ستفرج 💙
الحلقة 5 بقلم ✍🏻 وتين محمد
.
.
.
.
.
.
هنا حرفيا وتين لو الدموع بتكمل فهي كملتها 🥺 بعد شوية فاقت من سرحتها دي بصوت جاي من برا المهم قامت طلعت تشوف دا شنو بس اتفاجأت انو سامر واقع في الارض ( دا ولد خالها مؤمن) وبيبكي وماف زول جايب خبرو الدنيا كانت عصريات المهم رفعتو وطبعا هي لسة ما قادرة تتكلم ف بقت تربت ع ضهرو لحدي م هدتو وطلعت بيه الطابق التاني لامو دقت الباب ودخلت لحنين ( زوجة مؤمن)
حنين : وتين 😍 كيفك حبيبتي كيف بقيتي
وتين هزت ليها راسها انو الحمد لله
حنين : اعفي لي والله جيت من الجامعة منتهية ودخلت المطبخ طوالي لمن جيتك لقيتك نايمة ( هي دكتورة ف الجامعة وعندها رِيا وسامر.. رِيا الكبيرة وسامر اصغر منها بستة سنوات كدا)
وتين غمضت وفتحت عيونها وهزت راسها بمعنى ولا يهمك ما مشكلة المهم ادتها سامر وقعدت معاها شوية ونزلت تحت مشت لحبوبة فرح
حبوبة فرح : بتي السمحة
وتين ابتسمت ليها
حبوبة فرح : اها كيف بقيتي
وتين هزت راسها انها كويسة
حبوبة فرح : الحمد لله يا بتي... تعالي يما النخت ليك تاكلي من الصباح ما اكلتي شيء
وتين هزت راسها بمعنى لا لا ما عايزة شيء بس حبوبة فرح ما خلتها ومشت ختت ليها داك يا ملاح الخضرة المفروكة وديك الكسرة وجابتو ليها
حبوبة فرح : يلا حبيبتي انا اكلي عشان خاطري
طبعا وتين عندها اي شيء ولا زعل حبوبة فأكلت شوية عشان ترضيها وكدا اصلا هي نفسها مسدودة ( الله يكون ف عونك يا وتين) وسرحت وتين 🥺💔
_________________________________________
فلاش باك 🕖 قبل تلاتة سنين يعني وتين كان عمرها 14
حسام : ليلى الليلة جايني ضيوف عليك الله زبطي لينا اكل وحلويات كدا من يدك
ليلى : طيب يا حسام... جايين كم نفر
حسام : والله تقريبا 20 نفر
ليلى : ف نفسها وووب علي دا كلو وان شاء الله دايرني اجهز براي.... ردت عليه ااا طيب وجايين غداء ولا عشاء ولا شنو ؟
حسام : غداء
ليلى : كويس اها خلاص جيب الحاجات اللي عايزنها من السوق
حسام : برسلها مع خالد ( السواق) وبقى مارق ع شغلو
ليلى : وتين
وتين : نعم يا ماما
ليلى : الليلة ابوك جاينو ضيوف قومي عشان تساعديني
وتين : حاضر يا ماما بس اصلي الضحى والحقك
ليلى : عاينت ليها كدا يعني نظام صلاة شنو ليك ومشت
وتين صلت صلاتها وبقت ماشة على امها
في المطبخ
وتين ودنيا وهانم وحبوبة فرح وحنين هم الكانو شغالين اما الست ليلى فكانت بتنظر.... المهم وتين دي اي فكرة جاتها ف راسها هي عملتها وظبطت الاكل وشكل الاكل واي شيء بس حبوبة فرح منعتها تقرب على النار عشان لسه صغيرة والبتوجاز عالي وكدا اللهم ست ليلى بعدما نظرت ليهم عملت روحها مصدعة وتعبانة وكدا فمشت نامت وبي هنا دنيا وهانم برضوا ما اشتغلو كتير ومشو فالاشتغل منووو وتين وحبوبة فرح وحنين زوجة مؤمن بس 🤦🏻♀️💔 المهم ظبطو الامور و العصر اذن جاء داخل حسام بيسلم من برا عشان لو ما لابسين يلبسو وقف مسافة لحدي ما حبوبة فرح قالت ليه اتفضل يا ولدي فلما دخل اتفاجأ انو ليلى ما معاهم سال منها قالوا ليه قالت مصدعة ومشت من قبيل حسام غضب شديد بس اتماسك قال ليهم الناس ديل جو في الصالون جهزوا الغداء وانا بجي اشيلو ومشى ع ليلى
حسام : ليلى ليه خليتي خالتي و وتين وحنين يشتغلو براهم
ليلى : يا حسام انا... قاطعها
