-شوفت بنت ماشية في الشارع، كنت متعودة أشوفها كل يوم نازلة من بيتها لابسة خمار ولبس واسع، عمري ما شوفتها مبينة شعرها مرة ولا لبسها ضيق
-قربت منها وقولت: ما شاء الله اللهم بارك حجابك جميل أوي بشوفك كل يوم بالشكل ده وحبيتك أوي
-ابتسمت وقالت: أحبتكِ الجنة وخالقها يا جميلة
-كلامها كان جميل أوي
قولتلها: بس إنتي مكبرة نفسك شوية باللبس ده فيه خمار بيكون قصير وشكله لطيف عن ده وممكن تجيبي فستان أصغر شوية يعني ده واسع أوي
-قالت: لا أنا لبسي كدة كويس الحمد لله ملوش لازمة الحجاب لو ضيق وقصير
-بس شوفي فيه بنات هناك شكلهم ألطف لكن إنتي يبان عليكي إنك كبيرة أوي عن سنك
-بصت عليهم ووقفت تفكر شوية، بعدها سبتها ومشيت
_______
-تاني يوم لقيتها نازلة بخمار قصير مرفوع من عند كتفها وحاطة فلونكة كبيرة في الخمار من الجنب
قربت وقولت: شوفتي بقى شكلك جميل ازاي
-آه فعلاً بقى شكلي أصغر وأجمل
-ضحكت وقولت: يارب دايماً جميلة
___________
-طلعت أتمشى الفجر لقيت إمام المسجد شاب صغير طالق لحيته، وطالع في البرد يخبط على بيوت الناس يصحيهم للفجر
وبعدين يدخل المسجد يأذن للصلاة ويصلي بالناس
-صوته جميل أوي وبياخد ثواب كبير جداً على كل حد بيصحيه للفجر
-كان طالع من الصلاة، مشيت وراه جاله تليفون، وكانت فرصة سفر ليه بس بشرط إنه يحلق دقنه
اتردد وقال: بس.. بس أنا مش حابب أحلق لحيتي، اللحية سنة عن الرسول صلى الله عليه وسلم فيها إية لما أشتغل بيها
جيت من وراه وقولت: ما إنت قولت أهو سنة، يعني فيها إية لما تحلقها ولما ترجع ربيها تاني عادي
-سكت وقال: طيب ماشي ماشي سبني أفكر وهرد عليك بإذن الله
__________
-كملت مشي وأنا بتمختر وببتسم، لقيت ولد واقف يبيع مناديل في الشارع
قربت منه وإديته فلوس كتير
ضحك وقال: شكراً جداً أنا مش عايز الفلوس دي كلها إلا لو هتشتري بيهم مني
قعدت جنبة وقولت: بتشتغل لية
-علشان ظروفنا صعبة شوية بساعد بابا وبالليل بذاكر دروسي والصبح أروح المدرسة وبعد المدرسة باجي أقعد هنا
قولت: بس دي حياة متعبة أوي
قال: آه بس بابا قالي هتعب شوية وهدخل كلية بعدين وربنا إن شاء الله هيرضى عني ويجازيني خير وماما الله يرحمها هتكون مبسوطة
قولت: آه بابا عنده حق، بس ما إنت ممكن تساعده بفلوس كتير، عارف لو سرقت حاجة بسيطة من أي شخص من الناس دي هتجمع فلوس كتير وهم مش هيفرق معاهم هم عندهم كتير كمان مش هياخدوا بالهم أصلا
-فضل سرحان وباصصلي
-طبطبت عليه وقومت، وسبتله الفلوس
وقولت: لو فكرت في كلامي هيكون عندك أضعافهم في أقل من أسبوع
__________
-الناس دول أغبية أوي بجد عالم أغبية عدى عليا منهم الكتير، غويت كتير ودمرت حياة كتير، بس هم يستاهلوا، هم تفكيرهم في النهاردة لكن عمرهم ما بصوا لقدام ولا فكروا بعد ما أنا انتهي هيحصل إية
-بعد مشوار طويييييل، انتهى المطاف بيا قدام بركان نار بيغلي، نار بتبلع كل اللي حواليا، الناس عمالة تقع من فوق، منهم اللي بيعدي ومبيقعش دول أنا مقدرتش عليهم لا يوم غرهم فلوسي ولا جمالي ولا المتعة اللي كنت بقدمهالهم، دول كانوا أقوى من الشهوات وهوى النفس، استعانوا بالله على أنفسهم وغلبوها وكان جزائهم خير الجزاء
-لقيت البنت اللي أنا قولتلها تقصر الخمار جاية تصرخ
وتقولي: سمعت كلامك وبعدها اتغريت وقولت من غير الحجاب شكلي هيكون أجمل، بدأت أقلع الخمار بعدها رجعت للبناطيل، بعدها بدأت أحط مكياج بعدها بعدت عن ربنا وانتهى المطاف بيا لهنا أنا إية اللي خلاني أسمع كلامك أنا مشيت وراكي لية
-لقيت إمام المسجد بيسب ويلعن اليوم اللي قرر يتنازل فيه عن لحيته بعدها سافر وغرته الفلوس واختلط بالبنات وحياته اتغيرت من إمام مسجد لواحد بيضيع كل فلوسه على المحرمات
-لقيت الطفل بتاع المناديل جاي يقولي: مش إنتي قولتيلي اسرق وهترتاح أنا مرتاحتش أنا أبويا مات من زعله عليا، أنا عشت طول عمري أسرق لحد ما بقيت بشرب مخدرات وموت في بيتي لوحدي ذليل بعد حقنة مخدرات إنتي إية خلاكي تكلميني يومها إنتي شيطانة
-وغيرهم وغيرهم كتير جايين يندموا دلوقتي
-معلش هي بتبدأ بتنازل واحد بيجيب وراه كتير
-بعدها اتحولت لواحدة عجوزة شكلي يفزع أي حد
ووقفت قولتلهم: أهو أنا الدنيا، أنا الدنيا اللي اتغريتوا بيها وعجبكم شهواتها الزايلة، مفكرتوش في اللحظة دي صح أنا مليش دعوة إنتو اللي غرتكم شهواتكم، مجاهدة النفس صعبة بس مكنتش مستحيلة وإنتو استسلمتوا لهواكم وبقى مصيركم هنا محدش فيكم يلومني محدش يلومني كل واحد يشيل شيلته
___________
-يؤتى بالدنيا يوم القيامة في صورة عجوز شمطاء زرقاء، أنيابها بادية مشوه خلقُها، فتشرفُ على الخلائق
فيُقال: أتعرفون هذة؟
فيقولون: نعوذ بالله من معرفة هذة
فيُقال: هذة الدنيا التي تناحرتُم عليها، بها تقاطعتم الأرحام، وبها تحاسدتُم وتباغضتم، واغتررتُم، ثم يُقذف بها في جهنم
فتُنادي: أي رب أين أتباعي وأشياعي؟
فيقول الله عز وجل: ألحقوا بها أتباعها وأشياعها
🙃👌
