#نصيبي 💞 حلقة 14 💞
بعدها قمتله راسه ومسحتله دموعه
محمد قعد يشوفلي وعيونه دموع وبعدها حوللي يدي وخدي نفس
اني : كله قضاء وقدر
محمد : لو كان صارتله حاجه اني كيف بندير
اني : لالا بااذن الله حاينوض وحالته حاتتحسن ادعيله بس
محمد حط يده في جيبه وطلع طرف تاني
خديته منه ولوحته من البلكونة
محمد : قتلك معاش تدخلي
اني : سادك اتقي الله في روحك
نسمع في رغد تتكلم وتقول مراااد كلمني الحمد لله ياربي
قعدنا اني ومحمد نشوفوا لي بعض وخشينا جري
محمد : مرااد يامراد تسمع فيا
مراد : اني وين وانت مني
رغد شافت لينا وهزت راسها
اني قربت منه : هذا محمد خوك نسيت ولا شني واحني بنات عمك
مراد يشوفلنا : علاش اني اهني شن صار معاي
محمد : خيره هذا
اني : مأثر فيه البنج قعد تو يتحسن
محمد : ارتاح توا خلي نكلم امي اني
اني شفت لساعتي
محمد : قداش الساعه
اني : 1 وربع
محمد : بينها توا اكيد راقدة
بعدها مشي شور مراد وقعد يكلم فيه ويبتسم
محمد : كيف حالك تو
مراد : كويس هاني زي الجن
محمد : نعطيك تكلم بوي ولا امي
مراد : لا بينهم تو غذوة نكلمهم خلي يتريحوا
اني : كانوا اهني هما
شوي ورن تلفون عمي محمد : هادي عمتي
وطلع للبلكونة
اني اتكتيت ع الصالون من التعب رفعني النوم اول ماحطيت راسي
رغد : نعطيك امية
مراد ضحك : خفتي اعليا ياحبي
رغد : طبيعي نخاف ع ولد عمي 😌
مراد : ولد عمك بس (yo)
رغد : بس بس
مراد : هههه به سدنيني نخش للحمام
رغد : مهبول انت ولا شني الدكتور قال ماتتحركش
مراد : الضربة جاية في صدري مش في رجلياا
رغد : تقدر تمشي يعني
مراد : ماتخافيش هيا سنديني
رغد حطت يد مراد ع كتفها وقعدت توقف فيه بالشوية
مراد عيط : استني استنيييي
شوي وطاح
رغد عيطت حتى هيا : مراد خيييرك مش قتلي نقدر
اني نضت من النوم مخلوعة : خيركم بسم الله شن فيه
مراد : هاتي يدك
وقعد شاد في رغد ويحاول ينوض بس ماقدرش
رغد : جمانة تعالي ساعديني
محمد خش من البلكونة : شن فيه .. وقعد يجري لي مراد
رغد : قيمه معاي ع السرير
هي شد روحك يامراد
مراد منزل راسه ودموعه ينزلوا
اني : مراد خيرك تبكي
رغد نزلت ع ركابها : مراد خيرك نوض بالله اعليك
مراد : مانقدرش
محمد كان ساكت وخانقاته العبرة
اني : محمد قول حاجة
محمد شافلي وبعدها فتح الباب وطلع
وشدينا مراد اني و رغد وحطيناه ع السرير
مراد : اني الباين صارلي شلل
رغد تبكي : لا ماتقولش هكي
مراد : شن فيها اني راضي بحكم ربي إلي مانرضاش بيه انه حد يشفق اعليا بس
قطعلي قلبي اقسم بالله ومعاش تحملت طلعت بنشوف الدكتور لقيت محمد مقعمز ع الكرسي وحاط يديه ع راسه
اني نزلت ع ركابي : أنت مخبي حاجة وماتبيش تقولنا
محمد حول يديه : مراد عنده شلل نصفي
حطيت يدي ع قلبي : والله
محمد : اي والله
اني : اكيد ليه علاج
محمد : مااضنش
اني : معاش اضايق روحك اهم شيء انه عايش والله بكري شفت مناظر يرعشوا
محمد وقف وحط يده ع الحيط : اني مضايق اعليه وع نفسيته
اني سكتت معاش عرفت شن نقول
تاني يوم احني روحنا وعيلة عمي مشوله كلهم
مرو اسبوعين وطلعوه من المستشفى نفسيته زي الزفت و رغد احرف منه لا تأكل ولا تشرب
جاء يوم ومقعمزة اني ومنيرة وعمتي نجاح في الكوجينة ونطيبوا
منيرة : وين خولة ليها ايامات مابانتش
عمتي : قعدة تعاني في مراد مسكينة ربي يكون في عونها
اني : ولدها شن بتلوحه
منيرة : مراد قعد في المربوعة مش فوق
عمتي : مالا تو تنزل
رغد كانت تسمع من وراء الباب ومشت تجري ع المربوعة لقت ملاك كيف طالعه منها
رغد : من فيه اهني
ملاك : مراد يتفرج
رغد : من نزله
ملاك : بوي
رغد : بروحه ؟
ملاك : تي اي بروحه
ومشت
رغد خدت نفس وقلبها كان يدق بطريقة غريبة وخشتله
مراد طفى التلفزيون : تعالي
رغد قربت منه ونزلت ع ركابها وشدت يدها : مراد أنت تحبني
مراد ضحك : فاش جاء السؤال هذا توا
رغد : غير قول
مراد : نحبك
رغد : احلف
مراد : مكذبتيني يافرخة هيا كلمة وحدة نحبك معناها نحبك وعلاش تسئلي وشادة
رغد : به .......يتبع>