حسام : ليلى انا متزوجك انت ولا متزوج التلاتة اللي ف المطبخ ديل كل م اعزم ناس تخليهم هم يشتغلو وانت تعملي لي فيها عيانة 😡 احسن تمشي عديل يا ليلى 😤
ليلى طبعا بقت ترجف عديل كدا من الخوف وهو كان بتكلم معاها بصوت عالي نساها ليك الصداع الكانت متصنعاهو داك وقامت زي الترتيب بت الذين 😂
بس المشكلة انو وتين سمعتهم بيتشاكلو وعرفت انها السبب بانو حسام ماااا بيرضى فيها ف بقت تبكي وعرفت انها ح تاخد علقة من امها
المهم ليلى مشت رصت معاهم الصواني وجو حسام ومؤمن شالوها ومشو بهناك بعد شوية جو عايزين الشاي طبعا عملتو ليلى بعد الشكلة ديك وعدا الوقت والضيوف مشو رتبو المكان و وتين بقت تغسل ف العدة الساعة كانت 7:30 مساء والجو بارد جاتها حبوبة فرح
حبوبة فرح : يا امي قومي ادخلي جوا الواطة باردة عليك العدة خليها بتجي خدوج بكرا تغسلها
وتين : لا لا يا حبوبة اصلا قربت انتهي ( وتين عنيدة لو قررت تعمل حاجة بتعملها)... فجأة جاتهم ليلى ناطة
ليلى : خليها يا امي واصلا الجو ما بارد ولا شيء وهي ما شافعة ما كفاية حسام جاء اتنهر فيني بسببها
حبوبة فرح : ليلى دا شنو البتقولي فيه دا و وتين ذنبها شنو اساسا يا بتي
ليلى : هي السبب في اي حاجة اصلا يا امي وكل مرة ابوها يجي يشاكلني انا
حبوبة فرح فهمت الموضوع ساقت ليلى و دخلتها جوا عشان عارفة ليلى وكلامها المسيخ
وتين ف وقتها بقت تبكي وقالت يا رب انا ما لي ذنب يا رب حنن قلب ماما علي يا رب انا بحبها بس م عارفة ليه هي بتكرهني كدا 😭
باك 🕑
__________________________________
وعت من سرحتها دي بصوت آذان المغرب قشت دمعتها النزلت دي وقامت اتوضت وصلت ودخلت المطبخ عملت شاي المغرب ومشت لمتهم كلهم ف الحوش وقعدو يشربو ف نفسها قالت يا ريت لو كل مرة نتجمع كدا ونكون مبسوطين 😔💜
بعد اخدو ونستهم دي كان العشاء أذن الرجال مشوا الجامع و النسوان كل واحدة دخلت غرفتها.....
وتين كانت عايزة تصلي العشاء بس لقت انو البريود جاتها ( متخيلين انها ح تمشي لامها صح 😂😂) بعدما ابوها جاء من الصلاة مشت ليه وفي يدها ورقة كاتبة فيها انو عايزة اولويز ادت ابوها الورقة ورجعت غرفتها بتتلوى من المغص بعد مسافة حسام جاء اداها اللي طلبتو واطمئن انها بخير ومشى لشمس
حسام : شمس عليك الله اعملي لوتين كباية قرفة
شمس : حاضر يا عم حسام ومشت تعملو وحسام دخل غرفتو لقى..........
يتبع
كسرات صغيرات كدا 🙊
1_ اعفو لي عالشحتفة كنت مصدعة الليلة وما قدرت اكتب الحلقة الا هسي 💜
2_ لاحظت انو ف ناس كتير بيقولوا انو ليلى ما ام وتين بس يا جماعة والله امها وشالتها 9 شهور واي شيء 😂💔 بس ح تعرفو لقدام كل شيء والصورة ح توضح اصبرو علي بس 🥺💙
3_ ف كم واحدة قالو انو حسام ما عندو شخصية لا حسام شخصيتو ح تظهر لسة ف الحلقات الجاية بس نقطة ضعفو المرض ما بيستحمل يشوف ليلى او واحد من اولادو مريضين عشان كدا ف الحلقة اللي فاتت اول م ليلى اتدهنست ليه وقتلت حيلها هو رخى طوالي وليلى عارفة النقطة دي فبتاخدها في صالحها 🙂
4 _ اتحمسوا لي عليكم الله ناس تم علقوا وادوني رأيكم انا بتشجع اكتب لمن اشوف تعليقاتكم الحلوة دي والله 💜💜
5_ اعفو لي بس الليلة حلقة واحدة ما عارفة اذا ح اقدر اكتب السادسة او لا 😔💔 اذا قدرت بكتبها ليكم بعديييين 🥺💚
أخيرا... كونو بخير الى ان نلتقي 💗
