Special Section (Published under Pop Fiction)

CHAPTER 4

ALEXANDER

Sinabi ko na kay Rhianne ang ilang mga nalalaman ko pero hindi pa ang lahat. Hindi rin naman kasi ako sigurado sa mga susunod na mangyayari pero may kutob na ako. May kutob na ako na mauulit ang nangyari dati, noong nag-aaral pa ang tita ko dito sa Hillton University.

Babalik na sana ako sa classroom nang may narinig akong sigaw at hagulgol mula mismo sa loob ng silid namin. Binilisan ko ang paglalakad.

Pagpasok ko ay puno ng dugo ang classroom.

"Anong nangyari dito?!" Napatakip ng ilong si Ayah dahil masangsang ang amoy nito. Puro talsik ng dugo ang paligid. Parang... may kinatay.

'Yong ibang babae, umiiyak. 'Yong mga lalaki naman ay tumutulong sa pagkuha ng mga gamit ng mga kaklase ko.

"Kadiri!"

"Lintek! Ang baho!"

"Ano 'yon?" Tinuro ni Maxwell ang nakasulat sa pisara ng aming classroom. Mukhang dugo ang pinangsulat dito.

"Uno..." basa ni Ayah. Anong uno? One?

"Sino ang binigyan ni Miss Gaiza ng number one?!" sigaw ni Ayah.

"Number one?" tanong ni Rhianne.

"Sinong nakabunot ng number one? 'Yong binigay sa atin ni Miss Gaiza! Sino?!"

"Ang alam ko si Cesar," sagot ni Lilia. Nanlaki ang mga mat ani Ayah.

"Nasaan si Cesar?"

"Bakit, Ayah?" natatarantang tanong ni Rhianne. Nag-iba ang expression ng mukha ni Ayah. Kinakabahan and at the same time, natatakot.

Lahat kami'y lumingon nang may sumigaw na babae sa labas. Ang boses ay nanggagaling malapit sa C.R. ng mga lalaki.

***

RHIANNE

Biglang nawala sa tabi ko si Ayah. Tumakbo siya kung saan nanggaling ang sigaw. Pagdating namin malapit sa C.R., nakita namin si Ynna na umiiyak

"Anong problema, Ynna?" Hinawakan siya ni Andrei sa balikat. Nanginginig na tinuro ni Ynna ang C.R. ng mga lalaki.

Nakipag-unahan kaming pumasok sa loob ng CR. Napatakip na lang ako ng bibig habang unti-unting namuo ang mga luha sa mata ko.

"Cesar!" Humagulgol ng iyak si Ayah. Nakita ko si Alexander, tumatagaktak ang pawis niya. Bigla siyang sumuntok sa pader.

"Ano bang nangyayari?!" Umiiyak na din si Lilia. "Napaka-brutal naman ng gumawa nito!"

"Magre-retouch kasi dapat kami ni Ynna sa C.R. nang may marinig kami mula sa C.R. ng boys. Parang may nagpupumiglas. Nang sumilip kami, nakita namin si Cesar." Naiyak na nakayakap si Megan kay Ynna.

Binaling ko ulit ang tingin ko kay Cesar. Nakabigti siya. Walang saplot sa katawan... hubad. Puno ng pasa ang katawan at halatang pinahirapan. Puro hiwa din ang kanyang katawan at may laslas siya sa leeg at pulso. Nakadikit sa noo niya ang maliit na papel kung saan nakasulat ang numerong one.

Hindi kaya ang ibig sabihin ng numero ay...

Sino na ang susunod?