تلبيس إبليس

- 23 -

عملت منى بنصيحة أميرة وكانت تهتم برنا كثيراً ...توقظها لصلاة القيام والفجر ....تخبرها بمواعيد الدروس الدينية ... وتذاكر معها أيضاً ...كانت رنا تتقدم في العبادة بسرعة شديدة فكانت تفعل من الطاعات ما يفعله الملتزمون منذ زمن ....

كانت تريد أن تلتزم كل من ندى ودينا وكانت دائمة الحرص على الاتصال بندى و إسداء النصح لها لما علمت ما بداخلها من خير ...اتصلت بها في يوم ....

رنا : السلام عليكم

ندى : وعليكم السلام

رنا : ايه يا بنتي عمالة اتصل بيكي بقالي اكتر من اربع ساعات يقولولي لسه مجتش ورصيدي خلص معرفتش اكلمك على الموبايل...كنتي فين كل ده انا سيباكي من بدري في الكلية...

ندى : لا عادي زهقنا شوية من الكلية فخرجت انا ودينا وعمرو و... ارتبكت ندى ولم تكمل

قالت رنا بدهشة : انتي ودينا وعمرو وحسام مش كده

ندى : اه وفيها ايه ؟؟؟

رنا : طب في البيت يعرفوا

ندى : لا ما يعرفوش

رنا : طب لما يعرفوا هيعملوا ايه ؟؟؟ هيتضايقوا ولا عادي

صمتت ندى قليلاً ثم قالت : عادي يعني ..ما هي ماما عارفة عمرو وحسام

رنا : بس تعرف إنهم زمايلك في الكلية مش بتخرجي معاهم بره

ندى : رنا انتي كذا مرة تلمحيلي على عمرو وحسام وأنا اعديها.. أنا مش بعمل حاجة غلط.... انتي كنتي كده انتي كمان ولا نسيتي ؟؟

ابتلعت رنا تلك الكلمة ثم عادت لتقول بنبرة فيها شئ من الحزن والندم : ماشي يا ندى كنتت بكلمهم واهزر معاهم بس موصلتش إني اخرج معاهم بره الكلية وانا دلوقتي ربنا يعلم أنا ندمانة اد ايه على كل لحظة وقفت معاهم فيها ...وبعدين افرضي كان ابوكي بالصدفة شافك ولا حد من قرايبك ...ربنا سترها المرة ديه الله أعلم المرة الجاية ايه اللي هيحصل

ندى : رنا قفلي على الموضوع ده بقى ....انا راجعة تعبانة وعايزة انام ....سلام

رنا : ماشي يا ندى زي ما تحبي ....سلام

انهت رنا المكالمة وشعرت بحسرة شديدة لكل ما فعلته في السابق ...ومن تلميحات ندى ..

رنا : يا رب ... يا رب استرني يا رب ومحدش يعرف اني كنت بكلم ولاد ..

الشيطان موسوساً : ربنا ممكن يكون بيذلك بسبب اللي انتي عملتيه

رنا : لا لو أي حد عرف يبقى السبب مني أنا ... أنا اللي عملت كده في نفسي ... أنا اللي اتجاهلت كام رسالة جاتلي من ربنا ...كام مرة منى كلمتني ونصحتني ... وكام مرة ماما تدخل عليا وانا بكلم حسام او عمرو على النت وربنا يسترها معايا ومتعرفش حاجة ....بس يا رب والله أنا ندمانة أوي متفضحنيش بذنوبي