ستفرج ♣️
الحلقة 14 بقلم ✍🏻 وتين محمد
.
.
.
.
.
وتين : حاضر يا ابوي وجاء سند ساقها ورجعو بيتهم المرة دي دخلت شقتها خلاص لقتهم جابو ليها غرفة النوم حقت ام وابو سند القديمة اللي مخزنة ف المخزن 💔( يا وجعتي عليك يا وتين)...
سند : اعفي لي يا وتين عارف انو حلمك يكون عندك غرفة نوم كاملة بس..
قاطعتو وتين
وتين : لا يا حبيبي ما مشكلة واهو دي غرفة ح نعدي بيها حياتنا لحدي ما ربنا يفتحها عليك ونجيب غرفة جديدة
سند : تعالي طيب وضماها عليه بكل الاسف اللي ف الدنيا انو هو ما قادر يجيب ليها غرفة نوم جديدة بس وتين نهائي ما قالت ليه حاجة ودايما بتساندو اها لحدي ف يوم جات هنادي اخت سند وكان معاها ناس اهلهم كدا طلعتهم فوق عشان يشوفو بيت وتين واول حاجة عملتها كانت فتحت ليهم غرفة النوم
هنادي : اتفضلو اتفضلو
وتين ساكتة ساااي
النسوان : ما شاء الله عاد بيتك سمح لكن الغرفة مالها زي القديمة كدا
هنادي : اااا ااااي دي غرفة امي وابوي
النسوان كل واحدة تعاين للتانية ويلولو ف خشومهن
وتين سااااااكتة برضو وكمان ضيفتهن حتى طلعو منها وبرضو سكتت واحتسبت الامر لله نهائي ما كلمت سند بالعمايل دي
اها وتين عندها ثابت كل يوم بعد المغرب بتمشي لابوها لو عندها مشكلة بتوريه لو في حاجة ما عاجباها بتكلمو وهو بيحل معاها مشاكلها ويوعيها المغرب اذن صلت وطلعت مع سند لابوها اول ما وصلتو وبقو قاعدين براهم اتفقعت بالبكاء
حسام : مالك يا بتي بسم الله عليك
وتين : تعبت منهم يا ابوي.. ابوي عمران تعاملوا معاي صعب وهنادي كل يوم والتاني بتخلق مشكلة وانا بسكت
حسام : اصبري يا بنتي بعدين سند كيف معاك مش كويس
وتين : ايوا يا ابوي
حسام : يبقى خلاص ما عندك شغلة في الباقيين.. وحجة ثريا
وتين : والله يا ابوي بتعاملني زي بناتها واكتر وبتحبني شديد من يوم دخلت عليهم ما سمعت منها شينة الحمد لله
حسام : ان شاء الله ربنا يألف بين قلوبكم يا بتي وهنادي مصيرها تعرف غلطها وتبقى كويسة معاك
وتين : حاضر يابا
اخدت ونستها مع ابوها وبعد صلاة العشاء رجعو بيتهم بعد اسبوع مرت حماها جات اسمها نرمين ( دي الكانت ف النفاس و وتين اول ما جات نزلت في شقتها اتذكرتوها 🌚 يلا نواصل) يلا طبعا وتين في شقتها ما كان عندها مطبخ وتلاجة زي نرمين فكانت بتنزل تشتغل تحت وتعمل الفطور وكدي وكانت بتخت حاجاتها ف تلاجة نرمين اها ف يوم الساعة 10 مساء
وتين : سند تشرب معاي شاي بلبن ؟
سند : يا ريت والله يظبط الراس
وتين : حاااضر امشي اجيب اللبن من التلاجة واجي
سند : تمام
مشت وتين وحاولت تفتح التلاجة فإذا بها مقفولة بالمفتاح والسيدة نرمين دستو( شكيت محنك يا نرمين 🙄) وتين طلعت ع شقتها وقالت لسند
وتين : شكلها نرمين اتضايقت مني لقيت التلاجة مقفولة... عاين يا سند جيب لي تلاجة بس ما بعرف
