هالة...........
أول ما حطت عيني عليه كل شعرة في جسمي وقفت....وحسيت دمي هرب من عروقي!!....
كنت راكبه ورا ثريا وسراب وراه ....
رفعت عيوني وركزتهم عليه...طبعا ماحد منتبه لاني مغطيه عيوني....
حسيت بنار في قلبي وغصة في حلقي...
كان بين لحظة وثانية يطل على سراب من المرايا....
في حركة لا إرادية مني ألتفت لها ... كانت هيا ماسكه جوالها في يدها وتلعب فيه...وكانت متلثمة ....له حق يبحلق فيها...عيونها سحر....
حسيت في لحظة من اللحظات إني أكره سراب!!....ليش تسوي كذ!!ا...طيب إذا كانت ماتحبه ليه تسوي كذا!!...تمنيت الطشها بالكف...وأميل عليه وأفقع عيونه!!....
بعد لحظات جا صوت حاتم بهدوء لكن بقوة: سرااااب!!
انتبهت له سراب : هلا حاتم!!
حاتم: نزلي الغطا على عيونك!!...
سراب بملل: يووووه يا حاتم!!لا تبتدي!!
حاتم: إيش إلي لا أبتدي!!...غطي عيونك يابنت!!
سراب:بالله ذحين مين يشوفني!!...وبعدين السيارة مظللة!!
حاتم: حتى ولو!!....أنا مايجوز لي أشوفك!!
سراب:عادي أخويا!!
حاتم: من فين أخوكي!!...
سراب بملل: زي أخويا!!...وبعدين تراك طفشتني ياخي!!
حاتم:هههههههههههه تستاهلي !!
سراب: لا والله!!
حاتم: إيه....الحين لو وافقتي علي مو كنتي إرتحتي من حنتي عليكي!!
سراب: هههههههههههههههه بسم الله عليا!!...ليه شايفني ما ابغى عمري!!
حاتم: إحلفي بس!!....اصلا أنا قلت أخطبك أسوي خير ببنت عمي بدل ما تعنس!!
سراب:أعنس ها!!...هين يا حاتم أفندي!!...إذا ماتزوجت قبلك ...ونشوف مين إلي بيعنس!!
حاتم: هههههههههههههه تحدي يعني!!....
سراب:والله!!... إنت إلي بديت!!
حاتم: وانا عليها!!....من بكرة بخطب!!...وبتروحي إنتي وثريا تخطبولي!!
سراب: ههههههههههههههه ول ول ما صدق الولد!!
حاتم: أبغا أشوف مين إلي بيعنس!!
حسيت بقلبي أنفجر!!....إيش إلي جالسة أسمعه!!....
تجمعت الدموع في عيوني ونزلت في صمت!!....ياريتني ماجيت معاهم ولا شفت هذا القهر قدام عيوني!!
انتبهت على صوت سراب: هههههههههههههه الحين هالة عيونها صارت زي الفناجين!!....هذولا كيف يتكلمو مع بعض كذا!!
أنصدمت والتفت لها بسرعة....
شفتها تضحك وتغمز ليا بعيونها!!....إيش فيها ذي!!
والتفت له ...شفت عينه على الطريق وفي بسمة على وجهه لكن ما علق!!....
هذي إيش أسوي فيها!!...هين يا سراب خلينا نوصل بس!!
أنا انكمشت في مكاني....مخنوقة....يووووه ليه الطريق طول كذا!!...
بعد شوية جاني صوت سراب بهمس: هالة!!...إيش فيكي!!
جاوبتها ببرود: إيش فيا يعني!!...ولا شي!!
سراب: متضايقة مني!!
جاوبتها: سراب نتكلم بعدين!!...مو وقته!!
سراب: طيب على راحتك!!
وأخيرا وصلنا!!....وطلعنا غرفة ثريا.....
جلسنا في الغرفة أنا وسراب....
في البداية حاولت سراب تتكلم معايا..لكن انا ما أعطيتها مجال...كنت أرد عليها كلمة ورد غطاها!!....وبعدين وعلى غير عادتنا أنا وسراب كل ما نجتمع...جلسنا ساكتين!!
تحاشيت إني أطل فيها...كنت انقل بصري في أجزاء الغرفة....
وبعدين شفت مجلات وكتب على مكتب ثريا...رحت وأخذت لي مجلة وجلست أقرا فيها...وأنا أحاول أتناسا سراب... حسيت إني مقهورة منها!!....
بعد شوية جاني صوتها: هالة إيش فيكي!!....
جاوبتها من غير ما ارفع عيوني من على المجلة: مافيني شي!!
سراب: كذابة!!....هذا كله ومافي شي!!...إنتي حتى ما تبغي تطلي عليا!!
جاوبتها: ليه تقولي كذا!!....عادي!!...
سراب:لا مو عادي!!....قبل ما نجي كنا كويسين !!...إيش إلي حصل فجأة!!
قفلت المجلة بعصبية وقتلها: إيش الي حصل!!...إسألي نفسك!!...
سراب بإستغراب: عن إيش!!
جاوبتها بقهر: طيب إذا إنتو كذا سمن على العسل مع بعض ليه قلتيلي إنك ما تبغيه؟!....
سراب: ما أبغى مين!!
جاوبتها : ولد عمك!!...مين يعني!!
سراب إلي مو مستوعبة كلامي: ولد عمي!!...!!
وفضلت مبلمة فيا لحظات وبعدين : هههههههههههههههههههههههههههههههههههههه
ههههههههههههههههههههههههههههه حاتم!!
والله إنك تحفة!!.....هههههههههههههههههههه أتاريكي!!...كرهتي حتى تطلي على وجهي!! هههههههههههههههههههههه
وبعدين غمزت لي : هههههههههههه كنتي قلتي كذا من أول
حسيت بإرتباك...قتلها بصوت واطي: أقلك إيش!!
رمت نفسها بجنبي وقالت:من متى كل هذا الحب!!
قمت من عندها بعصبية وقتلها: سراب بلا قلة أدب!!....إنتي تفكيرك فين راح!!
سراب: ما راح مكان !!.... إنتي إلي تفكيرك فين راح!!
قتلها بزعل: سراب خلاص قفلي على الموضوع!!...إنتهينا!!...
جات بجنبي وحطت ذراعينها حولي وقالت: إذا ما تبغي نتكلم في الموضوع على كيفك!!....بس أبغاكي تتذكري شي!!....
