تلبيس إبليس

الحلقة الأخيرة

👌📩مبدئياً كده اللى قرأ القصة واللى مقرأهاش ياريت بجد تقرأ الحلقة الأخيرة وتقولولى رأيكم ..

انتهت فترة الإمتحانات وبدأت الأجازة أخيراً .... وكانت كل واحدة من الفتيات قد وضعت خطة مسبقة لقضاء تلك الأجازة .....

بدأت دينا بالتماثل للشفاء في غضون فترة وجيزة منذ بداية العلاج كانت تصلي وتدعو في تلك الفترة.. وكانت دائماً ما تذكر في دعائها بأنها لن تعود لمثل هذا أبداً ....

أما ندى فمن الواضح أن إنذارات الله معها لم تجعلها تتعظ وترجع عما هي فيه ....تطورت علاقتها كثيراً بحسام وتخطت حدود ما يسمى بالصداقة ....هو لم يصارحها بطريقة مباشرة ولكن كان دوماً ما يقوم ببعض التلميحات ... جلست يوماً تحادثه عبر الإيميل ...

حسام : انتي مزهقتيش من البيت ولا ايه ؟؟

ندى : ليه

حسام : لا عادي ....بس كنت عايز اشوفك يعني

ندى : مممممممم خلاص نكلم دينا وعمرو ونخرج يوم كده

حسام : هو لازم دينا وعمرو يعني ؟؟

ندى : انت مش عايز تخرج معاهم ؟؟؟

حسام : لا عادي ... بس انا بصراحة مخنوق اوي ومش عايز احكي حاجة قدام حد

ندى : مالك فيه ايه ؟؟؟ متقلقنيش عليك ..

حسام : لا ولا قلق ولا حاجة لما اشوفك ابقى احكيلك مش هينفع على الميل

ندى : طب قول اي حاجة دلوقتي ..كل ده ومش عايزني اقلق

حسام : مش عارف اقولك ايه بجد ربنا يخليكي ليا ... انتي إنسانة جميلة أوي وطيبة ولو لفيت الدنيا مش هلاقي صاحبة زيك

ندى :

حسام : سكتي ليه ؟؟

ندى : أبداً

حسام : ممكن أسألك سؤال ؟؟

ندى : اتفضل

حسام : انتي ممكن ترتبطي دلوقتي ؟؟

همت ندى بأن ترد ولكن جاءها صوت والدها من خلفها : الله الله

انتفضت ندى بشدة وارتبكت ولم تستطع التصرف ...

الأب : ما تردي عليه يا هانم ... ما تكملي اللي بتعمليه ...ويا ترى بتعملي اي كمان من ورايا

ندى ودموعها تنهمر : دي أول وآخر مرة يا بابا

الأب : كدابة في اصل وشك ..ربنا ما بيفضحش حد من أول مرة أبداً ..... وأخذ يصرخ فيها : أنا معرفتش اربيكي ...خسارة فيكي كل حاجة بعملهالك ...علمتك احسن تعليم محرمتكيش من حاجة وانتي ماشية على حل شعرك ....

أقبلت الأم في ذلك الحين : ايه ايه ...صوتك واصل لآخر الدنيا في ايه ؟؟

الأب : تعالي يا هانم شوفي بنتك اللي خسارة فيها التربية بتكلم واحد ويا عالم كمان بيحصل ايه ...منك لله يا ندى حسبي الله ونعم الوكيل فيكي قصرتي رقبتي روحي يا شيخة منك لله