سند : حاضر يا وتين ان شاء الله بس اصبري معاي يا قلبي وان شاء الله ربنا يفتحها علينا قريب
وتين : ان شاء الله 😔 خلاص هسي امشي جيب لبن بدرة ولا اعملو شاي سادة احسن
سند : طيب امشي واجيك
ومشى سند جاب لبن البدرة من الدكان وجاء عملت الشاي شربو ونامو
_______________________________________
بعد مرور 6 شهور
سند : يا وتين ابوي دا تعبان شديد
وتين : يا سند اصبر ان شاء الله خير يا حبيبي
سند : يا رب يا وتين يا رب.... انا لازم اسافر ليه
وتين : وانا ح امشي معاك
سند : لا يا وتين والبيبي انت يادوب ليك شهرين والسفر بالنسبة ليك متعب شديد ف الفترة دي
وتين : سند انا قلت ماشة يعني ماشة
سند : طيب وجامعتك ؟
وتين : سند باخد اجازة الموضوع ما صعب
سند : طيب خلاص جهزي الشنط ونسافر بكرا الظهر
وتين : طيب تمام
__________________________________________
عند حسام
سميرة : الو يا حسام كيفك
حسام : اهلين يا امنا الحمد لله كيف انت ومودة
سميرة : انا كويسة لكن مودة وقعدت تبكي
حسام وقف على حيلو : مالها مودة في شنو يا سميرة
سميرة : مودة ادتك عمرها يا حسام
حسام : ااا شنوو سميرة انت بتقولي في شنو كيف يعني ومتين
سميرة : هسي يا حسام ضربت لي جوري
حسام : لا حول ولا قوة الا بالله.. لا اله الا الله محمد رسول الله... وبقى يبكي هو برضو.. طيب انا ح اتحرك هسي وبجي
سميرة : طيب... وقفلو ع كدا
ليلى : مالك يا حسام المات منو ؟
حسام : مودة اختي اتوفت يا ليلى
ليلى : لا لا لا لا لا متييين ووووووب علي لا حول ولا قوة الا بالله العلي العظيم
حسام : هسي اتوفت.... جهزي حالك عشان نتحرك طوالي
ليلى : سمح.. ومشت كلمت ناس امها واتصلت لوتين
ليلى : الو وتين كيفك
وتين : اهلين يما الحمد لله وانتو
ليلى : الحمد لله يا وتين.. عايني يا بتي جهزي شنطتك وتعالي هسي
وتين : في شنو يا امي اوعى ابوي تكون جاتو حاجة انتو كويسين
ليلى : كويسين يا وتين اجهزي و تعالي انت وراجلك سريع
وتين : سمح يما حاضر... كلمت سند وطلعو
حسام : ليلى اوعى تكلمي وتين
وتين : تكلمني بشنو يا ابوي
حسام : لا اله الا الله لحقت ورتك متين ؟
وتين : توريني شنو يابا في شنو اتكلمو يا جماعة
حسام : عمتك اتوفت يا وتين
وتين : عمتي منو
حسام : مودة
وتين : شنوووووووو ومتين حصل كدا ودوني لعمتي هسي وااااي وااااااااي 😭😭😭😭 يحليلك يا عمتي وبقو يبكو هي وابوها وناس البيت كلهم بكو معاهم 😭😭
بعد ساعة كدا كلهم طلعو ركبو عرباتهم واتحركو ع الخرطوم طبعا الدنيا ليل والشوارع فاضية فوصلو بدري....
سند كان مع وتين خطوة خطوة وكان قاسم اليوم ما بين بيت البكاء وبين ابوهو اللي راقد ف المستشفى وتعبان ( طلع عندو كانسر في الضهر حمانا الله واياكم) بعد اسبوع ناس وتين رجعو وسند بقى قاعد مع ابوهو...
