4
"كل ما اريده هو شخص يبقي كما احببته، ولا يفاجئني يوماً بأنه شخص آخر لا اعرفه"
» بعد مكالمة عمار كنت حاسه اني مبسوطة اووي ،وكأن روحي كانت تايهه السنين دي كلها ، وفجأة رجعت ل موطنها من جديد ، يارب متعلقش قلبي ب حاجه مش ليا »
"ف صباح اليوم التالي "
_صباح الخير ي ماما
= اهلا كل دا نوم مش وراكي حاجه غيره!!
_ ف ايه ي امي دا احنا لسه بنقول ي صبح
=طب ها فكرتي صح !!موافقه صح!!؟
_ افكر ف ي ماما هو حصل ايه!!
= نهارك اسود دا انا سيباكي من امبارح تفكري ف العريس!!
_ عريس ايه هو حد جه !!
= بت انتي اتعدلي كدا امال اللي كان بيشرب شاي معانا هنا دا كان ايه !!
_ ي مامتي ي حبيبتي احنا محدش شرب معانا شاي .. احنا اتخزوقنا وشربناه وحدنا ولا انتي نسيتي !!
= ماهو كلم ابوكي ومستني رد !!
_ تؤ ، تلاقيه خلع ، دي اشكال تتجوز...
= هتجننيني !!
_ سلامتك من الجنان ي ماما ي قمر ، يالهوووي قمر ع الصبح ي ناس يااااا بخته امووواه ...
= كُلي بعقلي حلاوة ، بردو هستني رد !!
_ طب انا خارجه مع سلمي صحبتي ومش هتأخر يلا باي بقا
= يالهوي البت هتجنني ومش ناويه تريحني ابدااا، صبرني يارب ...
" ايوه ي سلمي انتي فين ، طب خلاص خلاص انا قربت اوصلك يلا اقفلي "
*سلمي صحبتي الانتيم مليش غيرها ومفيش خطوه بخطيها الا بعلمها ، ما كتر قربنا من بعض اللي يشوفنا يقول إننا اخوات ، دماغنا شبه بعض اوي ، بنكمل بعض اصلا **
_ ايه ي بنتي ملقتيش كاڤيه اوحش من كدا تقعدي فيه !!
• ف ايه ي سچي جايه تقولي شكل للبيع !!
•وبعدين ما المكان قمر اهو، والناس قمرين ، دا الواحد من الصبح بيتعاكس...
_ طيب ياختي ، اهو دا اللي انتي فالحه فيه ، انا ف مصيبة!!
• مصيبة ايه!! حد عاكسك !! حد اتحرش بيكي !!؟ انطقي!!
_متقدملي عريس...
•ي شيخه قلقتيني عليكي, ياريتهم كانوا اتحرشوا بيكي وخلصنا...
_ شوف البت اخص عليكي، ماهو العريس دا مصيبه !!
• ايه الجديد مش عاجبك ارفضي!!
_ ماهي دي المشكلة ..
• سچي ف ايه ع الصبح ، انتي شاربه ايه ي ماما ، مصحياني من النوم بدري ومعصباني عشان تقعدي تقوليلي ف ألغاز كدا والله اسيبك وامشي !!
_ تمشي ازاي!! دا فيه ويتر قمر هيجبلنا فطار دلوقتي
• بجد دا انا هبات هنا خلاص !! حبيت المكان ، عشقته..
_ كل دا عشان ويتر !!!
• طبعا ي بنتي دا هيجي دلوقتي يقولي تشربي ايه ي افندم!! وانا بضعف اوي قدام افندم دي
_ والله !! وايه كمان ي أنجلينا جولي ...
• اتريقي اتريقي ، المهم مين العريس وايه اللي حصل احكيلي
_واحد بيقول أنه قال ايه بيحبني !! طب بذمتك دي اشكال تتحب!!
• اتعمي ي روحي تلاقيه لسه مفصلش نضارة .. بس قوليلي بجد ي سچي ايه الحوار!!
" حكيتلها كل حاجه من اول ما جه البيت لحد مكالمه امبارح.. كانت قاعده قدامي مندهشه من اللي بحكيه ولا كأني بحكليها رواية أو مسلسل تركي "
• ايه ي سچي هو انتي بعد كل اللي حكيتيه دا لسه بتفكري !!!
_ مش مسألة افكر ي بنتي ع قد ما انا خايفه ..
• خايفه من ايه !!!
_ خايفه اقرب ... خايفه أحب ... خايفه اتعلق .. من جمال الصورة اللي قدامي خايفه اعمل زووم عليها تتشوش رؤيتها وابقي ادبست.. هو معقول حد يحبني كدا ... كل حاجه حلمت بيها واكتر كمان اتوجدت قدامي ..
• بصي انا شايفه انك لازم تدي ل نفسك فرصه بجد ...
_ ي قلبي ... انا وانتي عارفين كويس ورا الحب بيبقي ايه ... دا احنا اتعقدنا ي شيخه من كتر المشاكل اللي بنشوفها والتجارب اللي بتنتهي بالفشل قدام عنينا ...
• ي بنتي احنا عارفين بس لكن مجربناش ... مش يمكن نقدر نكسر القاعده دي !!
_ سلمي دا جواز مش لعب عيال !!! الموضوع تقيل اوي عليا ..
• عاجبك!!
_ بصراحه اه الواد قمر اووي وأنيق جدااا ومرتب ف كل حاجه حتي كلامه ... عليه نظرة تلين الحجر ... عارفه انا اول مره ارتبك قدام حد وحتي هو لاحظ كدا ..
• شكلك وقعتي هههههه
_ لالا وقعت ايه وكلام فاضي ايه ... اصلا احنا مش هنتكلم تاني وموضوع وانتهي .. انا اصلا مش عايزه اتجوز
• تعالي نتكلم بهدوء شخص لقيتي فيه كل اللي كنتي عايزاه ويستي دا بيحبك يعني هيوفر عليكي انك تحببيه فيكي اصلا ... العيب أن ممكن يكون مؤقت وأنه يخطبك وبس ويرضي فضوله وبعدها كل واحد يروح ل حاله
_ اقلقيني اكتر اقلقيني هاااا ... انت صاحب مش جدع
• ي بنتي ليه مش احنا بنتكلم بالعقل اهو...
"أفضل شخص قد تُصاحبه هو من يجمع بين الأمرين، الذي تستطيع أن تمزح معه بكل عفوية وتتحدث معه أيضاً بجدية عن أعمق ما بداخلك دون أيّ قلق."