سالتها : إيش!!
سراب: يوم كلمتك إني ما ابغى اتزوج حاتم!!...إنا قتلك إني أشوفه زي أخويا!!....وهوا نفس الشي!!
ما رديت عليها...
كملت: إمكن انا اتربيت وسط حاتم وثريا أكثر ما اتربيت وصت بقية أخواني!!....عشان كذا تلقي الكلام بيني وبين حاتم بهذه البساطة!!....أكلمه زي ما أكلم يحيى زي ما أكلم بقية أخواني!!....وهوا نفس الشي!!....يا عبيطة!!
من جد حسيت نفسي عبيطة...كشفت نفسي لها بغيرتي الغبية!!....الحين إيش راح تقول عني!!
حسيت الدم راح يطلع من وجهي....والدنيا حر مرة.....
جاني صوتها: يا خاينة!!...هذا وأنا أحكيلك كل شي!!.....صرتي عارفة كل أسراري!!....والله زعلت من جد!!
غصب لقيت صوتي ...قتلها: ما كنت عارفة إيش أقلك ....وبعدين ...مافي شي!!...هذه أشياء في خيالي أنا بس!!
في اللحظة ذي ...سمعنا صوت الباب....
لصقت فيا سراب ...وقالت بمكر: راح اتركك الحين ....لكن راح تحكيلي كل شي في التلفون سامعاني!!.....ما راح أعتقك اليوم!!.....يا خطيبة ولد عمي!!...خخخخخخخخخخخخ
وجهي أنصبغ بالأأحمر أكثر ....حسبي الله عليك يا سراب...ما ترحمين الواحد من تعليقاتك !!
بس من جد حسيت إني رجعت للحياة من جديد!!....
الحمد لله.....بس الله يستر لا يكون فيه براسه وحدة غيري!!
يا الله وربي...يجيني شي!!...
..........................
غادة............
طلعت من عندها وأنا مو عارفة افرح ولا أبكي!!....أفرح عشان طهارتي ولا أبكي الحال إلي وصلت نفسي فيها!!....لفين وصلت نفسي!!...ولفين كنت راح أوصلها!!....كنت راح أضيع!!....لولا لطف ربنا كنت أنفضحت!!....لو إلي طلعلي أمس مو يحيى!!...لو كان واحد من العمال
كان راح يرحمني؟!....كيف يرحمني وأنا مارحمت نفسي!!....
طلعت من المستشفى ....ومسكنا طريق البيت.....
دق جوالي وكان المتصل هوا يحيى....حطيت جوالي على الصامت ولارديت عليه....ورميته بجنبي....
لكني ما قدرت أتجاهل الجوال ...فأخذته وشفته لسى يدق من جديد
اووووه وبعين معاه هذا!!....أحسن شي إني أقفل الجوال!!...وقفلته ورميته في الشنطة...أحسن كذا أرتاح ...قربي من بيت عمي آذاني آذاني مرة !!...
لا يا غادة لا تظلمي أحد!!....إنتي إلي أذيتي نفسك!!....إنتي إلي جنيتي عليها!!....إنتي إلي أنجريتي لطريق المخدرات ....ومين السبب!!...مين إلي خلاني أدمنها!!...محاولتي في إني أنسى هارون!!.....
لا يا غادة ما حد السبب غيرك!!.....إستهتارك وعدم الا مبالاة إلي كنتي عايشتها هيا إلي ضيعتك....لكن خلاص لازم كل شي ينتهي!!....لازم ألحق نفسي!!....وإلا راح أضيع للأبد!!
في للحظة ذي شفت سيارة قربت منا مرة ....لدرجة إنها كانت راح تضرب فينا!!
سمعت السواق يبرطم بصوت عالي....التفت أشوف مين المتخلف إلي يسوي كذا....وفتحت عيوني فيه بإنكار!!....هذا إيش جابه؟! وبعدين معاه!!....كان هوا يحيى!!....
يوووووه!!...هذا إيش يبغى مني!!.....مرة زودها!!...
قلي بالإشارة : كلميني....
لا والله!!....أشوف الموضوع عجبه!!....
تجاهلت والتفت للسواق :حاول تسرع وتتجاوزه!!
السواق: ماما قادة هذا بابا يهيى إيش يبقى!!
ياحبيبي !!...ما ناقصني غير لقافة السواقين!!....
قتله بحده: إمسك طريقك وإنت ساكت!!....
وتجاوزناه ....كنت أطل من مراية السيارة ...شفته وارانا بمسافة مو طويلة...بس ما قرب أكثر من كذا....
وصلنا البيت ...وهوا لسى ورانا ....دخلت من غير ما أطل عليه....وصعدت غرفتي...
رحت طليت عليه من شباك الغرفه ...لسى واقف!!....هذا إيش يبغى!!...
اففففف شي لا يطاق!!....
فسخت العباية والشيلة ورميتهم على طول يدي ....وجلست على الكرسي أفكر في الي جالس يحصل معايا!!....كل شي جالس يحصل غلط!!....
لازم أغير نفسي!!....لازم !!...أبغى ألحق نفسي قبل لا أنتهي!!...
قمت للدولاب وفتحته وطلعت منه كل كمية المخدرات إلي أشتريتها آخر مرة...الكمية كانت كبيرة مرة !!...تكفيني شهرين ونص قدام....يعني لو ولد حرام بلغ عني....بروح ورا الشمس!!....
في العادة انا اشتري بين كل فترة وفترة وبكميات أقل...لكن بعد الحركة الوقحة إلي سواها معايا أخو اعتماد الزفت أخذت هذه الكمية الكبيرة عشان أرتاح من شكله لأطول فترة!!
ورحت على الحمام (الله يكرمكم).....وفرغت المخدرات في الحوض....كيس ورا الثاني....كنت أطل على الحبوب كيف تذوب وتروح مع الموية!!....ما انكر إني ترردت ...لكني أستمريت أفرغها...وجيت عند آخر كيس ....وغلبتني نفسي!!....تراجعت عن إني اتخلص منه!!...يعني لو ماقدرت أستحمل ....إيش راح أسوي!!....
طليت على نفسي في المراية..... هذه إنتي ضعيفة!!...ما عندك إرادة!!....
لا مو كذا...لكن الآلام إلي أحسها تقتلني....آلام فضيعة !!....
طيب عالجي نفسك يا غادة...عشان تقدري تتخلصي من هذه الآلام!!
