الخير مبيترماش في البحر، ولا بيروح هدر، ربنا سبحانه وتعالى قال "وَمَا تُقَدِّمُوا لأنْفُسِكُمْ مِنْ خَيْرٍ تَجِدُوهُ عِنْدَ اللَّهِ هُوَ خَيْرًا وَأَعْظَمَ أَجْرًا"، ولو حطيت المعنى ده قدامك عمرك ما هتحس إن إنضحك عليك، أو تم استغلالك، بالعكس، هتقتنع إن الخير اللي إنت بتعمله في الأساس مش محسوب للناس، إنما هو بيكون لنفسك، وفي ميزان حسناتك، مش مستني وراه مادة أو مقابل، ولو متردلكش في الدنيا على هيئة كرَم، توفيق، بركة، تساهيل في أمورك، فهو محفوظلك كأجر وثواب عظيم من ربنا في الآخرة، وما عند الله خيرٌ وأبقى.
