تصويت وتعليق وتاكات لكل الي يحبون يقرون قصص :)
عاري
كتابة رؤى صباح مهدي
الفصل الخامس
زيارات الاقارب، من ينجمع الكل ببيت واحد وعلى سفرة وحدة يسولفون ويضحكون ويتبادلون الذكريات السعيدة والاولاد والبنات منجمعين داير مداير الكبار من العائلة والكل يشوف دمه ولحمة كدامة مرتاح ويضحك واجواء عائلية ابسط واقل ما يقال عنها مريحة واليفة لكن مو كل العوائل عدها هاي النعمة الي عد غيرها ومو كل اهل حنان على بزرهم ومرات العلاقات العائلية مبنية بشكل صافي ووحيد على المصالح اذا انوجدت انوجد الوئام واذا انفقدت انفقد كل شئ حتى النظرة الطيبة!
خلصت امتحانات رانيا وشكد جانت ثكيلة رجعت البيت. من وصلت للكراج محد جان ينتظرها حتى يرجعها للبيت ورجعت وحدها تسحول بجنطتها ولان تقريبا مخلصة فلوس اضطرت تاخذ تكسي وتكلة ينتظرها تجيب فلوس من البيت. تعجبت امها من رجوعها:
-ليش ما حجيتي راح تجين جان دزيت اخوج عليج
باوعت رانيا والتعب ناهيها من الطريق وردت:
-بس انطيني فلوس التكسي ونتفاهم
انطتها سميرة الفلوس وورة ما دفعت ورجعت كالت:
-دزيت الج اكثر من رساله يا يمة يعني شسوي بعد احط الكم منبه
تذكرت سميرة فعلا رانيا كالت اكثر من مرة عن تاريخ رجعتها بس هي وسط الهوسة نست. سألتها سميرة:
-شلون سويتي بالامتحانات مالتج
ردت عليها رانيا وهي كاعدة بهدومها دتشرب مي:
-الحمد لله جانت الاسئلة صعبة بس اني اعتقد انجح
كلتلها سميرة تروح تبدل حتى تاكل وسوت الها اكل لان جان الوقت لا هو وقت غدة ولا هو وقت عشا وشافتها شوية مصوفرة وضعفانة. من كعدت رانيا دتاكل ظلت تسولف سميرة وياها وتسألها على وضع الجامعة وسألتها على علياء بعدين كالت سميرة:
-مكانج خالي العزيمة مال عمج جانت كلش جبيرة. جان عازم الكل ما مخلي احد يعتب عليه وكلهم سألوا عليج ما كتلهم مكملة استحيت كتلهم مريضة. عمج اصر المرة الجاية لو على النقالة هم تجين ويانة
خسرت رانيا شهيتها وماردت. كملت سميرة:
-ولد عمج ماشاء الله كلهم شباب صايرين. ادري شوكت كبر شوكت تزوج شوكت خلف كل هذا ما عزمونة لان جنة زعلانين. اول ما شافنة باس ايدي وايد عمه وسأل عليج والله بي الخير ما ناسيج
كامت ايد رانيا ترجف. بي الخير؟ يا خير هذا لو هو لان تظاهر كدام امها بالشرف يعني هو شريف! ظلت سميرة تحجي عن العزيمة وية بنتها واستلمت واحد واحد والتغيرات الي صايرة بي وشلون جان وشلون صار ورانيا صافنة على الاكل مدتكدر تاكل لان قدرتها على بلع الاكل توقفت من لحظة الي انذكر بيها اسم نبيل. اخيرا فجرت سميرة القنبلة:
أنت تقرأ
عاري لهجة عراقية
Romanceقصة حقيقية/ ترفض كل الي يخطبوها بسبب شئ صار بيها بطفولتها وتخاف من الفضيحة. يتقدم الها شاب بي كل المواصفات بس تبقى هي خايفة من الي صار بيها بالماضي.