أنا أبغى آعالج نفسي!!...ابغى أطهر من هذه الزبالة(الله يكرمكم) إلي أنا عايشة فيها!!....لكني خايفة ما أتحمل الألم!!
أخذت الكيس وطلعت من الحمام(الله يكرمكم)...وأنا أفكر في حالي!! ...
إيش أسوي!!.... كيف أتصرف!!....
أنا تعبانة!!...تعباااااانة...وأبغى ارتاح
هذا جريرة إلي سويته في ثريا وحاتم!!...هذا إنتقام ربنا مني!!....سامحني يارب!!....سامحني يا أرحم الراحمين!!.....
وأرتميت على السرير وأنا أبكي منهارة!!....حاسة نفسي ضعيفة ووحيدة ولا حول لي ولا قوة!!.....
..............................................
بيت أبو حاتم.........
أشرت ثريا بملل: سراب دقي عليه ...خليه يطلع!!
وراحت جلسة على الكنبة ....
سراب: طيب ...أف منك ومن أخوكي!!
وناولت هشام إلي كان نايم لهالة: أمسكيه ....بشوف الأخ هذا إيش حكايته!!
أخذته وهيا بتفرقع...خلاص هيا أقتنعت إن العلاقة بين سراب وحاتم علاقة أخوية بحته...لكن إلي قاهرها إن سراب تقدر تكلمة بمنتهى البساطة وهيا لا....ودها يكون لها هذا الحق!!
قربت منها سراب وقالتله بصوت واطي: ولا إيش رايك تكلميه إنتي!!
هالة بعصبية: يا حمارة!!...والله لولا إن هشام في حظني ولا كنت فلعتك بإلي في رجلي!!
سراب: هههههههههههههههه وجع نمزح !!
ودقت على حاتم: اف يا خي وبعدين معاك ترانا تصلبنا أنزل!!
حاتم: اقول لا تنافخي!!...يلا نازل ..علل يا ربي علل!!
سراب: ههههههههههههه احمد ربك انا رضينا انك توصلنا!!
خلاص هالة فاض فيها لكزت سراب في خصرها من القهر
والثانية تألمت لكن بصمت..
واول ما قفلت من حاتم..خبطتتها على كتفها: وجع في شكلك....عورتيني
هالة ببرود: تستاهلي!!
سراب وهيا تحرك لها حواجبها: عذراكي ...خخخخخخخخ
طنشتها هالة وراحة جلست بجنب ثريا على الكنبة .....
سراب: أنا بروح أشرب موية وراجعة...
وشوية إلا وحاتم نازل من على الدرج....
وبصوت عالي : يلا أنا سابقكم على السيارة...
قامت ثريا وهالة....
في اللحظة ذي هشام إلي كان في حظن هالة أنقلب للجهة الثانية وطاحت مع حركته الشيلة من على وجه هالة ...
إلا مع إلتفاتة حاتم لثريا: ثريا إسمعي ابويا يقـ.....
وبتر كلامه لما جات عيونه على هالة....ورجع التفتت لقدام وفي نفس الوقت هالة لفت نفسها لورا....
وهيا في عقلها: يا فشيلتي!!....حسبي الله على ابليس!!
وحاتم في نفسه:إيش هالة النور ذي!!...سبحان الله ....إيش هذا الجمال!!
هالة في بالها: الحمد لله سراب مو هنا ولا كان ذلتني !!
في اللحظة ذي جات سراب : يا قلبي عليكم مستيني!!...يلا مشينا!!
...................
رحيم.............
كنت في غرفتي كالعادة ماسك قميصها الأبيض وحاظنه وأنا مغمض عيوني وأستنشق إلي باقي من آثار شذاها!!
كانت واقفة عند التسريحة تمشط شعرها.....
سالتها: في سوال محيرني!!
تماضر وهي تكلمني من مراية التسريحة: سؤال إيش!!
قتلها: الحين من يوم ماعرفتي إنك حامل ما قمتي تلبسي غير قميص النوم هذا !!....ليه!!
تماضر وهيا تحط في يدها من الكريمات إلي على التسريحة: : ههههههههههههه لايكون بس مو عاجبك!!
جاوبتها وأنا مبتسم: عاجبني لانه عليكي!!.... ومهما لبستي يكون عليكي حلو!!
تماضر: يسلملي حبيبي الذوق!!....
وجات وأنسدحت جنبي على السرير....
أنا أخذتها في حضني وقتلها:ما جاوبتيني!!
ابتسمت : سمعت إن الطفل طيلة ما يكون في بطن أمه يتأثر بنفسيتها!!...يعني الأم لو كانت نفسيتها ماهي حلوة الطفل يطلع منكد ونفسيته تعبانة!!
غمضت عيوني وقتلها: أموت في الفيلسوفة أنا!!
تماضر: هههههههههههههه ...بعدها قررت إن أبعد عن كل الأشياء الكئيبة وإلي ممكن تأثر على نفسيتي...حتى في اللبس....قمت أتجنب ألبس الألوان الغامقة..وأهم شي الأسود!!....
قتلها وأنا أمسد على شعرها: لسى ما جاوبتيني ليه الأبيض هذا بالذات!!
رفعت وجهها وصار مقابل لوجهي وقالت بهمس: عشان كل ما طليت فيه تتذكرني!!
جاوبتها: ما أحتاج لشي يذكرني فيكي!!... وبعدين فين ناوية تروحي!!...إنتي دخلتي بين ضلوعي وأحتليتي قلبي!!...يعني مالك مخرج منه!!
وحضنتها أكثر....
تماضر: هههههههههههههه طيب بالراحة أولادك أنحشرو جوا!!
ضحكت: هههههههههههه وحشوني أولادي متى بيجو!!...
حطت يدها على عيوني وقالت: غمض عين وفتح الثانية ...وما تلقاهم غير جو!!
غمضت عين وفتحتها وقتلها: هاا.... فينهم!!
تماضر: هههههههههههههههههههه
في لحظة تخيل إني لو فتحت عيوني راح أشوفها!!....
وفتحتهم على هذا الأمل...لكني ما شفتها....شفت نسختها المصغرة....نغم!!....
ابتسمت لها بكل حب...وجلست على السرير وحظنتها: هلا بحبيبة قلب بابا!!
نغم بصوتها الطفولي: بابا!!..اذعجتك!!
بعدتها عني وقتلها: لا حبيبتي ما ازعجتيني!!....