وتين وحمها كان كعب شديد ومرضت عديل كدا كان حسام بيساهر معاها الليل كلو والكهرباء مرات بتكون قاطعة يقعد يهبب ليها ولو احتاجت شيء يجيبو لكن ست ليلى بتمشي تنوم ( تنومي السهر يا ليلى🙄) في يوم كدا بعدما وتين شدت حيلها حبة كانت حاسة بمغص شديد وكانت عايزة تستحم في نفس الوقت بس قامت كدا فتح فيها نزيف بقت تكورك لحبوبة لانها كانت قريبة ليها
وتين : حبوبة.... حبوبة الحقيني
حبوبة فرح جاتها جارية واتخلعت من المنظر الشافتو والدم مالي الواطة
وتين : حبوبة دا شنو ما اكون اجهضت 😭😭
حبوبة فرح : سجمي سجمي يا وتين كدي تعالي استحمي واكلم ابوك نمشي الدكتور
وتين : سمح ومشت جهزت حالها وحبوبة كلمت حسام ومشو الدكتور وطلع فعلا اجهاض ( الله يعوضك خير يا وتين 😭) وتين زعلت شديد بس قالت كلو لخير.. رجعو البيت وكلمت سند وبعدها باسبوع سند جاء من الخرطوم وكان يوم خميس جاء سلم على نسابتو وساق مرتو ومشو بيتهم لاقتهم حجة ثريا
ثريا : بتي السمحة ان شاء الله ربنا يعوضك كل الخير
وتين : اللهم آمييين يا امي.. كيف صحتك
ثريا : عاد بعد شفتك بقيت نصيحة تب
وتين : خلي البكش يما وضحكو.. بعداك طلعو شقتهم...
نرمين مع نفسها
" خلاص الكريهة دي جات وامي ثريا ح تخلي كل انتباهها مع الزفته دي اووووف "
_____________________________________
صباح الجمعة كانت الساعة 4:30 وناس وتين يادووب ختو راسهم ف المخدة كان يسمعو ليك خبيت ف الشباك وتين قامت مدت راسها تلقى ليك اخوان سند اتنين ومعاهم هنادي اختو برضو بالزعافة بيدقو ف شباك غرفتهم
وتين : نعم نعم
اخو سند : قولي لي سند ينزل سريع دا كلو نوم
وتين : حاضر حاضر
اخوه التاني : اسرعي
وتين : سند اخوا....
سند : تعالي نومي وما تشتغلي بزول
وتين : بس...
سند : ما بس ولا حاجة يا وتين انت عارفة اخواني ما عندهم شغلة تعالي نومي ساي صلاة وصلينا تاني في شنو تعالي
وتين : طيب.
وغطو في نوم عميق 😴💜
_________________________
___________
بعد مرور 7 شهور
سند : وتين قومي البسي نمشي لصاحبي طولت منو
وتين : طيب
سند : وجهزي لي معاك لبسة
وتين : من عيوني
اثناء ما بيجهزو كدا سمعة كواريك وبكاء تحت نزلوا لقو عمران ابو سند اتوفى وسبحان الله اتدفن سريع سريع والبيت اتملأ ناس ودا داخل ودا مارق وتين كانت حامل في الشهر السابع بي بنت فما كانت قادرة تتحرك كتير بس قدر البتقدر عليه بتعملو اها مرت ايام من البكاء ف يوم وتين كانت جعانة شديد ( شهور حملها الفاتت دي كلها كانت بتاكل عند ناس ابوها في مشيتها حقت المغربية ديك لانو ما كانت بتقدر تنزل واطلع كتير كانت ماسكة المطبخ نرمين والشغالة اسمها سمية وحجة ثريا ما كانت بتعرف اذا ادوها اكلت او لا لانو ما كانت بتتحرك كتير... نرجع) في جوعتها ديك كانت نازلة تحت بس حست راسها لافي كوركت لثريا
وتين : امي ثريا... امي ثريا... امي ثريا ورررب وقعت ف السلم تخيلو المرة الما بتقدر تغسل رجولها طلعت السلم من الخلعة لقت وتين واقعة وغايبة عن الوعي كوركت لنرمين واتصلوا على سند جاء ودوها المستشفى وكان عندها هبوط في السكر ( مع الحمل جاها سكري) بعد بقت كويسة رجعو البيت وسند بقى يجيب ليها اكل براها لمن عرف انو ماف زول بيجيب ليها اكل.....
بعد كم يوم وتين نزلت لثريا تحت سلمت عليها وقعدو يتونسو
ثريا : يا بتي اعملي خبيزك وحاجاتك حقت الولادة كلها دي بكرك ما عايزة تعزيها ولا شنو
وتين : لا لا يا امي بس...
