🦋 عزيزتي أنا 🦋
....قبل ما نحاول نرسم الحياة السعيدة قدامك ، و قبل ما نبدا نكدب و نخلي مخيلتي تجبدك غادي نقول ليك الحقيقة لي بجوجنا عارفينها...... شحال الحياة صعيبة ملي كتكون كتفكر بزاف شحال قاسية و غذارة كأنها بوحدها لي باغة تعيش ، عارفاني علاش ك...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
•• أعتقد أنها النهاية ، نهاية واقعي و خيالك ••
..... كلماتو كانو بحال الصاعقة على مسامعها ، التوتر ظاهر عليها هي براسها ما عرفاش خطورة مخيلتها إلا أنها قاصحة تسمعها منو هو بضبط ، شدات في يديه بقوة كأنها كتحاول تخبي قلقها ، شافت فيه بعينين غالب عليهم الدموع إلا أنها ما عندهاش قدرة تبكي ..... بغات تضمو هي السبب فهاد العذاب كامل ، بغات تكا على كتفو ، لكن واش غادي يصدها ، يبعدها عليه لكن المفاجأة أنه هو لي تكا على رجليها ، إبتسامة شاحبة ظهرات على خدها ضمات راسو بحال الأم لرضيعها و غرقات يديها في خصلات شعرو بحنان ، حسات براسها ضايعة و عندها رغبة كبيرة تهضر ، تعبر غير تهضر تنفسات بعمق مخليا هيجان البحر يقودها تكون ليه حرة ، هبطات عينيها لبراءة وجهو ، داك الوجه لي شحال تمنات تحط يديها عليه ، تحسس دفئو و تقيص رموشو ، هبطات يديها من خصلات شعرو لعينيه لي مغمضين ، حطات إبهامها بشوية على رموشو كأنها كتحسسها من بعد هبطاتها لخدو الدافئ .... كيف ديما البحر قدامها إلا أنه هنا هو البحر بكل التفاصيل لي كاينة فيه و بالخصوص تلك البقع الداكنة كأنهم حبوب رقيقة من الرمل ..... رجعات يديها لشعرو بإبتسامة و نطقات .
• ذكرى : عمرني وهمت شي واحد باش يبغيني عمرني تخيلت راسي كنبيع لحب ليا ، مرتضى أنا بغيتك فهاد الوهم و قبل الوهم و حتى من بعدو .
....حل عينيه بصمت و ظاهر عليه الندم ، ما عارفش اش كيدير كأنه ما متحكمش فراسو فقط بتاسم ليها و خلاها على راحتها تهضر و تخوي قلبها عليه ..... غرقات يديها مرة أخرى في شعرو بحنان .
• ذكرى : عرفتي شنو الإحساس ديال نلقاك قدامي ، نشوفك نقيصك و نحس بحرارة جسمك كأنك بصح واقع ماشي محض خيال و فجأة تختفي كأنك عمرك كنتي و نرجع لعادتي لقديمة ، المراقبة من بعيد ما عنديش لحق نقرب و لا نقيص و لا حتى حاجة ، عرفتي اش كيتسمى هادا عزة نفس لا بالعكس هادا غير دل و محض طريقة باش نقنع راسي بلي انا مزال عايشة .
....ضحكات كأن بصح هاد الهضرة ما عندها حتى معنى ، ما كتجرحش ما كتقصحش و كملات .
• ذكرى : و عرفتي أ مرتضى فين وصلني هاد الوهم ، كنظن عارف ، ليك انت للكمال لي تخيلتو للحب لمتبادل للحنان و حتى للأمان ، نقدر نعتارف ليك بكل بساطة بغيتك انت هاد نسخة لي عمرني غادي نشوفها من بعد ، تقت فهاد نسخة حسيت بهاد نسخة و يمكن حتى ما نقدرش نتخلا على هاد نسخة .