نغم: حثبت إنك ثاحي!!...
ضحكت على طريقتها في الكلام: ههههههههههههه أيوا حبيبتي أنا صاحي..
نغم وهي تفتح الكتاب: أبلة عذة أعطتنا واجب وما عرفت أحله!!
قتلها: خلينا نشوف واجب أبلة عزة!!....
وحليت معاها الواجب....
وبعد ما خلصنا سألتها: حليتي كل الواجبات!!
نغم: ايوا!!...ما كان باقيلي غير واجب أبله عذه!!...
ضحكت: ههههههههههههه طيب فين أكرم!!
نغم: تحت ...جالس مع ماما وعمة أمل....
قمت وشلتها بسرعة من على السرير ودورتها في الغرفة....
وهي تضحك.....ضحكتها وضحكت أخوها هيا إلي مصبراني على فراقها!!....رحمتك يارب....قضائك كله رحمة....أنحرمت من تماضر ورزقتني بأحلى ذكرى منها...تخليني أتذكرها ليل ونهار لغاية ما أموت!!
ونزلت أنا ونغم....
كانت أمل جالسة لوحدها ....
أول ما شفت أمل: إنتي لساتك هنا!!
أمل: هههههههههههه ول عليكم خلاص ما عاد تبغو وجهي!!
: هههههههههههههههه أفا ...على قلوبنا زي العسليا أحلى عروس!!
أمل: ههههههههههههههه خلاص راحة عليا ...بتجي بدالي عروس ثانية!!
جلست وجلست نغم علي: ولو هيا عروس وإنتي عروس!!
لفت جسمها كله ليا وقالتلي: وأنا يا بابا!!
ضحكت: هههههههههه وإنتي إيش !!
نغم: وانا عروووووث !!
إلا على دخلت سراب: هههههههههههه امحق عروس
مسكت خدودها بيديني الثنتين: أحلى عروسة في الدنيا ...
نغم: ههههههههههههههه أحلى من عمه ثراب!!
أمل قامت من مكانها وشالتها عني وحضنتها : عمة ثراب عندك ولا شي!!...يا قلبي على التختوخة أنا !!
نغم: هههههههههههههههه
سراب وهيا تخلع العباية والشيلة : وعععععععع لا تضحكي إنتي وذي الضروس إلي كأن فار أكلها!!
نغم: عمة ثراب!!...أنا شفت ثورتك إلي عند ماما!!...ما كان عندك ولا ثن!!...ما عندك غير ثن واحد أثود
أنا وأمل: هههههههههههههههههههههههه
سراب بزعل: بنتك ذي طالعة لسانها طويل على مين!!
جاوبتها:طالعة لك!!....بس كويس إنها ما أخذت منك غير لسانك!!
سراب بغرور: مسكينة لانها ما أخذت مني كل شي!!
أمل: أقول يا ام ثن أثود!!.....لا يطق لك عرق !!
نغم : ههههههههههههههههههههههه
سراب: الله يسامحك يما!!....ماتورين صورتي غير للأعداء!!
قتلها بعتب: ول عليكي يا سراب!!...الحين بنتي صارت من الأعداء!!
سراب:ماتشوفها كيف حاطة دوبها بدوبي!!...(وقامت وقرصت نغم على خدها بشويش طبعا)....بس إيش أسوي احبها وأموت فيها!!
نغم : ههههههههههههههههه...عمة ثراب وانا أحبك!!
شالتها سراب من على أمل وحظنتها: يا قلبي والله!!....وأنا أحبك وأموت عليكي كمان!!....
كنت أطل عليهم بحنية بناتي حاضنين بنتي!!....الله يخليهم ليا يارب.....
وركزت نظري على نغم إلي جالسة تضحك في حضن عمتها....كل هذا الحب والدلع من عماتها وأعمامها و مني إلا إنها مفتقدة وجود الأم.....دايما تسألني ليه كل البنات عندهم أم و أنا لا!!
ما أعرف إيش أجاوب عليها!!...أحاول ألف وأدور عليها في الإجابة...
وتنسى الموضوع...وأقول إنها خلاص نسيته للأبد....ترجع تفتحلي السيرة بعد فترة!!....
أكرم مو زيها!!.... ما يركز على الشي هذا كثير!!...صح أحس بنظرة حزن في عيونه لما تسألني نغم هذا السؤال إلا إن هذه النظرة بسرعة تختفي لما يندمج مع أصحابه.....مشكلتي الكبيرة نغم....آآآآه فينك يا تماضر!!...ليتك كنتي بجنبي تفرحي بأولادك زي ما أنا فرحان فيهم الحين!!...الله يرحمك يارب!!...الله يرحمك....
....................
ثريا................
طليت على الساعة كانت 2:30 وهوا لسى ما جا!!....يا الله فينه!!...هوا قال راح يتأخر لكن مو لهذه الدرجة!!
أخذت الجوال وأرسلت له رسالة
"محمد فينك!!...تأخرت!!...كلمني أنا قلقانة عليك!!"
بعد ما ارسلتها ...رجعت دقيت عليه...تلفونه مازال مغلق!!....لا أنا كذا راح أتجنن!!....من يوم ماطلع الصبح لا كلم وما أرسلي غير رسالة وحدة !!...وجواله طول اليوم مغلق!!....
خلاص وصلت حدي من الخوف!!...لازم أروح أكلم عمي!!...أنا كذا راح أتجنن!!
قمت وطلعت لي قميص فضفاض ولبسته على قميص النوم وحطيت الشيلة على راسي وجيت بطلع من الغرفة إلا وهوا في وجهي!!
ارتديت لورى وهو دخل وصفق الباب وراه وسألني : خير فين رايحة!!...
أشرت له بخوف: ليه تأخرت!!...حرام عليك جننتني!!...
رمى الشماغ على طول يده وجلس وقالي وهو يفتح أزرار القميص بطفش: وليه شايفاني بزر!!...وبعدين لا تتجني ولا شي!!...أيش راح يصرلي يعني!!
رميت الشيلة على السرير وأشرت له بعصبية: هذا هو إلي ربنا قدرك عليه!!
محمد ببرود: والمرة الجاية لما أتأخر نامي!!...لا تشغلي نفسك فيا!!
أشرت له: محمد!!...ليه تغيرت!!...إيش إلي حصل!!...ليه هذا البرود معي!!...أقلك خايفة عليك !!...تقلي نامي!!...ماعمرك كنت كذا!!
