... ربنا يكرمك يا حبيبتي

ردت منى بلهجة ذات مغزى : عقبال ما يكرمك ياااااااااااااا رب

( كان والد منى تارك للصلاة بالرغم من قيامه بأداء العمرة أكثر من مرة وقد حاولت منى معه أكثر من مرة إلا أن محاولاتها جميعاً قد فشلت )

الأب : ممممممممم يا رب.. انا هروح أشتغل شوية

منى مداعبة: ماشي ماشي اهرب مني وسيبني ... بس برضه وراك وراك ... كده برضه يا بابا ده كله إلا الصلاة أنا حتى مش بقولك صلي في المسجد زي اللي بيصلوا ولا صلي نوافل بس ده فرض ربنا ... أنا مش متخيلة ازاي حد يشوف الكعبة بعينه وأكتر من مرة ويضيع الصلاة

الأب محاولاً إخفاء إحراجه : أنا صليت في الحرم كتير وبعدين الصلاة في الحرم بمية الف صلاة

منى : يا سلام يعني حضرتك يا بابا يوم ما تقف بين ايدين ربنا ويقولك مكنتش بتصلي ليه هتقوله كده ؟؟؟ وبعدين لو كانت الحكاية سهلة اوي كده كان كل الناس بقى راحوا صلوا في الحرم وفضلوا طول حياتهم مش بيصلوا

الأب وهو لم يعد يجد ما يقول: بصي اهم حاجة اللي جوايا وخلاص

منى : عارف يا بابا لو كان اللي جواك فعلاً حب ربنا مكنتش قلت الكلمة ديه لأن لو كان جواك بيحب ربنا مكنش فوت ولا فرض ولا سنة ولا أي صلاة.. لأن اللي جواه حاجة لازم تظهر عليه من بره ... كل إناء ينضح بما فيه ... عشان خاطري إلا الصلاة ديه اول حاجة هنتحاسب عليها يلا قوم صلي دلوقتي عشان خاطري.

الأب تاركا الغرفة : إن شاء الله

منى : ماشي ماشي ... يوم القيامة هتفتكر اليوم ده وتقول ياريتني كنت سمعت كلامها وصليت ساعتها ... بس برضه وراك وراك ...

ذهب والد منى وترك في قلبها حزن شديد فهي تتمنى لو أن يصبح ملتزماً بتعاليم دينه ... اخذت منى تدعو ربها بأن يهديه ويصلح حاله وكان قلبها يعتصر من الحزن والألم فاغتنم شيطانها تلك الفرصة ...

الشيطان موسوساً : مفيش فايدة من الكلام ده كله انتي بتدعيله زي ما تكوني بتدعي عليه

منى : لالالالالا استغفر الله ايه الكلام ده ... إن شاء الله ربنا يهديه انا واثقة في ربنا اوي

الشيطان موسوساً : يا بنتي مفيش فايدة من الدعاء ادعي لنفسك أحسن .. ربنا لو كان عايز يهديه كان هداه من زمان ... أكيد مش مستني انك تدعيله يعني