تلبيس إبليس

- 20 -

في صباح اليوم التالي ذهبت منى وأميرة إلى الكلية باكراً كالمعتاد وجلست كل منها تتحدث إلى الأخرى ...

منى : ها جبتي كراستك ولا لا ؟

أميرة : اه جبتها اهو .. شكلك انتي اللي نسيتيها

منى : لا انا اقدر برضه ... بس قوليلي كتبتي فيها كل حاجة ولا مخبية حاجة كده ولا كده

أميرة : كاتبة فيها كل كلمة ... مش زي ناس انا ..اتفضلي شوفي بنفسك ...

ضحكت منى وقالت : ماشي ماشي .. وريني ...

نظرت منى بدهشة وقالت : ايه ده؟؟ كل ده !! لحقتي تعملي امتى ده كله ؟؟

ضحكت أميرة وقالت : انتي هتحسديني ولا ايه ؟؟ اهو ده اللي كنت خايفة منه ..

منى : لا يا ستي اللهم بارك ...ما شاء الله لا قوة إلا بالله .. كويس كده ؟؟

قالت أميرة : مش عارفة ليه مش حاسة إنها من قلبك ...يلا زي بعضه ... وريني انتي بقى ..

منى : اوريكي ايه بقى ... بلاش كسوف ..

أميرة : اااااااااه بتخبي من أولها اهو ..

منى : ولا بخبي ولا حاجة هخبي على ايه يعني شوفي اهي ..

أخذت أميرة تتصفح الكراسة وقالت : طب ما هي حلوة اهي وفيها افكار جميلة ما شاء الله

منى : علطول رافعة من روحي المعنوية ... انا عشان اعمل كراسة محترمة كده لازم افضل أسبوعين كده أسمع دروس كتير ...النهاردة هقضيها طول اليوم دروس في دروس

أميرة : والمذاكرة يا أنسة ؟؟! الامتحانات على الابواب .

منى : مذاكرة ايه وبتاع ايه دلوقتي ..

أميرة بدهشة : مذاكرة ايه وبتاع ايه ؟؟!! انتي بتهزري يا بنتي ... مذاكرتك ديه حياتك ومستقبلك ... انا عايزة افهم بس انتي ايه طموحك في الدعوة ؟؟

منى : طموحي اني مسيبش ولا حد من قرايبي ولا صحابي ولا اي حد غير لما ربنا يهديه ..

أميرة : بس كده ؟!!

منى : انتي قصدك الدعوة على النت ؟؟؟ هبقى اعمل برضه مواضيع دعوية ..

أميرة : ماشي الكلام ده جميل ومطلوب طبعاً ... بس افرضي واحدة من البنات اللي في الكلية سألتك مرة عن مجموعك هتقوليلها ايه لو مثلاً جبتي مقبول او طلعتي بمادتين لا قدر الله ؟؟؟ البنت اللي نفسك ربنا يهديها لما تلاقي الملتزمات مش ناجحين في دراستهم تفتكري ممكن تفكر اصلاً في الالتزام ؟؟! الملتزم ده قدوة يعني لازم على قد ما ربنا يقدره لازم يكون كويس في كل حاجة ..
طبيعي ممكن يكون في جوانب تقصير...بس الصورة العامة لازم تكون كويسة ...

منى : طب وانا هلاحق على ايه ولا ايه .. الدعوة ولا المذاكرة ولا العبادة ..

أميرة : وانتي ليه بتفصلي كل دول عن بعض ؟؟؟ كل دول حاجة واحدة ..المذاكرة المفروض تكون عبادة .. النتيجة اللي هتيجي من المذاكرة ديه هتستخدميها في الدعوة .. وإلا بتكوني بتحققي الصورة الموجودة عند كتير من الناس عن الملتزمين ..انهم مش فالحين غير في الصلاة والصوم وبس ومذاكرتهم في الضياع ...