محمد: ماتغيرت ولا شي!!...إنتي إلي صايرة حساسة زيادة على اللزوم!!...
وراح للدولاب وطلع له بجامة ...ولبسها
جاببالي إنه لسى ماتعشى...ومع إني راح أفرقع من زعلي منه إلا إنه ماهان عليا ينام من دون عشى عشان كذا أشرت له: طيب الحين بحطلك عشى ثواني!!
محمد: ثريا !!..أنا تعشيت برى!!...أبغى بس أنام بكرة ورايا قومة من الصبح!!
وارتمى على السرير ودخل في النوم...ولا سوى أي إعتبار لخوفي وقلقي عليه!!...
حتى كلمة تصبحي على خير ياحبيبتي بطل يقولها ليا من كذا يوم!!...أصلا بطل يصير بينا كلام!!
خلعت القميص وعلقته في الدولاب وطفيت النور وانسدحت بجنبه على السرير...
كان معطيني ظهره ....جلست أتأمله بحزن إيش إلي حصل!!..محمد ماعمره نام غير وهوا مقابلي!!....الأيام هذه شكله حتى ما يبغى يطل في وجهي!!
غمضت عيوني وأنا اتذكر كلمته: ابغى آخر ماتشوفه عيوني هوا إنتي..عشان أحلم فيكي وماتفارقيني حتى في حلمي!!...
غصب عني نزلت دمعة حرة حايرة!!...إيش إلي غيره!!...
ليه ذا البرود إلي أحسه هذه الأيام في معاملته ليا!!
صار حتى ما يجلس معي زي زمان!!... حسيت بالخطر يهدد حياتي معاه!!... شعور غامض خوفني!!....إيش هوا مدري!! لكني حاسة إنه غامض ومخبي عني شي!!....إيش هوا !!...إيش إلي شاغله عني!!....
سلمت عيوني للنوم لكن عقلي لساته شغال ...وقلبي مو مطمن..
.......................
غادة...................
:يما قتلك ما أبغى أروح يعني ما أبغى!!
أمي بزعل: كيف يعني!!...أقولك جدتك هنا وتسأل عنك!!...وبعدين سبحان مبدل الأحوال !!...اول كنتي مزروعة هناك بسبب ومن دون سبب!!...ذحين أقلك جدتك تبغى تسلم عليكي ما تبغي !!
قتلها بتعب: هوا كذا!!...قتلك ما أبغى يعني ما ابغى!!
قامت من مكانها بعصبية: أنا بقلهم إنك بتروحي!!...وإذا ما تبغي تروحي قوليلهم إنتي الشي ذا!!
وسابتني وطلعت!!
ارتميت على السرير منهارة!!....ما ابغى أروح!!....ما راح أستحمل مسخرتهم عليا زي زمان!!...أول كان في شي أستحمل عشانه!!...الحين لا!!...خلاص هارون قالها ليا ما يبغاني!!....وأنا فهمت الشي ذا وأقتنعت!!....وبعدين إلي حصلي عوفني في هارون وفي كل الرجال وما ابغى أشوفه ولا أشوف أخوه ولا أشوف أي واحد فيهم!!....ياريت نسافر!!...أي مكان بعيد عنهم!!.....
جاني صوت امي: وبعدين !!...أم هارون ذحين أتصلت!!...تقول جدتك تبغى تشوفك!!
قتلها بتعب: طيب طيب !!...بجهز!!
وقمت من مكاني بكسل....ساعدني يارب!!.....ودخلت الحمام(الله يكرمكم) رشيت يدوب وجهي بالموية...وطلعت...أخذت لي بلوزة وتنورة على طول يدي....ولبستمهم...مافكرت حتى أطل على نفسي في المراية!!....ورحت عشان أطلع لي عباية...وقفت عند الدولاب حوالي 5 دقايق أتأمل العبايات إلي عندي!!...أكثر من 10 عبايات...ولا عباية وحدة فيهم تنفع تتسمى عباية!!...كلها فساتين!!...سحبتها كلها ونزلتها على الأرض بعصبية....
من اليوم ورايح مستحيل ألبس منهم ولا فستان!!....وبعدين!!...الحين من فين لي عباية!!....
فكرت في أمي....ورحت لها عشان أطلب منها عباية...
دقيت عليها الباب...
جاني صوتها: خشي يا غادة!!
دخلت ورجع جاني صوتها: ها خلصتي!!
قتلها بعد تردد: يما !!..أبغى من عندك عباية!!
سألتني من المراية بإستغراب: وعباياتك!!
نزلت راسي وقتلها بصوت واطي :ما ابغى البس ولا وحدة فيهم!!...كلهم.....
سألتني: كلهم مالهم!!
قتلها: كلهم ما يسترو وأنا أبغى شي يسترني!!
رفعت راسي وشفت على وجهها تعبير غريب...وقامت من مكانها وطلعت لي عباية وجات وأعطتني ياها....وجهها كان أحمر وعيونها فيها دموع!!
سأتها بإستغراب: إيش فيكي يما!!....
هزت راسها بهدوء : ولا شي!
اخذت منها العباية وحطيتها على الطاولة ورجعت سألتها بإصرار: يما إنتي تبكين!!....إيش في!!
جاني صوتها : فرحانة يما!!....أمس شفتك تصلي واليوم تبغي تلبسي عباية مستورة!!...حسيت بشي في قلبي برد!!....هذه دموع الفرحة يما!!
مشاعرها غلبتني!!...نزلت دموعي...قربت منها وأرتميت في حضنها!!...آآآآآآآآآآآآآآآه قد أيش أنا محتاجة لهذا الحضن الدافي!!...تمنيت أفضفض لها عن كل إلي في قلبي!!...أبغى أتخلص من الهم إلي رابض على صدري!!....لا مو وقته الحين.....
قتلها وانا لسى دافنة راسي في صدرها: سامحيني يما!!...أنا طول عمري كنت عاقة!!...ما راعيت الله فيكي!!...سامحيني يما عشان ربنا يرضى عني!!
قالتلي وهيا تمسد على شعري: الله يسامحك ويرضى عنك!!...ربي يسعدك في الدنيا والآخرة
في السيارة كنت مرتبكة!!...إيش راح يكون تعليقهم عليا!!....تمنيت أرجع...لكن لا!!...أنا مصممة على إني أغير نفسي من برا ومن جوا!!....وأول شي لا زم أتعلمه كيف أتقبل الناس وكيف أقنعهم إنهم يتقبلوني....