ثريا : عشان البكاء ؟ يا بت ها قومي هسي البسي وامشي على حبوبتك فرح وخالتك اعملو الخبيز وكان عايزة تسوي الريحة سويها ( الله يديني نسيبة حنينة كدي زي ثريا دي)
وتين : قلتي كدا يما
ثريا : اي قلت كدا قومي يلا
وتين : سمح... خلاص بكلمهم بعدين لمن امشي ليهم
ثريا : خلاص تمام
____________________________________
بعد شهرين وتين مست بيتهم عشان الولادة
وتين : حبوبة والله الليلة بطني واجعاني شديد
حبوبة فرح : هيييي النقوم اجهز ليك حالك مادام في وجع معناها ح تلدي الليلة
وتين : اي احسن والله.. ااااه واااي حبوبة حبوبة بطني اااايييي
حبوبة فرح : يا فاطمة ( كانت معاهم اليوم داك) اجري وتين بتولد جهزي الشنطة وكلمي ابوك نمشي المستشفى
وتين : يا حبوبة ما قادرة استحمل احييييي يا الله
حبوبة فرح : استحملي شوية وقومي النلبسك التوب
وتين : اضربي لسند يا حبوبة وااااااييييي
حبوبة فرح : حاضر حاضر يا عبدالكريم تعال نوديها العربية.. فاطمة انت جهزي اي شيء والحقينا مع ناس حنين
فاطمة : سمح سمح
_________________________________________
في المستشفى
الدكتور : لازم نعمل عملية الجنين نبضو ضعف
جدو : اي دخلوها طوالي والحقو الطفل
الدكتور : طيب يا عمي
بعد ساعتين
الدكتور طلع جرى عليه سند
سند : طمني يا دكتور كيف صحتهم
الدكتور : الف مبروك البنت والحمد لله الام والطفلة بخييير وعافية
سند : الحمد لله الحمد لله 😍😍😍
حبوبة وفاطمة بقن يزغردن وضربو لحسام وليلى كلموهم ( هم ف السعودية) ولسميرة برضو في ساعتها ركبت جات طوالي عشان تنفس بنت اخوها مادام امها ماف وكدا
بعد اسبوع كانت السماية وسموها رميساء
يلا الحلو وين 😂 سميرة وحبوبة فرح قالو لوتين نحن ح ننوم معاك وكدا ههههه هن بنومن وكل واحدة تشخر والتانية ترد ليها الشخرة 😂😂 وفاطمة بتخت مرتبتها تحت سرير وتين عشان وتين قالت ليها بخافها تقع اخير تكوني قريبة يا خالتي....
بعد 38 يوم
حسام وليلى جو وكان باقي للاربعين يومين ( طبعا وتين كانت نازلة امتحانات وسند كان رافض لانو البنت لسه صغيرة ولو امتحنت ح تنزل الجامعة طوالي وكدا لكن وتين كانت بتقرأ بالدس من سند وكانت مصرة انها تمتحن) بعد الاربعين بيومين كان الامتحان وبقت تحنس في سند انها تمشي وهو رافض قال ليها
سند : هسي انت ما قريتي ح تمتحني كيف
وتين : بمتحن بس ما شغلتك
حسام : ( كان عارف انو وتين قرأت) خليها يا ولدي والبتجيبو تجيبو
سند : خير طيب الامتحان الساعة كم ؟
وتين : باقي ليه نص ساعة
سند : طيب قومي ارح اوديك
ومشو وعدت امتحاناتها وجابت معدل عالي
سند : عليك الله يا وتين انت كنتي بتقري كيف ؟
وتين : ايييت ما بوريك........
يتبع في الجزء الثاني 🙊💜
كونو بخير الى ان نلتقي 💜 محباااات ليكم 💜
#اقتباس
" انت قوية بما يكفي لتتخلي ، لتمضي وحدك لتُسايري نفسك لتمسحي على قلبك ، لتقبلي ما لا يقبل ، لتشعُري بالسوء وتصبري، انت قوية لذا كوني هكذا الى ان تفني " 😍💜
