Mu Qing and His Cursed Luck [Myanmar Translation]

Mu Qing and His Cursed Luck [Part-5]

[Unicode]

v.

လူ့လောကတွင် 'ကြမ်းကြုတ်ရက်စက်'အဆင့်တစ္ဆေတစ်ကောင် သောင်းကျန်းနေ၏။ ထိုတစ္ဆေသည် စုံတွဲများကို ပြန်ပေးဆွဲပြီး တောင်တန်း‌ေတာနက်များအတွင်းကျကျတစ်နေရာတွင်ရှိသော သူမ၏ ဂူတွင်းသို့ ခေါ်ဆောင်သွားကာ လူသားများ၏ အသက်စွမ်းအင်များကို ခိုးယူလျက်ရှိသည်။ ထိုသို့လုပ်ပြီးလျှင်လည်း သူမသည် လူအလောင်းများကို ရွာထဲတွင် လာလာပစ်ထား‌ေလ့ရှိ၏။

ဤသည်မှာ အဆင့်နိမ့်တစ္ဆေဖြစ်ပြီး တာဝန်မှာလည်း အဆင့်နိမ့်တာဝန်သာ။ အနှီတာဝန်ကိုလက်ခံထားရ‌သောကြောင့် မုချင်သည် ဂုဏ်သိက္ခာကို စော်ကားခံရသည်ဟုတောင် ခံစားရ၏။ သို့သော်မူကား သည်အမှုတွင် စုံတွဲများပါလေ၏။ စုံတွဲပါသည့် အမှုစစ်တာဝန်မှန်သမျှကို မုချင်နှင့် ဖုန်းရှင့်ဆီသို့သာ လွှဲအပ်လေ့ရှိပေ၏။

(ထူးဆန်းစွာဖြင့် မုချင်ကိုယ်တိုင်ကလည်း ဖုန်းရှင့်နှင့် ပူးတွဲတာဝန် ခဏခဏပေးအပ်ခံရခြင်းအပေါ် စိတ်အနှောင့်အယှက်မဖြစ်မိပေ)

ယင်းတစ္ဆေအမျိုးသမီးသည် ဉာဏ်နီဉာဏ်နက်များပြီး စိတ်စွမ်းအင်လည်းနိမ့်သည့်အတွက် လှည့်ကွက်ပရိယာယ်များ အတော်သုံးတတ်သည့်ဟု သိထားရသည်။ ထို့ကြောင့် သူတို့သည် ရိုးရိုးရှင်းရှင်း ဝတ်ရုံများကိုသာ ဆင်ခဲ့ပြီး လက်နက်များကိုလည်း မမြင်သာအောင် ဝှက်လိုက်ကာ လူပြည်ဆင်းပြီးနောက် ရွာတစ်ရွာ ဆိုက်ရောက်လာခဲ့၏။ အစီအစဉ်က ရှင်းပါသည်။ အေးအေးလူလူ လျှောက်ပတ် ခရီးထွက်နေသော တူနှစ်ကိုယ်ကျင့်ကြံသူ စုံတွဲအဖြစ်ဟန်ဆောင်လိုက်ပြီး ဒေသခံများဆီမှ ပြန်ပေးဆွဲခံရသူများအကြောင်း သတင်းမေးမည်။ ထို့နောက် အနှီတစ္ဆေရှိမည့်နေရာကို စုံစမ်းအတည်ပြုပြီး ခြုံခိုတိုက်မည်။

သတင်းအလုံအလောက်ရပြီးနောက်တွင်မူ သူတို့သည် ဗျူဟာဆွဲနေ‌ခဲ့‌ေသာ လက်ဖက်ရည်ဆိုင်တွင်းမှ ထွက်ခဲ့ကာ တောနက်တွင်းသို့ သွားမည်အပြု၊ မုချင်သည် ကလေးအုပ်စုတစ်စု ဝင်တိုက်မိလုနီးဖြစ်သွား၏။

ထိုကလေးများသည်ကား ရှောင်မသွားဘဲ သူတို့နှစ်‌ေယာက်ကိုပင် ဝန်းရံကာ မုန့်ကျွေးပါရန် မရပ်မနား ပွက်ပွက်ညံ တောင်းဆိုကြလေတော့သည်။