وصلنا بيت عمي حسن ....
وفتحت لنا الخدامة وودتنا على المجلس الداخلي....دخلت وأنا لسى حاطة الغطا على وجههي....
طبعا الكل كان يطل عليا بإستغراب مين هذه إلي مع نورة!!
ولما كشفت شفت الإندهاش في نظراتهم....طنشت هذه النظرات ...وسلمت عليهم وجلست بهدوء جنب أمي....
بعد شوية جاني صوت جدتي: كيفك يا غادة!!...ليه يما ما كنتي تبغي تجي!!...
جاوبتها: أبد يما كنت مصدعة شوية...لكن لما عرفت إنك هنا قلت أجي أسلم عليك!!
جدتي: الله يرضى عليك يما!!
والتفتت لأمي وقالتلها بعتاب: إيش فيها غادة وجهها أصفر!!...شكلها ماهي طيبة!!
أمي بإستسلام: والله يا عمتي عجز لساني وأنا أقلها أوديكي المستشفى!!
التفتت لي جدتي: ليه يما ما تبغي تروحي!!...روحي طمني على نفسك!!
جاوبتها : لا تشغلي نفسك يما!!...بس مجرد إرهاق...وإن شاء الله راح أصير أحسن!!
جدتي بقلة حيلة: الله يصلحك يا بنتي!!
في اللحظة ذي جا صوت ما تمنيت أسمه أبدا: يما !!
أم هارون: تعال يا هارون مافي أحد!!
أنا أول ما سمعت صوته رميت الطرحة على وجهي....إنقهرت من كلمة خالتي أم هارون " مافي أحد" ....حسيت إني!!...إني بلا قيمة!!
لكن معذورة....طول عمري أطلع لولدها بطولي!!....إستغفر الله العظيم سامحني يارب!!
ودخل هارون تذكرت كل المرار إلي عشت فيه الأسبوع إلي فات....تمنيت أهج من مكاني...تضايقت بجد لما دخل ....
قدم من جدتي وسلم عليها....
وبعد شوية شفته أنتبه لي ...طل على أمه بإستغراب...الثانية هزت راسها بهدوء
ألتفت لأامي: حيا الله عمتي نورة...عاش من شافك!!
أمي: عشت وعاشت أيامك...كيفك يا هارون!!
هارون: الحمد لله إنتي كيفك وكيفها غادة!!...
أمي: الحمد لله بخير...وهذه هي غادة بجنبي!!
رفع عيونه فيا بإستغراب...شكله ما صدق!!...تجاهلت نظراته ونظرات كل الحاضرين....وركزت عيوني على يديني...
جاني صوته بهدوء: كيفك يا غادة!!
هزيت راسي بهدوء...ماقدرت أرد عليه....لو فتحت فمي راح أنفجر أبكي !!...
وجات سراب كملت الناقص قالت بكل وقاحة: غريبة ما كشفتي!!.....هارون جا!!
سمعت صوته زي الرعد: سرااااااااااااااااب!!...إنطمي!!
طليت عليها من ورا حجابي بغيت أقوم أدعس بطنها....مدري كيف مسكت نفسي بالقوة.....
لكن أمي قالت: إتركها يا هارون!!....مو سراب إلي غلطانة!!...أنا إلي غلطانة لاني غصبت عليها تجي عشان تسلم على جدتها....
أنا كنت على وشك إن دموعي تنزل!!...لكن كلام أمي جمدني شوي!!
مسكتني من يدي ورحنا حبينا راس جدتي ....طبعا إلي أعترضت من الطريقة إلي طلعنا فيها من البيت وجلست تخاصم على سراب...وإنها بزرة ما تفهم.....لكن أمي أصرت على إنا نمشي!!....
طول الوقت كنت ساكتة وأطل على أمي بإمتنان....أول مرة أمي تدافع عني قدام الناس!!...دايما كانت تسكت...لاني أكون أنا الغلطانة!!....
أما المرة ذي فقدرت تدافع عني لاني صح....كنت فرحانة بأمي بشكل ما يتوصف...حسيت إنها تقدر تحميني....
وصلنا البيت....وقبل ما تدخل غرفتها ناديتها: يما!!
جاوبتني: أمي!!
قتلها:أنا عمري ما قتلك إني أحبك !!...لكنك عارفة إني أحبك!!
فتحت لي ذراعها....جريت عليها...وارتميت في حضنها....كنت بعيدة عن الدنيا كلها...وبعيدة عن أمي!!...والحين مايهمني الدنيا هذه كلها مدام أنا في حضن أمي!!...
مسدت على شعري وقالتلي بكل حب: وأنا أحبك وأشوفك عيوني ونظري وأحلى سنيني!!...الله يسعدك يا غادة ولا يوريني فيك غير كل خير!!
قتلها بكل راحة: أحبك يما!!...ربي لا يحرمني مكن!!
............................
يحيى ..............
دخلت البيت.....وكان مقلوب بصوت أمي!!....
شفت هارون جالس بجنبها وجدتي على الكنبة الثانية...وسراب جالسة مقابلة لهم ومنزله راسها....
وأمي تصرخ بصوت عالي: إنتي ما تستحي على وجهك!!....متى بتكبري!!...متى هذا الراس بيكون فيه عقل!!
سراب : يما أنا ما كان قصدي!!
المرة ذي رد عليها هارون بحدة: إذا منتي عارفة تثمني الكلام إلي تبغي تقوليه...إبلعي لسانك أحسن!!
سراب وهيا على وشك تبكي: إيش فيكم عليا!!....هذا كله عشان كلمة قلتها لست الحسن والجمال!!
جدتي : يما الله يهديكي!!....أمك وأخوكي ماهم حارقين دمهم إلا عليكي!!...يبغولك الخير!!...الله يهديكي بس!!
قربت منهم وقلت بإستغراب: السلام عليكم!!
الكل: وعليكم السلام ورحمة الله وبركاته!!
جدتي: هلا يما يحيى!!....
رحت وبوستها على راسها وجلست بجنبها....
وسألتهم وأنا مستغرب: إيش فيكم !!....إيش سوت سراب!!
قامت أمي من مكانها وقالت بعصبية: خليها هيا تحكيلك عن قلت أدبها إذا تقدر!!....يلا يما ...أوديكي غرفتك ترتاحي!!
وقامت وقامت معاها جدتي....
التفت عليها ..كانت تطل على هارون بخجل...والثاني محمر عيونه فيها
سألت بعصبية: وبعدين معاكم!!...قلت لكم إيش في!!
جلس هارون وقال: قوليله إيش قلتي لغادة!!
حسيت بقلبي تحرك من مكانه بس على ذكر اسمها .....سالت بلهفة حاولت على قد ما اقدر أخفيها: إيش قالت!!
سراب: يووووووه ...خلاص قلت آسفة كم مرة يعني تبغوني اتأسف!!...والله شي يقهر!!...
هارون بحده:لا والله!!...لك عين تتكلمي كمان!!....
قامت من مكانها متعفرته وطلعت فوق...
قلت : وبعدين معاكم!!.....ماحد يبغى يحكي يعني!!
أمل : انا راح حكيلك....
:اليوم غادة ...جات هيا وعمتي نورة ....عشان يسلمو على جدتي!!
قتلها بطفش: طيب وإيش الجديد!!...مو كل يوم وغادة ناطة عندنا!!..
قلتها بقهر !!
أمل: الجديد إنها تغطت من هارون لما دخل يسلم على جدتي!!...
قتلتها بإنكار: ها!!
أمل: والله هذا إلي صار!!.....وكمان كانت لابسة عبايا مو متبهرجة....حتى إنا ما عرفناها لما دخلت مع عمتي نورة!!
جلست أنقل نظري بين هارون وأمل وأنا مو مستوعب الكلام إلي أسمعه!!...معقوله جالسة تتكلم عن غادة!!....معقولة تغيرت في أسبوع!!
أمل: هيييييييييي فين رحت!!
قتلها بإستغراب: كلامك هذا ما يتصدق!!
هنا هارون تدخل: وليه!!.....سبحان الله يغير ولا يتغير!!
جاوبته: سبحان الله
أمل: لكن من جد الواحد له حق يستغرب!!.....لما كانت جالسة بينا حسيت إنها وحدة ثانية!!...ماهي غادة إلي أنا أعرفها ابدا !!...
غصب عني أبتسمت .....ما قدرت أغلب فرحتي!!....معقولة غادة تكون تغيرت من جد!!....ياريت !!...ياريت تتغير!!
رجع جاني صوت أمل: بس كان باين عليها إنها تعبانة مرة!!
التفت عليها بسرعة وبإهتمام...لكني ما علقت
سألها هارون: تعبانة مرة كيف يعني!!
أمل: مدري وجهها كان شاحب مرة...وفي هالات سودة حول عيونها !!...
هارون: طيب ما سألتوها إيش فيها!!
أمل: إلا سألتها جدتي!!...وجاوبتها إنه مجرد إرهاق...
ركزت نظري على هارون.....شفته سرح.....وبعدين قال: أجل زي ما قالت إرهاق...
أمل : إمكن!!...وإمكن لأننا أول مرة نشوفها من دون مكياج وبهرجة زايده!!
حسيت إني أبغى أجلس لوحدي....
عشان كذا أستأذنت منهم وطلعت.....
تمنيت في هذه اللحظة ادق عليها اسمع صوتها....
بدل كذا مسكت جوالي كتبت فيه كل الي احسه .....كل مشاعري كل حبي وذكرياتي....لكن في النهاية ما قدرت أرسله!!....مسحتها من الجوال ورميته على طول يدي.....
وسهرت طول الليل افكر فيها وهيا الله واعلم تفكر في مين!!
هل هارون هو محور تفكيرها ولا تكون فعلا نسيته!!
............................
هارون...............
سألت بإستنكار: تبغوها تمشي كل ذا !!...
أمل: أجل!!...أهم شي إن الزفة تطلع منظمة وحلوة!!
قتلها بعصبية: أنا أحيانا أشك إنك طبيبة!!....
أمل : إيش فيك ياخي!!...إيش دخل الطب الحين!!
صحت فيها وشويا وراح أطلع من هدومي: اللهم طولك يا روح!!...تبغو تقضو عليها إنتو!!....ماتقدر تمشي كل هذه المسافة لغاية الكوشة!!إرهاق عليها!!...مو كفاية هذا الدرج كله إلي بتنزله!!....أصلا حتى الدرج ما بخليها تنزله!!...
أمل بإنكار: لااااا والله !!....ومن فين تبغاها تنزل!!
قتلها بعناد: دبرو نفسكم...صبا ما بتمشي ذا كله
أمل بملل: هارون لا تكبرها وهي صغيرة !!
قتلها: ماحد قلكم تختارو وتتفقو من دون ما تستنو رأيي!!...
أمل بنفاذ صبر:شوفو إيش يقول!!... مو إنت يا ولد الحلال قلت أختارو القاعة إلي تبغوها وأنا ماعليا غير إني أدفع!!...مين إلي قال كذا!!..إنت ولا خيالك!!
قتلها بعصبية: صبرا جميل والله المستعان!!...انا قلتلكم قاعة مو ملعب!!...وبعدين قلت طبيبة ومقدرة حالة صبا!!...نسيت إنك في النهاية مرأة...تحب الفشخرة والكلام الفاضي!!...ولولا إني كنت مضغوط هذيك الفترة كان ما اعتمدت عليكم !!....
سراب وهي تحط كف على كف بملل : طيب والحين إيش ناوي!!
قتلها: هيا كلمة أخيرة.... زوجتي ما بتنزل كل هذا الدرج...وما بتمشي كل هذه المسافة لغاية الكوشة...وهذا آخر ما عندي!!....يا كذا يا أغير القاعة!!
صرخو سراب وأمل في وقت واحد: إيييييييش!!
قلت بغضب: الله لا يبارك فيكم من بنات!!...ليه تصارخو كذا!!
أمل: شوف نفسك إيش تقول!!
قتلها: هذا كلامي وصلكم !!
سراب بإعتراض: يعني كيف!!...نزرعها لك على الكوشة مثلا!!
قتلتلها: أجل بغير القاعة!!
هنا أمل نادت أمي بصوت عالي: يمااااااا تعالي شوفي ولدك!!....شوفيه إيش يبغى يسوي!!
قتلها بغضب: لا والله تشتكيني على أمي!!...ليه شايفاني بزر عندك؟!
أمل بإستعطاف: ياحبيبي مو كذا!!...بس إلي إنت جالس تقوله ما يدخل العقل!!...
قتلها : قتلكم إلي عندي....أنا ماشي
في اللحظة ذي جات أمي ومعاها رحيم ...: خير يما إيش فيه!!
قتلها بغضب: شوفي بناتك هالفاضيات!!...يبغو صبا تمشي هذا كله!!
أمي بإستغراب:أكيد بتمشيه ....أجل!!...
قلت: لا حول ولا قوة إلا بالله!!....حتى إنتي يما!!...تعب عليها تمشي ذا كله!!....افهموني يا ناس!!
قالتلي أمل بترجي: هارون وإلي يسلمك لا تخرب علينا!!
صحت في وجهها : يعني أضحي بزوجتي عشان كلام فاضي ومظاهر كذابة!!...إنتو ما تفهمو!!...
رحيم إلي كان ساكت طول الوقت: هارون لا تعطي الموضوع أكبر من حجمه!!....زوجتك ما عليها شر إن شاء الله!!
قتله بعصبية:بدل ما توقف معي!!
رحيم:كيف أوقف معك وإنت غلطان؟!...سايبنا نسوي كل شي ونجهز كل شي !!...وجاي قبل الزواج بأسبوع وتقول غيرو القاعة!!...معقولة يا هارون!!
قتله بعصبية: ياخي كنت مشغول!!...حتى الجلسة معاكم ماكنت أجلسها يادوب من البيت للمستشفى!!...قلت اعتمدت عليكم!!....
رحيم:إحنا والله مقدرين مشاغلك!!...لكن إرضى بالي إحنا سويناه!!
جابته بصوت عالي:رحيم ما دامك ما تعرف شي ....ففكني واسكت!!
قلي بهدوء: طيب لا تعصب علينا!!...
قالتلي أمي: هارون وش فيك!!....أخوك ما قال شي!!
قلت : ما كان قصدي أعصب عليك يارحيم!!...لكن والله أنا خايف على البنت!!...إفهموني !!...
أمل : حتى إحنا تهمنا صحة صبا!!...صح ما راح نحبها زيك!!
وغمضت لسراب ...إلي ابتسمت من الأذن للأذن ...
قتلها بحدة: أمل!!...بلا تطويل وتقصير ....
كملت سراب: هارون!!...لا تصير بايخ!!
طليت على ساعتي وقلت: أنا تأخرت على المستشفى سلام...
وقبل ما أمشي سألت أمل: بتسيبنا حايسين وتروح!!...
قتلها وانا أمشي بسرعة: يصير خير ...بعدين !!
وطلعت من القاعة....وقبل ما أوصل لسيارتي ...
جاني صوت رحيم:هارون إستنى!!..
وقلي لما قرب مني: إيش قصتك!!
سألته بإستغراب: إيش قصتي!!
رحيم:مدري عنك!!....كيف يعني نغير القاعة!!
قتله بملل: الحين تبغاني اعيد كل الكلام إلي أنقال جوا!!
رحيم: أبغاك تفهمني!!
جاوبته: أفهمك إيش!!....صبا ما تقدر تتحمل تمشي كل هالمسافة!!
رحيم: من متى هذا الإهتمام!!
جاوبته بأسف: من لما شفتها أمس في المستشفى...خلال جلسة غسيل الكلى!!...صبا عايشة بقوة الروح!!...بقوة الإرادة!!...العذاب إلي تتعذبه مع كل غسيل كلى ما يستحمله أحد!!...تخيل دمك ينسحب من جسمك كله مرة وحدة ويرجع لجسمك مرة ثانية ببطء!!....تخيل إنها في كل جلسة مهددة بإنها تنصاب بتسمم في الدم أو إتهاب الكبد!!...ما يكفيها هذا الخطر إلي هي عايشة فيه!!...كمان أجي أنا وأزيد على ألمها ألم!!...وبعدين بغض النظر !!...أنا طبيب...يعني لو كانت عدوتي ...ما راح أتصرف معاها غير كذا!!
كان ساكت ويطل عليا بهدوء...وبعد لحظات صمت سألني : طيب إيش راح نسوي الحين!!....
قلت بقهر:أخواتك هذولا مجانين!!...
قلي : لكني لسى شايف إنك تبالغ
قتله بغضب:بعد كل الكلام إلي قلته!!... لا ما أبالغ !!...صبا أصلا راح تكون مرهقة !! راح يكون قدامها قومة من الصبح!!... وراح تجلس على الكرسي ساعات طويلة...والجلسة في حد ذاتها تتعبها !!...ولا تنسى إن أخواتك ما راح يعتقوها..بروفات وجلسات!!...وتجي في النهاية تمشي كل هذه المسافة!!...حرااام...تعب عليها!!
قالي:طيب وبعدين!!
جابته بحسم: ولا قبلين!!...مافي غير أغير القاعة!!...
قال بإنكار: من جدك إنت !!..مافي وقت يا هارون!!
قلت بطفش: افففففففف كان المفروض أشوف القاعة بنفسي قبل لا أحجزها!!...من جد مشكلة!!
رحيم : ماهي مشكلة ولا شي!!
قتله بعناد: صبا مستحيل تنزل كل ذا الدرج!!.....وترجع تمشي كل هذيك المسافة!!
رحيم: هارون ...أخواتك وأمك وكلنا...عشنا مستنين هذه اللحظة....خلينا نفرح!!
قتله بحيرة: وصبا!!...أنا خايف عليها!!
رحيم: قتلك إن شاء الله ما بيصير لها غير الخير...وبعدين زي ما قالولك البنات...كلكم بتكونو حولها!!...وإنت بتكون بجنبها!!...وبعدين لو سمح لله تعبت...وقف الزفة وشيلها إنت لغاية الكوشة !!
ضحكت بصوت عالي : ههههههههههههههه قسم بالله بتنقلب الدنيا حريقة!!... هيا إسمي تتقرف تنطقه!!...
رحيم: يا ساتر!!...من جد كارهاك !!
قتله : فوق ما تتصور!!...وتسمعني كلام عمري ما سمعته!!...والله إني امسك نفسي عنها بشق الأنفس!!
رحيم: ومع هذا كله خايف عليها!!....ياريتها كانت هنا تشوف كيف مشغول بالك عليها!!
قتله بتريقة: كأنه يجيب نتيجة معاها!!... ماعلينا....أنا تأخرت من جد!!....يلا سلام...
قلي بسرعة: طيب إيش قررت!!
رفعت له يدي وقتله: يصير خير!!...في البيت نتفاهم...
